ءداۋىر داۋىسى

جاس اقىن ءارى اۋدارماشى, رەسپۋبليكالىق قوعامدىق-ساياسي «پرەزيدەنت جانە حالىق» گازەتىنىڭ ءتىلشىسى باۋىرجان سەگىزباەۆ قۇراس­تىرعان «كەمەڭگەر كەلبەتى» اتتى انتولو­گيا­لىق جيناقتىڭ تۇساۋكەسەر ءراسىمى وتكىزىلدى. وندا ەلباسى نۇرسۇلتان نازارباەۆتىڭ ەلى مەن حالقىنا قىزمەتى جان-جاقتى اشىپ كورسەتىلگەن. قازاقستان تاۋەلسىزدىگىنە 20 جىل تولۋى مەرەيلى مەرەكەسى قارساڭىندا كوپتەگەن جاڭا ءوندىرىس ورىندارى مەن عيماراتتار بوي كوتە­رۋ­دە. مۇنىڭ بارلىعى دا ەلباسىنىڭ سارابدال ساياساتىنىڭ ارقاسىندا جۇزەگە اسىپ جات­قان شارۋالار. «كەمەڭگەر كەلبەتى» كىتابى ار­قىلى تاۋەلسىزدىك پەن ەلباسىنىڭ ەلىمىز­دىڭ وركەندەۋىنە قوسقان سۇبەلى ۇلەسىن جان-جاقتى اشىپ كورسەتۋ ماقساتى قويىلعان. ول ءساتتى شىققان. ب.سەگىزباەۆ ءوزىنىڭ بۇل جي­نا­عىنا ءار ءتۇرلى باسىلىمداردا جارىق كورگەن قادىر مىرزا ءالي مەن تۇمانباي مولدا­عا­ليەۆ باستاعان ارقالى اقىنداردان باستاپ جاس اقىن جامبىل دۇيسەنوۆتىڭ ولەڭدەرىن كىرگىزىپتى. سونداي-اق جيناقتا قازاقستان رەس­­پۋب­لي­كاسىنىڭ تۇڭعىش پرەزيدەنتى, ۇلت كوش­باس­شىسى نۇرسۇلتان ءابىش ۇلى نازارباەۆ جاي­لى ەلگە تانىمال سازگەرلەردىڭ, كۇي­شى­لەر­­دىڭ نوتالارى دا توپتاستىرىلىپ وتىر ەكەن. انتولوگيالىق جيناق جاستاردى پاتريوتيزمگە, وتانسۇيگىشتىككە تاربيەلەيدى. كىتاپ كوپشىلىك وقىرمانعا ارنالعانىمەن, اسىرەسە, ونىڭ مەكتەپ وقۋشىلارىنا دا بەرەرى مول. قازاقستان مەن ەلباسى ەگىز ۇعىم بولىپ كەتكەندىكتەن, اعا ۇرپاقتىڭ كورنەكتى وكىلدەرى­نىڭ پىكىرلەرى دە قوسا بەرىلىپتى. جيناق ەكى تاراۋدان تۇرادى. «جۇرەك­جار­دى جىر» دەگەن ءبىرىنشى تاراۋعا, اتى ايتىپ تۇرعانداي, جىر مەن ولەڭدەر جانە پوەمالار توپتاستىرىلسا, «اۋەلەگەن ءان – كۇمبىرلەگەن كۇي» اتتى ەكىنشى تاراۋدا ەلباسىنىڭ كوركەم كەلبەتى اسەم ءان مەن كۇمبىرلەگەن كۇي ارقىلى ارلەنگەن. جيناق وسىنىسىمەن دە قۇندى سانالادى. مۇنى جاستاردىڭ ەل تاۋەل­سىز­دىگىنىڭ 20 جىلدىعىنا سىيلاعان تارتۋى دەپ تە قاراۋعا بولار. «جاس وتان» جاستار قاناتىنىڭ اتقارۋ­شى حاتشىسى نۇرلان وتەشەۆ تۇساۋكەسەر ءرا­سىمىندە ءوزىنىڭ وزەكجاردى پىكىرىن ورتاعا سال­دى. «ءبىز ەلباسىن ماقتامايمىز, ءبىز ونىمەن ماقتانامىز. قازىرگى كەزدە وسىنداي كىتاپتار اۋاداي قاجەت. تەك جاستارعا عانا ەمەس, مەكتەپ وقۋشىلارىنا دا ءىرى تاريحي تۇلعا تۋرا­لى كوپتەگەن ماعلۇماتتار بەرۋىمىز قاجەت», دەدى ن.وتەشەۆ. كىتاپتىڭ تۇساۋكەسەرىنە ارنايى كەلىپ قا­تىسقان جاستار جاعى بۇل لەبىزگە كادىمگىدەي جەلپىنىپ قالدى. وسى رەتتە نۇرلان وتەشەۆ ديپلوممەن اۋىلعا كەتكەن جاستاردىڭ استانادا باسىن قوسىپ, ارنايى ماراپاتتا­عان­دا­رىن ايتتى. ول سول جاستاردىڭ 90 پايىزىنان استامى مۇعالىم ەكەنىن, ەگەر وسى كىتاپتى ولارعا ادىسدەمەلىك قۇرال رەتىندە تاپسىرسا ورىندى بولار دەگەن تىلەگىن دە ەسكەرتە كەتتى. اتالعان شارانىڭ وتۋىنە جۋرناليستەر وداعىنىڭ استانا قالالىق بولىمشەسى مەن «جاس وتان» جاستار قاناتى مۇرىندىق بول­عان­دىعىن ايتا كەتۋ كەرەك. 300 بەتتەن تۇ­را­تىن كىتاپتىڭ جالپى تارالىمى 5 مىڭ دانا. اسقار تۇراپباي ۇلى.