ەلباسى ءوز ۇسىنىسىن ءارى قاراي مۇشە مەملەكەتتەردىڭ ورتالىق بانكتەرىنىڭ باسشىلارى تالقىلاپ, ورتاق شەشىمگە كەلۋ تۋرالى ايتقان ەدى.
بۇگىندە ەلىمىزدىڭ سىرتقى ساياساتىنىڭ باسىم باعىتتارىنىڭ ءبىرى بولىپ سانالاتىن شىۇ-عا مۇشەلىك وزگە مەملەكەتتەرمەن قارىم-قاتىناستاردىڭ بارلىق سالالارى بويىنشا وڭىرلىك ءوزارا ءىس-قيمىلداردىڭ ماڭىزدى تەتىگىنە اينالىپ وتىر.
وسى ماسەلەگە بايلانىستى ۇلتتىق بانك توراعاسى دانيار اقىشەۆتىڭ پىكىرىن بىلدىك.
ول شىۇ-عا مۇشە مەملەكەتتەر ءۇشىن ەكونوميكالىق ىنتىماقتاستىقتى دامىتۋدىڭ ماڭىزدىلىعى كۇننەن-كۇنگە ارتىپ كەلە جاتقانىن اتاپ ءوتتى.
– ساۋدا-ساتتىق ىنتىماقتاستىقتا ۇلتتىق ۆاليۋتالاردى قولدانۋدى ءبىز بىرنەشە مارتە ەاەو اياسىندا تالقىلادىق, شىۇ-عا مۇشە مەملەكەتتەردىڭ ساۋدا-ساتتىق قاتىناستاردى دوللارسىزداندىرۋ باستاماسىنا قىزىعۋشىلىقتارى ارتا تۇسۋدە, – دەيدى د.اقىشەۆ.
ۇلتتىق بانك باسشىسى شىۇ-عا مۇشە مەملەكەتتەردىڭ 2020 جىلعا دەيىن كوپجاقتى ساۋدا-ەكونوميكالىق ىنتىماقتاستىق باعدارلاماسى اياسىندا جاھاندىق قارجى-ەكونوميكالىق داعدارىستىڭ سالدارىن ەڭسەرۋ بويىنشا شىۇ-عا مۇشە مەملەكەتتەردىڭ ۇلتتىق دەڭگەيدە قابىلدايتىن داعدارىسقا قارسى شارالار ىسكە اسىرىلىپ جاتقانىن, دامۋشى نارىقتارى بار ەلدەردىڭ الەمدىك نارىق كاپيتالىنا قولجەتىمدىلىگى تالاپتارى, سونداي-اق شىۇ-عا مۇشە مەملەكەتتەر اراسىندا ەسەپ ايىرىسۋ كەزىندە ۇلتتىق ۆاليۋتانى قولدانۋدى كەڭەيتۋ مۇمكىندىگى تالقىلانۋ ۇستىندە ەكەنىن اتاپ ءوتتى.
– ۇلتتىق ۆاليۋتامەن ءوزارا ەسەپ ايىرىسۋعا ءوتۋ ۇيىمعا قاتىسۋشى ەلدەر ەكونوميكاسىنىڭ قاۋىپسىزدىگى تۇرعىسىنان العاندا ءسوزسىز ءتيىمدى ءارى ماڭىزدى. ورتالىق بانكتەر جۇمىسىن وسى باعىتتا, ونىڭ ىشىندە ءتيىستى جول كارتالارىن ازىرلەۋ ارقىلى جالعاستىراتىن بولادى, – دەپ ءسوزىن تۇيىندەدى ۇلتتىق بانك باسشىسى.
سەرىك ابدىبەك,
«ەگەمەن قازاقستان»
