باگداساروۆتاردىڭ تسيركتەن اجىراماعان ايشىقتى تاعدىرى ناعاشى اتالارى نيكولاي يازەۆتەن باستاۋ الادى. ودان كەيىن ءوز اكەلەرى ميحايل باگداساروۆ تا جانۋارلاردى جاقسى كورگەنى سونشالىقتى, تۇبىندە اڭ ۇيرەتۋشى بولىپ شىعادى. تسيرك ساحناسىنىڭ قالتارىستارىندا ۋنيفورميستەرگە قولىنان كەلگەنشە جاناسا ءجۇرىپ, تالاي قىزىقتى باستان وتكەرگەن ميحايلگە كۇندەردىڭ كۇنىندە ارمانىنا ءبىر تابان جاقىنداۋدىڭ ءساتى تۇسەدى. مارگاريتا نازاروۆانىڭ رادا دەگەن جولبارىسى توردان شىعىپ كەتىپ, جايباراقات وتىرعان ءبىر ءارتىستىڭ گريمەر بولمەسىنەن ءبىر-اق شىعادى. قورقىنىشتان ءولىپ قالا جازداعان ارتىسكە كومەككە ۇمتىلعان ۋنيفورميستەردىڭ ىشىندە جۇرگەن باگداساروۆ وسى جولى ەرەكشە كوزگە تۇسسە كەرەك. جۇرەكجۇتقان جاس بالانىڭ قايسارلىعىنا ءتانتى بولعان نازاروۆا كەيىن ول 18 جاسقا تولعاندا اتتراكتسيونعا الۋعا ۋادە بەرەدى جانە سول ءسوزدىڭ ۇدەسىنەن شىعادى.
ودان كەيىن باگداساروۆتىڭ ءوزى دە بىردەن جولبارىستى جۋاسىتا الماعان. رەسەي حالىق ءارتىسى اتانعانعا دەيىن كوپ جۇمىس ىستەيدى. الدىمەن «زاباۆنىە وسليكي» نومىرىمەن دارالانىپ, ەسەكتىڭ ەستى حايۋان ەكەنىن دالەلدەيدى. ميحايل تەك 1979 جىلى عانا 18 ۋسسۋري جولبارىسىن جەتەكتەپ, قىزى كارينانىڭ كومەگىمەن تسيرك مانەجىندە سالتانات قۇرادى. «جولبارىستار شوۋىنا» ەكى جىلدان كەيىن ۇلى ارتۋر قوسىلادى.
مىنە, سول باگداساروۆتىڭ ۇلى مەن قىزى بۇگىنگە تورتكۇل دۇنيەگە تانىمال بولعان تسيركتىڭ بەل بالاسىنا اينالىپ وتىر.
الداعى كۇندەرى الماتىداعى قازاق مەملەكەتتىك تسيركىندە ماسكەۋدەگى نيكۋلين تسيركىمەن بىرگە ونەر كورسەتەتىن اپالى-ءىنىلى دارىندار الدىمەن قالاداعى بالالار ۇيلەرىنە, ارناۋلى ورتالىقتارعا بارىپ, كىشكەنتاي كورەرمەندەردىڭ كوڭىلىن اۋلاماق.
باگداساروۆتار بالالار ۇيلەرىنە تەك جولبارىستارىن عانا جەتەكتەپ اپارمايدى. بالاقايلارعا ارنالعان شەبەرلىك دارىستەرىندە جان-جانۋارلاردىڭ ءتىلىن ءتۇسىنۋدى, مىنەز-قۇلقىن يگەرۋدى ۇيرەتەدى.
جاھاندا جىرتقىشتارمەن جۇمىس ىستەيتىن ەر-ازاماتتار از ەمەس. ال 18 جاسىندا 18 ۋسسۋري جولبارىسىمەن بىرگە ۇلكەن تسيركتىڭ مانەجىنە شىققان كارينانىڭ ونەر جولى شىنىندا دا دارا.
ارتۋر مەن كارينانىڭ اكەسى قىرىق جىل بويى جولبارىس, ءىلبىس, ارىستاندى اۋىزدىقتاي وتىرىپ, قايتالانباس تريۋكتەر تۋدىرعان اۋلەت. 12 جاسىنان باستاپ اكەسىمەن بىرگە ەسەكتى بيلەتكەن ارتۋر دا, 16 جاسىنان جولبارىستى ىرقىنا باعىندىرعان كارينا دا ءالى كۇنگە دەيىن الەمدەگى ەڭ جاس اڭ ۇيرەتۋشىلەر ساناتىندا. اپالى-ءىنىلى باگداساروۆتار ءبىر جاعىنان تسيركتىڭ جان-جانۋارلارعا قاتىستى جانرىندا, حايۋانداردى ۇرماي-سوقپاي, ادامگەرشىلىكپەن جۇمىس ىستەيتىن جۇپ سانالادى.
ايناش ەسالي,
«ەگەمەن قازاقستان»
الماتى
