جيىندا مادەنيەت جانە سپورت ۆيتسە-ءمينيسترى اقتوتى رايىمقۇلوۆا اتالعان باعدارلاما بويىنشا وتكەن جىلى اتقارىلعان جۇمىستارمەن تانىستىردى. «ەلىمىزدىڭ بارلىق وڭىرلەرىنە كيەلى جەرلەر بويىنشا ەتنومادەني ەكسپەديتسيالار ۇيىمداستىرىلىپ, «قازاقستاننىڭ جالپىۇلتتىق قاسيەتتى نىساندارى», «ەلىمىزدىڭ وڭىرلىك قاسيەتتى نىساندارى» كىتاپتارى جانە «قاسيەتتى قازاقستان» ەنتسيكلوپەديتسياسىنىڭ 1-ءشى تومى جارىق كوردى. بۇعان قوسا, تۇڭعىش رەت قازاقستاننىڭ كيەلى جەرلەرىنىڭ جالپىحالىقتىق تىزىمىنە ەنگەن كەيبىر نىسانداردىڭ (قوجا احمەت ياساۋي جانە قاراحان كەسەنەلەرى) 3D مودەلى جاسالىپ, قازاقستانداعى كيەلى جەرلەر تۋرالى 4 عىلىمي-كوپشىلىك دەرەكتى فيلم («كيەلى قازاقستان», «قوجا احمەت ياساۋي, ايشا ءبيبى ماۆزولەيلەرى», «التىن ادام», «نومادتار ەلى») ءتۇسىرىلدى», دەدى ۆيتسە-مينيستر. وتكەن جىلى ەلىمىزدەگى تاريحي ماڭىزى بار, ياساۋي, ارىستانباب كەسەنەلەرى, بەكەت اتا, سيسەم اتا قورىمدارىنىڭ نىساندارى, كونە تاراز, كونە تۇركىستان, وتىرار, ساۋران, سارايشىق قالاشىقتارى, اباي قۇنانباي ۇلى مەموريالدىق كەشەنى ءتارىزدى تانىمال كيەلى ورىندارعا رەستاۆراتسيالىق جۇمىستار جۇرگىزىلگەن. بۇل باعىتتا الداعى ۋاقىتتا دا ءبىرشاما جۇمىستار اتقارۋ جوسپارلانىپ وتىر.
«KazakhTourism» ۇلتتىق كومپانياسىنىڭ باسقارما توراعاسى راشيد كۇزەمباەۆ ەلدەگى ءتۋريزمنىڭ ۇلەسى وتكەن جىلى 20 پايىزعا ارتقانىن, وعان ەكسپو-2017 كورمەسىنىڭ تىكەلەي ىقپالى بولعانىن ايتادى. بيىلعى جىلى دا كورسەتكىش وسى شامادا بولماق. استانا قالاسىنىڭ 20 جىلدىعى مەرەيتويىنا تۋريستەردى تارتۋ ماقساتىندا كوپتەگەن ءىس-شارالار ۇيىمداستىرىلادى. سونداي-اق ر.كۇزەمباەۆ قازاقستاندىقتارعا جازعى دەمالىستا ورتالىق قازاقستاندا − بۋرابايعا, قارقارالىعا, باياناۋىل, ۇلىتاۋعا, شىعىستا − التايعا, زايسان, مارقاكول, راحمانوۆ بۇلاقتارىنا, الماتىدا − شارىن, كولساي, قايىڭدى, التىنەمەلگە, ارالداعى كەمەلەر ورنىنا, كاسپيگە, ۇستىرتكە, بالقاش پەن الاكولگە بارۋعا كەڭەس بەرەدى. ونىڭ ايتۋىنشا, تۋريستىك الەۋەتى بار ورىندار بويىنشا جۇمىستار جۇرگىزىلىپ جاتىر. «باتىس ەۋروپا − باتىس قىتاي» ءدالىزى بويىنداعى 93 قىزمەت كورسەتۋ ورتالىعىنىڭ قۇرىلىسىنا جەر تەلىمدەرى بولىنگەن. قىزمەت كورسەتۋ ستاندارتتارى ازىرلەنىپ, كەلەسى جىلى ۇلىتاۋ مەن تامعالىتاستا ۆيزيت-ورتالىقتار اشىلادى دەپ جوسپارلانۋدا.
ەركەجان ايتقازى,
«ەگەمەن قازاقستان»
