ماڭعىستاۋ وبلىسى تەحنيكالىق رەتتەۋ جانە مەترولوگيا, كاسىپكەرلىك جانە ساۋدا باسقارماسى, ادىلەت دەپارتامەنتى, جاستار ساياساتى ماسەلەلەرى جانە يندۋستريالىق-يننوۆاتسيالىق دامۋ باسقارمالارى جاڭا جاس ماماندارمەن تولىقتى.
قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتى باسشىسى, ادەپ جونىندەگى كەڭەس ءتورايىمى نۇرگۇل جاننازاروۆا حالىق الدىندا سالتاناتتى جاعدايدا انت قابىلداعان مەملەكەتتىك قىزمەتشىلەرگە قىزمەتتىك كۋالىكتەرىن تابىس ەتىپ, ادال قىزمەت ەتۋگە شاقىردى جانە جاستارعا ساتتىلىك تىلەدى.
مەملەكەتتىك قىزمەتشىلەردىڭ قاتارىن تولتىرعانداردىڭ ءبىرى – شوقان سەيىلحانوۆ. ماڭعىستاۋ وبلىسى ادىلەت دەپارتامەنتىنە جۇمىسقا تۇرعان ول, ادال قىزمەتى ارقىلى مەملەكەت مۇددەسىن قورعاۋعا دايىن ەكەندىگىن جەتكىزدى.
-بۇل مەنىڭ ومىرىمدەگى ەرەكشە كۇن بولدى. سالتاناتتى تۇردە انت ەتىپ, ادەپ جونىندەگى كەڭەس ءتورايىمىنىڭ قولىنان قىزمەتتىك كۋالىك الدىم. مەملەكەتتىك قىزمەتكە تۇرۋ ءۇشىن بىرنەشە ساتىدان وتۋگە تۋرا كەلدى. باستىسى تەستتەن سۇرىنبەي ءوتتىم. اتا-انام ادال بولۋعا ۇيرەتتى, ەندىگى جەردە ەلىمىزدىڭ دامۋى جولىندا ايانباي تەر توگۋگە دايىنمىن, دەدى شوقان كوشەرباي ۇلى.
وبلىستىق ىسشكى ساياسات باسقارماسىنىڭ ۇيىمداستىرۋىمەن وتكەن شارانىڭ ماقساتى – جاستاردى ۇلتىن سۇيۋگە, مەملەكەتتىك رامىزدەردى قۇرمەتتەۋگە تاربيەلەۋ. بوكستان لوندون جانە ريو وليمپياداسى ويىندارىنىڭ جۇلدەگەرى ادىلبەك نيازىمبەتوۆتىڭ قاتىسۋىمەن اۆتوشەرۋ ۇيىمداستىرىلىپ, سوڭى كونتسەرتكە ۇلاسقان سالتاناتتى جيىنعا وبلىس اكىمىنىڭ ءبىرىنشى ورىنباسارى سەرىك امانعاليەۆ, ءماسليحات دەپۋتاتتارى, جەرگىلىكتى اتقارۋشى ورگان باسشىلارى, ەتنومادەني بىرلەستىكتەر مەن جاستار ۇيىمدارىنىڭ وكىلدەرى, ستۋدەنتتەر مەن مەكتەپ وقۋشىلارى قاتىستى.
جاستاردى پاتريوتتىق سەزىمگە, ۇلتجاندىلىققا جانە قر مەملەكەتتىك رامىزدەرىن قۇرمەتتەۋگە تاربيەلەۋ ماقساتىندا ۇيىمداستىرىلعان اكتسيا سوڭى وبلىستىق فيلارمونيا ونەرپازدارىنىڭ كونتسەرتىنە ۇلاستى.
گۇلايىم شىنتەمىرقىزى,
«ەگەمەن قازاقستان»
