«قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك فۋنكتسيالاردى باسەكەلەس ورتاعا بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ازاماتتاردىڭ ءوزىن-ءوزى رەتتەۋدى دامىتۋ ارقىلى شەشىمدەر قابىلداۋ پروتسەسىنە قاتىسۋ مۇمكىندىكتەرىن كەڭەيتۋگە, مەملەكەتكە ءتان ەمەس فۋنكتسيالاردى باسەكەلەس ورتاعا جانە ءوزىن-ءوزى رەتتەيتىن ۇيىمدارعا بەرۋگە باعىتتالعان. اتالعان قۇجات «100 ناقتى قادام» ۇلت جوسپارىنىڭ 97-قادامىن ىسكە اسىرۋدى كوزدەيدى.
قۇجاتقا قاتىستى پىكىر بىلدىرگەن ءماجىلىس توراعاسى ن.نىعماتۋلين مەملەكەتتىك فۋنكتسيالاردى باسەكەلەس ورتاعا بەرۋگە تاعى ءبىر قادام جاسالعانىن اتاپ ءوتتى.
ء«بىز ەلباسىنىڭ ۇلت جوسپارىن ورىنداۋ جولىندا تاعى ءبىر ماڭىزدى قادام جاسادىق. پرەزيدەنت ايتقانداي, ەلىمىزدىڭ دامۋى بىرقاتار مەملەكەتتىك فۋنكتسيالاردى باسەكەلى ورتاعا بەرۋدى تالاپ ەتەدى. ونىڭ باستى ماقساتى – مەملەكەتتىك ورگانداردىڭ ۋاقىتىن ۇنەمدەپ, جۇمىس ساپاسىن كۇشەيتۋ. وسى ورايدا بۇگىن ماقۇلدانعان زاڭ جوباسىنىڭ ورنى دا ەرەكشە, ءرولى دە وتە زور», دەدى ن.نىعماتۋلين.
ءماجىلىس توراعاسى اتاپ وتكەندەي, ەڭ باستىسى – زاڭ جوباسى مەملەكەتتىك فۋنكتسيالاردى باسەكەلى ورتاعا بەرۋدىڭ ناقتى بەلگىلەنگەن ەرەجەلەرىن بەكىتەدى. ناتيجەسىندە بۇل ماسەلەدە بۇگىنگە دەيىن ورىن الىپ كەلگەن جۇيەسىزدىككە, رەتسىزدىككە جول بەرىلمەيدى.
پالاتانىڭ وتىرىسىندا زاڭ جوباسىن ۇلتتىق ەكونوميكا ءمينيسترى تيمۋر سۇلەيمەنوۆ تانىستىردى. ونىڭ ايتۋىنشا قۇجاتتى ازىرلەۋ بارىسىندا ەىدۇ ەلدەرىنىڭ ەڭ ۇزدىك تاجريبەلەرى زەردەلەنگەن.
«زاڭ جوباسىنىڭ قۇرىلىمى 2016 جىلى دەپۋتاتتاردىڭ قاتىسۋىمەن, پرەمەر-مينيستر ورىنباسارىنىڭ باسشىلىعىمەن وتكەن ۇكىمەتتىڭ جانىنداعى ارنايى كوميسسيا وتىرىسىندا ماقۇلدانعان باسەكەلەس ورتاعا فۋنكتسيالاردى بەرۋدىڭ بازالىق قاعيداتتارىنىڭ نەگىزىندە قالىپتاستىرىلعان», دەدى ت.سۇلەيمەنوۆ.
ۆەدومستۆو باسشىسىنىڭ سوزىنە قاراعاندا, زاڭ جوباسىندا فۋنكتسيالاردىڭ باسەكەلى بازالىق تاسىلدەرىن بەكىتۋ, فۋنكتسيالاردى ۇكىمەتتىك ەمەس سەكتورعا بەرۋ كوزدەلگەن.
