كۇندەلىكتى مونيتورينگ جۇرگىزىلىپ, جاعداي باقىلاۋدا. وڭىردەگى بارلىق اۋداندىق اۋرۋحانالاردا جۇقپالى اۋرۋلارعا ارنالعان ورىندار جانە بىلىكتى ماماندار بار. تەلەمەديتسينا, اۋە اۆياتسياسى تاۋلىك بويى جۇمىس ىستەيدى. وبلىستىق جۇقپالى اۋرۋلارعا قارسى بالالار اۋرۋحاناسى 170 ورىنعا ەسەپتەلگەن. قاجەتتىلىك تۋىنداعان جاعدايدا قوسىمشا 30 پايىزعا ارتتىرۋعا مۇمكىندىك بار. جىل سايىن وبلىس ورتالىعىنداعى № 2 قالالىق ەمحانادا قاجىلىققا باراتىن ادامدارعا عانا مەنينگوكوك جۇقپاسىنا قارسى ەكپە سالىنادى. وتكەن جىلى شامامەن 20 شاقتى ادام ەكپە الىپتى.
وبلىستىق قوعامدىق دەنساۋلىق ساقتاۋ دەپارتامەنتىنىڭ باسشىسى يرينا سوروكينانىڭ ايتۋىنشا, وبلىستا بيىلعى جىلى قاڭتار جانە مامىر ايلارى ارالىعىندا ەكى بالا مەنينگوكوك جۇقپاسىنا شالدىققان. ەكەۋى دە ستاتسيوناردا ەم قابىلداپ, تولىعىمەن اۋرۋدان ايىعىپ شىققان. بالالارمەن بايلانىستا بولعان 208 ادام تەكسەرىلىپتى. دەپارتامەنتكە ۆاكتسينا جانە اۋرۋعا قاتىسى 23 سۇراق تۇسكەن.
– بۇگىندە ۆاكتسينا بار. باعاسى – 21035 تەڭگە. ساتىپ الۋ پورتالىنا ءوتىنىش بەرىلدى. باسقارمادا 66 24 99 تەلەفون ءنومىرى بويىنشا سۇراقتارعا جاۋاپ بەرىلەدى,-دەيدى باسقارما باسشىسىنىڭ ورىنباسارى سالتانات تولەگەنوۆا.
ياعني, مەنينگوكوك جۇقتىرعان ناۋقاستىڭ دەنە قىزۋى 38,5 گرادۋستان كوتەرىلىپ, قۇسۋ,بۋىنداردىڭ اۋىرۋى, بورتپەنىڭ دەنەسىنە جايىلۋى بايقالادى.
- وسىنداي بەلگىلەر بايقالعاندا بىردەن دارىگەرگە جۇگىنىپ, جەدەل جاردەم شاقىرۋ كەرەك. كۇندەلىكتى اعزانى نىعايتىپ, شىنىقتىرۋ قاجەت. قايناتىلعان سۋ ءىشىپ, جەمىستەر مەن كوكونىستەردى قايناپ تۇرعان ىستىق سۋمەن جۋ كەرەك. سەبەبى, تاياقشالار 56 تسەلسي گرادۋستا عانا ولەدى. جەكە باستىڭ گيگيەناسىن ساقتاپ, اشىق سۋ ايدىندارى مەن باسسەينگە سۋعا تۇسۋدەن باس تارتقان ءجون,-دەيدى سالتانات تولەگەنوۆا.
فاريدا بىقاي,
«ەگەمەن قازاقستان»
پاۆلودار
