ورتالىقتىڭ نەگىزگى مىندەتى ۇەۇ قۇرۋ كەزىندە كومەكتەسۋ, ادىستەمەلىك كومەك كورسەتۋ جانە ۇسىنىلعان يدەيالاردى قولداۋ.
- ءبىز وسى باعىتتا وڭىردە قانداي اۋقىمدى جۇمىستار جۇرگىزىلگەنىن كورىپ وتىرمىز. بىزگە ىسكە اسىرىلىپ جاتقان جوبالاردى تانىستىردى. بۇگىنگى كۇنى ازاماتتىق قوعام دەپ كوممەرتسيالىق ەمەس ۇيىمداردىڭ عانا جاسايتىن جۇمىسىن ايتۋعا بولمايدى. بۇل تۇرعىنداردىڭ بارلىق مۇددەلى ساناتتارىنىڭ جۇمىسى. بۇل ءۇشىن ۇەۇ قۇرۋدىڭ قاجەتتىلىگى جوق, - دەپ ەسەپتەيدى دارحان قالەتاەۆ. – رەسپۋبليكا بويىنشا 20 مىڭداي ۇەۇ تىركەلگەن, ونىڭ 8 مىڭى جۇمىس ىستەمەيدى.
اتىراۋ وبلىسىندا رەسمي تىركەلگەن 500 ۇەۇ-نىڭ 100-گە جۋىعى عانا بەلسەندى.
- بۇل جەردە جۇمىس جاسامايتىنداردى نە ىستەۋ كەرەك دەگەن سۇراق تۋىندايدى. ولاردىڭ قاجەتى بار ما؟ ءبىز ۇەۇ-نىڭ قايتا تىركەۋدەن ءوتۋىن تالاپ ەتەمىز بە, الدە ارەكەتسىز ۇيىمداردى جويۋدىڭ باسقا جولدارىن تابامىز با؟ ويلاستىرۋ قاجەت, -دەپ اتاپ ءوتتى دارحان قالەتاەۆ. – قازىرگى تاڭدا ۇەۇ-دىڭ سانىنا ەمەس, ولار كورسەتەتىن قىزمەتتىڭ ساپاسىنا باسا نازار اۋدارۋ قاجەت. جىل سايىن مەملەكەتتىك تاپسىرىستى جۇزەگە اسىرۋ ءۇشىن بيۋدجەت 19 ملرد تەڭگەدەن استام قارجى بولەدى. تاعى 5 ملرد تەڭگەدەن استام شەتەلدەن قارجىلاندىرىلادى. الەۋمەتتىك تاپسىرىس قانشالىقتى ساپالى ورىندالۋدا؟
اتىراۋ وبلىسىنىڭ اكىمى نۇرلان نوعاەۆ وڭىردە ۇەۇ مەن مەملەكەتتىك مەكەمەلەردىڭ اراسىنداعى ءوزارا ءىس-قيمىل بويىنشا ناتيجەلى جۇمىستار جاسالعانىن ايتىپ ءوتتى. ءتۇرلى باعىتتاردا ىسكە اسىرىلاتىن جوبالار قوعامدى الاڭداتاتىن وزەكتى ماسەلەلەردى بىرلەسىپ شەشۋگە مۇمكىندىك بەرەدى.
- ءسىز وڭىردە قانداي جۇمىستار جۇرگىزىلىپ جاتقانىن كوردىڭىز. ءبىز ءوز تاراپىمىزدان مەملەكەت باسشىسىنىڭ ازاماتتىق قوعام ينستيتۋتتارىن ودان ءارى جەتىلدىرۋ جونىندەگى تاپسىرماسىن ورىنداي وتىرىپ, ءوزارا ءىس-قيمىل جاساۋدىڭ جاڭا جولدارىن ىزدەستىرۋدى جالعاستىراتىن بولامىز, - دەدى نۇرلان نوعاەۆ.
