ەلوردادا كەن ورىندارىن يگەرۋ جانە پايدالى قازبالار سالاسىندا جۇمىس ىستەيتىن سونداي-اق, قورشاعان ورتانى قورعاۋ جانە ونەركاسىپتىك قاۋىپسىزدىك عىلىم مەن تەحنيكانىڭ, بيزنەس سالاسىنىڭ ماماندارى جانە عالىمدارى جينالدى.
«ۇلكەن ماتەريالدىق-شيكىزات الەۋەتى مەن ۇلكەن تاۋ-كەن ءوندىرۋشى ونەركاسىپتەرى بار ءبىزدىڭ ەل ءۇشىن بۇل ءىس-شارانىڭ ۇلكەن ءمانى بار. بۇل كەزدەسۋ كونگرەستىڭ 60 جىلدىعى جانە استانا قالاسىنىڭ 20 جىلدىق مەرەيتويى قارساڭىندا وتۋدە. بۇگىندە تاۋ-كەن ءوندىرىسى جانە وڭدەۋ ونەركاسىبى قازاقستان ەكونوميكاسىنا ءىرى ۇلەس قوسۋدا. بۇل سالاداعى 800 كاسىپورىندا 185 مىڭ ادام جۇمىس جاسايدى. ءوندىرۋشى جانە وڭدەۋشى ونەركاسىپتى جىلدام كەڭەيتۋ ەلىمىزدىڭ دامۋىنا كومەكتەسەدى», – دەدى قر پرەمەر-ءمينيسترىنىڭ ءبىرىنشى ورىنباسارى اسقار مامين.
ونىڭ سوزىنشە, ەلباسى نۇرسۇلتان نازارباەۆ حالىقارالىق ينۆەستورلاردىڭ قاتىسۋىن كەڭەيتۋ ءۇشىن تاۋ-كەن سەكتورىن رەفورمالاۋ جونىندەگى مۇمكىندىكتەر جاساۋعا تاپسىرما بەرگەن.
«ال وسى باعىتتا شەتەلدىك ينۆەستورلاردىڭ كەلۋىنە جول كورسەتۋ ءۇشىن جانە بارلىق كومپانيالارعا بىردەي ساپالى قىزمەت كورسەتۋ ماقساتىندا «استانا» قارجى ورتالىعى قۇرىلدى. قازاقستاندا تاۋ-كەن سالاسىنىڭ مۇمكىندىگى مول», دەيدى اسقار مامين.
كونگرەسس «يننوۆاتسيالىق باسىمدىق – الەمدىك تاۋ-كەن ونەركاسىبىنىڭ ءوسۋ جولىندا جاسالعان قادام» تاقىرىبىندا وتۋدە جانە گەولوگيالىق بارلاۋ, ءوندىرۋ جانە بايىتۋ, تاۋەكەلدەردى باعالاۋ, سالانى تسيفرلاندىرۋ, جاڭا تەحنولوگيالاردى ەنگىزۋ, حالىقارالىق قارجىلاندىرۋدى تارتۋ جانە ت.ب. ماسەلەلەردى قامتۋدا.
ءىس-شاراعا اۆستراليا, اۆستريا, كانادا, پولشا, نورۆەگيا جانە فرانتسيادان دەلەگاتسيا, الەمنىڭ عىلىمي جانە ىسكەر قوعامداستىقتارىنىڭ جەتەكشى ساراپشىلارى, ينۆەستورلار مەن قارجى ينستيتۋتتارى, سونداي-اق ۇكىمەت باسشىلارى بار 46 ەل, 56 پروفيلدىك قاۋىمداستىق, 41 ۋنيۆەرسيتەت قاتىسۋدا.
