جوبانىڭ ماقساتى جايلى كوپشىلىكتى حاباردار ەتكەن استانا قالاسى اكىمىنىڭ ورىنباسارى ەرمەك امانشاەۆ, الدا كەلە جاتقان ەلوردا كۇنى قارساڭىندا اسا اۋقىمدى مادەني شارالار جوسپارلانىپ جاتقانىن ايتا وتىرىپ, سولاردىڭ ىشىندە ماڭىزدىسى بۇگىنگى كورمە ەكەنىن جەتكىزدى.
ءۇش كەزەكپەن وتكىزىلۋى ءتيىس اتالمىش مادەني جوبانىڭ بۇل جولعى بەتاشارى رەتىندە – سولتۇستىك قازاقستان, اقمولا وبلىستارىنىڭ جانە قاراعاندى وڭىرىنە قاراستى « ۇلىتاۋ» ۇلتتىق تاريحي-مادەني جانە تابيعي قورىق-مۋزەي جادىگەرلەرى اكەلىنىپتى.
وسىلاردىڭ ىشىندە قىزىلجارلىقتار ۇسىنعان «ۇلتىن سۇيگەن ۇلى جۇرەك» اتتى كورمە نەگىزىنەن كورنەكتى اقىن ماعجان جۇماباەۆتىڭ ءومىرى مەن شىعارماشىلىعىنا ارنالعان ەكەن. ياعني 90-عا جۋىق جادىگەرلەردىڭ اراسىندا, اقىننىڭ اتاسى جۇمابايدىڭ قۇرانى مەن قاجىلىق ساپارى كەزىندە قولدانعان جاينامازى, م.جۇماباەۆ اۋدانى سارىتومار اۋىلىنداعى مۋزەي قورىنان الىنعان اقىننىڭ جارى زىليقا قولدانعان ىدىس-اياق بۇيىمدار, ءىنىسى ءسالىمجاننىڭ جارىنا ماعجاننىڭ ءوزى سىيلاعان كەرلەن كەسە, سونىمەن قاتار ۇلتتىق مۋزەي قورىندا تۇرعان اقىننىڭ پورتفەلى قاتارلى تاريحي جادىگەرلەرمەن قاتار, 1912 جىلى تاشكەنتتە جارىق كورگەن م.جۇماباەۆتىڭ «شولپان» اتتى تۋىندىسىنىڭ كوشىرمەسى مەن 1923 جىلى شىققان «يزبراننوە» كىتابى سياقتى قۇندى دۇنيەلەردى كورىپ سانامىزدى جاڭعىرتتىق.
كەلەسى كورمە يەسى اقمولالىقتار شاراعا ارناپ 150 ەكسپونات اكەلىپتى. وسىنىڭ 50-شاقتىسى ەتنوگافيالىق (قۇسبەگى جابدىعى, ات ابزەلدەرى ت.ب.) بۇيىمدار ەكەن. وبلىستىق تاريحي-ولكەتانۋ مۋزەيىنىڭ باسشىسى قۋانىش شاقشاقوۆتىڭ مالىمەتىنە سۇيەنسەك, جوعارىداعى جادىگەرلەر وڭىردەگى بارلىق مۋزەي قورىنان جينالعان. بۇلاردىڭ اراسىندا ايرىقشا اتاپ وتەرلىك دۇنيە اقىن-سازگەر, بوستاندىق كۇرەسكەرى ءيمانجۇسىپ قۇتپان ۇلىنىڭ بەساتارى. بۇل دۇنيە قازىر ەلوردا ىرگەسىندەگى «جىبەك جولى» اۋىلىنىڭ تۇرعىنى يمەكەڭنىڭ نەمەرەسى راۋشان نۇرقانقىزىنىڭ قولىندا تۇر.
سونىمەن قاتار وڭىرگە اتى ءمالىم وقىمىستى-اعارتۋشى مۇساباي زىلقارا ۇلىنىڭ شاعاتاي تىلىندە جازىلعان كىتابى, راعبۋزيدىڭ وزبەك تىلىندەگى «حيسساۋل ءانبياسى», 1902 جىلى قازان قالاسىندا جارىق كورگەن ءدىني سارىندى «حيساياتۋل» جىر كىتابى, اسىرەسە قۇندى مۇرا رەتىندە تانىمال قوجا احمەت ءياساۋيدىڭ «ديۋاني حيكمەت» قولجازباسىنىڭ تۇپنۇسقاسى سەكىلدى كونە جادىگەرلەر كورمە سورەسىنەن ورىن الىپتى.
ءۇشىنشى كورمە يەسى ۇلىتاۋلىقتار جەرگىلىكتى فوتوگراف دميتري رۋگيس تۇسىرگەن ءھام ءوڭىردىڭ كوركەم لاندشافت تابيعاتىن بەينەلەيتىن 35 كارتينانى كوزايىم رەتىندە ۇسىنىپتى.
مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆتىڭ ايتۋىنشا, وڭىردەگى قۇندى جادىگەرلەردى تانىستىرۋ ءىسى ءالى جالعاسادى. بەتاشار رەتىندە ۇسىنىلىپ وتىرعان مۇنداعى ءۇش وبلىس كورمەسى 10 ماۋسىمعا دەيىن تۇرسا, كەلەسى كورمە يەسى كەرەكۋلىكتەر ءىسىن 16 ماۋسىمدا باستاپ, 22 ماۋسىمدا اياقتايدى. ءۇشىنشى بولىپ شىعىس قازاقستان جانە الماتى وبلىسىنىڭ مۋزەيلەرى 27 ماۋسىم – 7 شىلدە ارالىعىندا جادىگەرلەرىن تاماشالاتا الادى.
بەكەن قايرات ۇلى,
«ەگەمەن قازاقستان»
