كورمەنىڭ اشىلۋىنا مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆ جانە شەتەلدىك سۋرەتشىلەر قاتىستى.
جوباعا تاڭدالىپ الىنعان الەمنىڭ 20 قىلقالام شەبەرى استانانىڭ ايشىقتى, ەڭسەلى ورىندارىن بەينەلەنگەن. سونىڭ ىشىندە: ەركە ەسىلدىڭ جاعاسى, نۇرجول جەلەك جولى, ەلوردانىڭ سيمۆولى «بايتەرەك» مونۋمەنتى جانە ازىرەت سۇلتان مەشىتى بار.
اشىلۋ سالتاناتىندا كەلگەن كورەرمەندەر جادىگەرلەردى تاماشالاپ, اڭ-تاڭ بولىپ جاتقاندا يتاليادان كەلگەن سۋرەتشى دجوۆانني توماسسي فەررونيگە ءسوز كەزەگى ءتيىپ: «قىزدارى كەربەز, جىگىتتەرى جومارت, سۇلۋ جاراتىلعان ۇلتتى سۋرەتكە سالماۋدىڭ ءوزى كۇنا دەپ بىلەمىن!» دەگەندە جيىلعان كوپشىلىك قول شاپالاقتاپ وعان ءوز ريزاشىلىقتارىن ءبىلدىردى.
قىلقالام شەبەرلەرى – استانانىڭ عيماراتتارىن, تۇنگى بەينەسىن قاعاز بەتىنە تۇسىرسە, بىرەۋى شاھار تۇرعىندارىنىڭ ءومىر تىرشىلىگىن كورسەتكىسى كەلگەن.
ءتىپتى بازبىرەۋلەرى ۇلتتىق ۇلگىدە كيىنگەن قىزدار مەن قىراندى قولىنا قوندىرعان ەرلەردى نىسانا ەتىپ العان.
اتالمىش ونەر باتىستىق جانە شىعىستىق ستيل بولىپ بولىنەتىندىكتەن, شىعىستىق بەينەلەۋشىلەر كوك جانە قىزىل ءتۇستى ءجيى قولدانسا, باتىستىقتار قوڭىر مەن قىزىل ءتۇستى پايدالانادى. ءدال وسى ءۇردىس كورمە زالىندا كورىنىس تاپقان.
كارتينا سالۋ – باسقا ونەر تۇرلەرى سياقتى ەركىن ويلاۋدى قاجەت ەتەتىندىكتەن, ابستراكتسيالى سۋرەت كەسكىندەۋ شەبەرى وڭتۇستىككورەيالىق بەۋنگسون سۋ كۇننىڭ شىعۋى مەن باتۋىن كىندىك قالانىڭ سيمۆوليكالىق ماڭىزىنا بالاي وتىرىپ, وزىندىك ءستيلدى ەرەكشە ايشىقتاعان.
ەلىمىزدىڭ جۇرەگى, ءارى ەڭ جاس قالاسىنا ارنالعان سۋرەت كورمەسى 20 كۇن بويى ۇلتتىق مۋزەيدە كورەرمەن نازارىنا ۇسىنىلىپ, سودان سوڭ مۋزەي قورىنا سىي رەتىندە بەرىلمەك.
ازامات ماۋلەن ۇلى
