- ەلباسى بۇكىل دۇنيە ءجۇزىنىڭ قايراتكەرلەر قاتىسقان ەكونوميكالىق فورۋمدا شىمكەنت قالاسىن ميلليوندى قالا دەپ جاريالادى. ال شىمكەنتتىكتەر رەسپۋبليكالىق ستاتۋس يەلەنۋ باستاماسىن وتە قىزۋ قارقىنمەن قولدادى. 2017 جىلدىڭ قورىتىندىسىنا سايكەس وبلىس ورتالىعىنىڭ تۇرعىندارى 39 مىڭ ادامعا ءوستى. مۇنىڭ 18 مىڭى ىشكى كوشى-قون ەسەبىنەن جۇزەگە اسقان. ال قالانىڭ ميلليونىنشى تۇرعىنى مامىر ايىندا دۇنيەگە كەلگەن بولاتىن. ول ازاماتشا - ەلامانوۆا ايسۇلۋ جاس وتباسىنىڭ ءبىرىنشى پەرزەنتى. كىشكەنتاي نارەستە دەنى ساۋ, ەلىنە ەلەۋلى, حالقىنا قالاۋلى قىز بولىپ ءوسىپ, ەلدىڭ ناعىز پاتريوت ازاماتشاسى بولسىن!,-دەدى وبلىس اكىمى.
ويلاماعان جەردەن تۇلا بويى تۇڭعىشتارىنىڭ ارقاسىندا پاتەرلى بولعان جاس اتا-انا سامات ەلامانوۆ پەن ايجان احايبەكوۆا قۋانىشتارىمەن ءبولىسىپ, ريزاشىلىقتارىن ءبىلدىردى.
– بىزگە ەڭ ءبىرىنشى ازاماتتىق حال اكتىلەردى تىركەۋ ورنىنان حابارلاستى. ولار قىزىمىزدىڭ اتى-ءجونىن, سالماعىن, كۋالىگىن سۇرادى. باسىندا «قىزىمىز ميلليونىنشى تۇرعىن بولا قويا ما ەكەن؟» دەپ سەنبەي, ونشا ۇمىتتەنە قويمادىق. بىراق, كەشە اكىمدىك قىزمەتكەرلەرى ءبىزدىڭ قىزىمىزدى ميلليونىنشى قالا تۇرعىنى بولۋىمەن قۇتتىقتادى. شىنى كەرەك, سوندا نە ىستەرىمىزدى بىلمەي ابدىراپ قالدىق, -دەيدى وتاعاسى سامات ەلامانوۆ.
ايسۇلۋدىڭ اناسى ايجان حاميتقىزى – شىمكەنت قالاسىنداعى «الفا بانكتە» مەنەدجەر بولسا, اكەسى سامات ەلامانوۆ – شىمكەنت قالاسىنىڭ جۇيكە اۋرۋلار اۋرۋحاناسىندا جۇمىس ىستەيدى.
ايتا كەتەلىك, بۇل پاتەردى وڭىرگە بەلگىلى كاسىپكەر, قايىرىمدىلىعىمەن تانىمال بولعان مەتسەنات, وبلىستىق ءماسليحات دەپۋتاتى قايرات مولداسەيىتوۆ سىيعا تارتتى.
ەركىن دوسىمباي,
وڭتۇستىك قازاقستان وبلىسى