«تۇزەتۋلەردىڭ ءبىرىنشى جانە نەگىزگى بولىگى – بازالىق تاسىلدەر. 2016 جىلى جۇرگىزىلگەن ساراپتاما مەملەكەتتىك ورگانداردىڭ فۋنكتسيالارىن باسەكەلى ورتاعا بەرۋ ولشەمشارتتارىنىڭ جوق ەكەنىن جانە ونىڭ جۇيەسىز جۇرگىزىلەتىنىن انىقتادى. وسىعان بايلانىستى زاڭ جوباسىندا مەملەكەتتىك ورگانداردىڭ فۋنتسيالارىن باسەكەلى ورتاعا بەرۋدىڭ ماقساتتارى, قاعيداتتارى جانە تاسىلدەرى; فۋنكتسيالاردى ىرىكتەۋ مەن بەرۋدىڭ ولشەمشارتتارى, الگوريتمى; فۋنكتسيالاردىڭ جۇزەگە اسىرىلۋ ساپاسىنىڭ مونيتورينگى; ۇكىمەتتىڭ جانە مەملەكەتتىك ورگانداردىڭ وكىلەتتىكتەرى, «اتامەكەن» ۇكپ ءرولى; فۋنكتسيالاردى ورىنداۋشىلاردىڭ قۇقىقتارى مەن مىندەتتەرى; ۇكىمەت جانىنان ارنايى قۇرىلعان كوميسسيانىڭ فۋنكتسيالارى ايقىندالادى», دەپ اتاپ ءوتتى مينيستر.
سونىمەن قاتار جەكەلەگەن فۋنكتسيالاردى باسەكەلى ورتاعا بەرۋ قاراستىرىلمايدى. ولاردىڭ قاتارىندا ۇلتتىق, اقپاراتتىق قاۋىپسىزدىكتى قورعاۋعا باعىتتالعان, قورعانىس, قوعامدىق ءتارتىپتى قورعاۋعا ارنالعان فۋنكتسيالار كىرەدى.
ءمينيستردىڭ ايتۋىنشا, زاڭ جوباسىندا فۋنكتسيالاردى باسەكەلى ورتاعا بەرۋدىڭ بەس ءتاسىلى ايقىندالعان, ولار تولىق نەمەسە ءىشىنارا بەرۋدى كوزدەيدى.
«تولىق بەرۋ كەزىندە فۋنكتسيا تەك فۋنكتسيالاردى پايدالانۋشىلاردىڭ ەسەبىنەن جۇزەگە اسىرىلادى نە تولىعىمەن ءوز-ءوزىن رەتتەيتىن ۇيىمعا وتەدى. بۇل جاعدايدا فۋنكتسيا زاڭنامالىق تۇردە مەملەكەتتىك ورگاننىڭ قۇزىرەتىنەن شىعارىلىپ, باسەكەلى ورتاعا بەرىلەدى. ءىشىنارا بەرۋگە قازىرگى ۋاقىتتا كەڭىنەن قولدانىلاتىن اۋتسورسينگ, مەملەكەتتىك الەۋمەتتىك تاپسىرىس جانە مەملەكەتتىك تاپسىرما ارقىلى فۋنكتسيالاردى ىسكە اسىرۋعا بەرۋ تاسىلدەرى جاتقىزىلعان», دەپ ءتۇسىندىردى ت.سۇلەيمەنوۆ.
اتالعان تاسىلدەر قولدانىستاعى زاڭنامامەن رەتتەلگەندىكتەن, زاڭ جوباسىندا مەملەكەتتىك ساتىپ الۋ, مەملەكەتتىك الەۋمەتتىك تاپسىرىس تۋرالى زاڭدارعا جانە قارجى كودەكسىنە سىلتەمە نورمالار كوزدەلگەن. وسى زاڭ جوباسى ارقىلى 3 كودەكسكە جانە 4 زاڭعا وزگەرىستەر مەن تولىقتىرۋلار ەنگىزىلەدى دەپ كۇتىلۋدە.
زاڭ جوباسىندا مەملەكەتتىك ورگاندارعا مونيتورينگىنى جۇزەگە اسىرۋ مەن باعالاۋدى جۇرگىزۋگە بايلانىستى ءتيىستى وكىلەتتىكتەر بەرىلگەن. مونيتورينگ ناتيجەسى قاناعاتتاندىرىلماسا, فۋنكتسيانى قايتارىپ الۋ تۋرالى ماسەلە كوميسسياعا شىعارىلادى جانە قاجەت بولعان جاعدايدا فۋنكتسيا زاڭنامالىق تۇردە مەملەكەتتىك ورگانعا قايتارىلادى.
