كەزدەسۋ بارىسىندا مەملەكەت باسشىسى قىتاي حالىق رەسپۋبليكاسى قازاقستاننىڭ ماڭىزدى ستراتەگيالىق ارىپتەستەرىنىڭ ءبىرى بولىپ سانالاتىنىنا توقتالىپ, ەكى ەل اراسىندا تاريحي تۇرعىدان دوستىق جانە سەنىمدى قارىم-قاتىناس قالىپتاسقانىن ايتتى.
– قىتاي قازاقستانعا تىكەلەي ينۆەستيتسيا قۇيۋ كولەمى جونىنەن 4-ورىندى يەلەنەدى. 2017 جىلى ەكى ەل اراسىنداعى تاۋار اينالىمى 10,5 ميلليارد دوللار بولدى. بۇل جەردەگى ءوسىم – 33 پايىز, – دەدى قازاقستان پرەزيدەنتى.
نۇرسۇلتان نازارباەۆ قازاقستاننىڭ مۇناي-گاز, حيميا جانە تاماق ونەركاسىبىندە, سونداي-اق بانك, ماشينا جاساۋ, لوگيستيكا جانە باسقا دا سالالارىندا قىتاي كاپيتالىنىڭ قاتىسى بار 1200 كاسىپورىن جۇمىس ىستەيتىنىن اتاپ ءوتتى.
– بۇگىن ەكى ەلدىڭ 300-دەن استام بيزنەس وكىلدەرى قاتىسقان ىسكەرلىك كەڭەس ءوتتى. 13 ميلليارد دوللاردان استام قارجى كولەمىندەگى 40-قا جۋىق كوممەرتسيالىق قۇجاتقا قول قويىلدى. سونىمەن قاتار, يندۋستريالاندىرۋ جانە ينۆەستيتسيا سالالارىنداعى ىنتىماقتاستىق اياسىندا جالپى سوماسى 28 ميلليارد دوللار كولەمىندەگى 51 جوبانىڭ ءتىزىمى جاسالدى, – دەدى قازاقستان پرەزيدەنتى.
مەملەكەت باسشىسى كەزدەسۋگە قاتىسىپ وتىرعان كاسىپكەرلەرگە قازاقستاننىڭ گەوساياسي تۇرعىدان ۇتىمدى ورنالاسقانى جانە وسى فاكتورعا بايلانىستى ونىڭ بيزنەس جاساۋداعى ارتىقشىلىعى جونىندە ايتتى.
– قازاقستان – 180 ميلليوننان استام تۇرعىنى بار, كەدەندىك شەكاراسى جوق ەۋرازيالىق ەكونوميكالىق وداقتىڭ مۇشەسى. قازاقستان اۋماعى ارقىلى قىتاي مەن باسقا دا ازيا ەلدەرىن رەسەي, كاسپي تەڭىزى, قارا تەڭىز, سونداي-اق يران جانە تۇركيا ارقىلى ەۋروپامەن بايلانىستىراتىن 5 تەمىر جول جانە 6 حالىقارالىق اۆتوموبيل جولى وتەدى. بۇل جۇكتى قىتايدان قازاقستان ارقىلى ەۋروپاعا جانە كەرى قاراي 15 كۇندە جەتكىزۋگە مۇمكىندىك بەرەدى. ال, جۇك تەڭىز جولىمەن جەتكىزىلەتىن بولسا, 2-3 ەسە كوپ ۋاقىت كەتەر ەدى, – دەدى نۇرسۇلتان نازارباەۆ.
سونىمەن قاتار, قازاقستان پرەزيدەنتى كەزدەسۋگە قاتىسۋشىلاردىڭ نازارىن ينۆەستيتسيالىق تارتىمدىلىقتى ارتتىرۋ جانە بيزنەس ورتاسىن جاقسارتۋ ءۇشىن قولدانىلىپ جاتقان شارالارعا, اتاپ ايتقاندا, كاسىپكەرلىك سالاسىنداعى زاڭنامانىڭ جەتىلدىرە تۇسكەنىنە, شەتەلدىك ينۆەستورلار كەڭەسىنىڭ, «قازاق ينۆەست» جانە «قازاق ەكسپورت» ۇلتتىق كومپانيالارىنىڭ قۇرىلعانىنا, شەتەلدەن جۇمىس كۇشىن تارتۋ جانە جەر قويناۋىن پايدالانۋ ءۇشىن ليتسەنزيا الۋ مەن كەلىسىمدەر جاساۋ ءراسىمىنىڭ جەڭىلدەتىلگەنىنە, سونداي-اق 11 ارنايى ەكونوميكالىق جانە 24 يندۋستريالدى ايماقتىڭ جۇمىسىنا قاتىسۋشىلار ءۇشىن سالىق جەڭىلدىكتەرى مەن ارتىقشىلىقتار بەلگىلەنىپ وتىرعانىنا اۋداردى.
– ءبىزدىڭ ەلدە اگروونەركاسىپ كەشەنىن دامىتۋ باعدارلاماسى جانە «تسيفرلىق قازاقستان» ارنايى مەملەكەتتىك باعدارلاماسى جۇزەگە اسىرىلۋدا. تۋريستىك سالانى دامىتۋ تۇجىرىمداماسى قابىلداندى. ءبىز ءىرى كومپانيالارىمىزدىڭ گونكونگ جانە شانحاي بيرجا الاڭدارىنداعى IPO-عا شىعۋ مۇمكىندىكتەرىن قاراستىرۋدامىز. «ەكسپو» كورمەسىنىڭ بازاسىندا «استانا» حالىقارالىق قارجى ورتالىعى جۇمىسىن باستادى. ول «جاسىل» قارجى قۇرالىن, يسلامدىق جانە يننوۆاتسيالىق قارجى قۇرالدارىن دامىتاتىن وڭىرلىك ورتالىققا اينالۋعا ءتيىس. قىتاي كومپانيالارىن وسى اۋقىمدى جوبالاردى جۇزەگە اسىرۋ ىسىنە اتسالىسۋعا شاقىرامىن, – دەدى نۇرسۇلتان نازارباەۆ.
كەزدەسۋ بارىسىندا قىتايدىڭ جەتەكشى كومپانيالارىنىڭ وكىلدەرى قازاقستاندىق ارىپتەستەرىمەن بيزنەستەگى بايلانىستارىن ورناتۋعا زور مۇددەلىلىك تانىتتى.
كەزدەسۋ سوڭىندا مەملەكەت باسشىسى وسىنداي باسقوسۋلار ەكى ەل اراسىنىڭ جاقىنداي تۇسۋىنە جانە ءوزارا ءتيىمدى ارىپتەستىكتىڭ نىعايۋىنا سەپتىگىن تيگىزەتىنىن ايتتى.