- تۇرعىنداردىڭ, قوعامنىڭ پروبلەمالىق ماسەلەلەرىن تەرەڭ ءتۇسىنۋ ءۇشىن «اتىراۋ تسيفرلىق قابىلداۋ» ءموبيلدى قوسىمشاسى مەن Telegram «اتىراۋ وبلىسىنىڭ اكىمدىگى» چات-ارناسىن ىسكە قوستىق. اقپاراتتىق تەحنولوگيالار ارقىلى ازاماتتار وزدەرىن تولعاندىراتىن سۇراقتاردى قويىپ, جەدەل جاۋاپ الا الادى. بۇل جۇيە التى ايدىڭ ۇستىندە جۇمىس ىستەپ, تيىمدىلىگىن كورسەتتى. جۇمىس جالعاسادى.
ءوڭىردىڭ ۇەۇ وكىلدەرىمەن وتكەن كەڭەستە قازاقستاننىڭ ازاماتتىق اليانسىنىڭ پرەزيدەنتى اسىلبەك قوجاحمەتوۆ تە پىكىرىن ورتاعا سالدى.
- بۇگىندە ازاماتتىق سەكتوردىڭ ماعىناسى كەڭ. بۇل كاسىپوداقتار دا, ءدىني سەكتور – مەشىتتەر مەن شىركەۋلەر دە. جوعارى وقۋ ورىندارى, زياتكەرلىك بايلىقتىڭ شوعىرلانعان جەرى. ولار دا ۇكىمەتتىك ەمەس سەكتوردىڭ وسى قۋاتتى قوزعالىسىنا تارتىلۋى ءتيىس. ەگەر باتىس ەلدەردى الىپ قاراساق, مىسالى گوللانديادا ەل تۇرعىندارىنىڭ 15%-ى ۇكىمەتتىك ەمەس سەكتوردا جۇمىس ىستەيدى, قازاقستاندا بار بولعانى 0,3%. ءبىزدىڭ بۇگىنگى مىندەتىمىز ۇەۇ مەن مەملەكەتتىك ورگانداردىڭ اراسىنداعى جۇيەلى جۇمىستى جولعا قويۋ. اتىراۋعا ساپارىمىز وڭىرلىك ۇەۇ وكىلدەرىنىڭ ۇسىنىستارىن تىڭداۋدىڭ تاعى ءبىر مۇمكىندىگى, -دەدى اسىلبەك قوجاحمەتوۆ.
مينيستر قالەتاەۆتىڭ ايتۋىنشا, ازاماتتىق اليانس مەملەكەت پەن قوعام ينستيتۋتتارىنىڭ اراسىندا ازاماتتىق ديالوگ الاڭىن ۇيىمداستىرۋ بويىنشا نەگىزگى ارىپتەستەردىڭ ءبىرى رەتىندە سانالۋدا. مينيستر ازاماتتىق قوعامدى دامىتۋ سالاسىندا زاڭنامانى جەتىلدىرۋدە جانە ۇكىمەتتىك ەمەس ۇيىمدار مەن مەملەكەتتىڭ ءوزارا ءىس-قيمىلىن دامىتۋ جونىندەگى ۇلتتىق جوسپاردى ىسكە اسىرۋدا ازاماتتىق اليانستىڭ الەۋەتىن پايدالانۋدى ۇسىندى. ونىڭ پىكىرىنشە, ازاماتتىق اليانس قازاقستاندىق ۇەۇ-دىڭ ورنىقتىلىعى مەن باسەكەگە قابىلەتتىلىگىن ارتتىرۋ, جاڭا بىلىمگە وقىتۋ ماسەلەلەرىمەن اينالىساتىن, ۇەۇ ءۇشىن رەسپۋبليكالىق ادىستەمەلىك ورتالىق بولا الادى.
سونىمەن قاتار مينيستر ازاماتتىق اليانستى «رۋحاني جاڭعىرۋ» باعدارلاماسىن ىرگەرىلەتۋ جونىندەگى اعارتۋشىلىق جوبا مەن جاڭا الەۋمەتتىك باستامالار ازىرلەۋ پروتسەسىنە قوسىلۋعا, مەملەكەتىك فۋنكتسيالاردى باسەكەلەس ورتاعا بەرۋ جۇمىسىنا قاتىسۋعا شاقىردى.