سونداي-اق وتىرىستا دەپۋتاتتار قازاقستان ۇكىمەتى مەن بىرىككەن ۇلتتار ۇيىمىنىڭ ازىق-ت ۇلىك جانە اۋىل شارۋاشىلىعى ۇيىمى اراسىنداعى فاو-نىڭ بايلانىس جانە ارىپتەستىك جونىندەگى بيۋروسىن قۇرۋ تۋرالى كەلىسىمدى راتيفيكاتسيالاۋ تۋرالى زاڭ جوباسىن ماقۇلدادى.
حالىقارالىق قۇجات تۋرالى پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى ومىرزاق شوكەەۆ بايانداما جاسادى. ونىڭ سوزىنە قاراعاندا, كەلىسىمدە قازاقستان – فاو ارىپتەستىك باعدارلاماسىن ودان ءارى دامىتۋ ءۇشىن بەس باسىم باعىت بەلگىلەنگەن. اتاپ ايتقاندا, تاعام ونىمدەرىنىڭ قاۋىپسىزدىگى جانە ەكولوگيالىق جاعىنان تازا تاعام ونىمدەرىن ءوندىرۋ; ۆەتەريناريا جانە مال شارۋاشىلىعى, جايىلىمداردى جانە فيتوسانيتاريانى باسقارۋ; تابيعي رەسۋرستاردى ورنىقتى باسقارۋ (سۋ, جەر جانە ورمان رەسۋرستارىن باسقارۋ); بالىق اۋلاۋ جانە اكۆاداقىل; اۋىل شارۋاشىلىعى ستاتيستيكاسى, دەرەكتەردى جيناۋ جانە ولاردى وڭدەۋ ءۇشىن اقپاراتتىق تەحنولوگيالار.
«قازاقستان ۇكىمەتى بايلانىس جانە سەرىكتەستىك بيۋروسىنىڭ فورماتىندا فاو وكىلدىگىن اشۋدى جوسپارلاپ وتىر. الەمدە مۇنداي بيۋرو تەك 5 ەلدە بار. وسى رەتتە كەلەشەكتە جوبالار ءساتتى ىسكە اسىرىلسا, بيۋرونى سۋبايماقتىق بولىمشەگە اينالدىرۋدىڭ مۇمكىندىگى مول. ۋاكىلەتتى مەملەكەتتىك ورگانداردىڭ جاقىندىعىن ەسكەرىپ, اگروونەركاسىپتىك كەشەن سالاسىندا كۇندەلىكتى تىعىز جۇمىس جۇرگىزۋ ءۇشىن بيۋرو استانا قالاسىندا ورنالاسادى», دەدى ءو.شوكەەۆ.
بيۋرونىڭ باسشىسىن فاو قازاقستان ۇكىمەتىمەن كەلىسە وتىرىپ, حالىقارالىق نەگىزدە تاعايىندايدى. باسشىنىڭ ۋاكىلەتتى ورىنباسارى قازاقستان رەزيدەنتى بولادى. ۇكىمەتتىڭ بيۋروعا قوساتىن ۇلەسى – تەگىن بەرىلەتىن ءتيىستى ءۇي-جاي, وفيستىك جابدىق جانە وپەراتسيالىق شىعىندارعا ارنالعان 300 مىڭ دوللار كولەمىندەگى جىلدىق جارنا. بۇل شىعىندار اۋىل شارۋاشىلىعى مينيسترلىگىنىڭ جانە سىرتقى ىستەر مينيسترلىگىنىڭ 2019-2021 جىلدارعا ارنالعان بيۋدجەتىندە كوزدەلگەن.
جالپى وتىرىستا ءماجىلىس «ستاندارتتاۋ تۋرالى» جانە وعان ىلەسپە زاڭ جوبالارىن, سونىمەن بىرگە ء«بىلىم تۋرالى» زاڭ جوباسىن ەكىنشى وقىلىمدا ماقۇلداپ, بىرقاتار جاڭا زاڭ جوبالارىن جۇمىسقا الدى.
وتىرىس سوڭىندا ءماجىلىس دەپۋتاتتارى ناتاليا جۇمادىلداەۆا, سۆەتلانا بىچكوۆا, مەيرام پىشەمباەۆ, تۇرعىن سىزدىقوۆ, يرينا سميرنوۆا, ەكاتەرينا نيكيتينسكايا ورتالىق مەملەكەتتىك ورگان باسشىلارىنىڭ اتىنا دەپۋتاتتىق ساۋالدار جولدادى.
اباي اسانكەلدى ۇلى,
«ەگەمەن قازاقستان»
