كۇن تارتىبىندە قۇرىلىس نىسانىن سالۋدىڭ مەرزىمى, ساپاسى, قاۋىپسىزدىك ماسەلەسى قارالدى. بۇگىنگە دەيىن تۇرعىنداردان كەلىپ تۇسكەن شاعىمداردىڭ دەنى عيماراتتىڭ سىرتقى كەلبەتى مەن وبەكتىنىڭ بەرىلۋ مەرزىمىنە باعىتتالعان.
ءبىرىنشى كەزەكتە ەسەپ بەرگەن قۇرىلىسشىلار جاڭادان سالىنعان عيماراتتىڭ كەيبىر جەرلەرىن قاتتى جەل ۇشىرىپ كەتەتىندىگىن ايتتى. ياعني 22-26 مامىر ارالىعىندا قالالىق مونيتورينگ ورتالىعىنا تۇرعىنداردان 212 شاعىم تىركەلگەن, 68-ءى - عيماراتتىڭ جابىندىسى مەن سىرتقى قاسبەتى زاقىمدالعانى تۋرالى شاعىم تۇسكەن. جيىندا «وليمپ-پالاس» تك مەردىگەرى تۇسىنىكتەمە بەردى, ءۇيدى 2017 جىلدىڭ شىلدەسىندە پايدالانۋعا بەرگەن. قاتتى جەلدەن كەيىن جىلىتقىش قۇرالدارى جارتىلاي قيراعان. «حايۆيلل» تك 2015 جىلى پايدالانۋعا بەرىلگەن, مۇندا پليتالار مەن جىلىتقىشتار قيراعان.
«ميللەنيۋم پارك» تك 2014 جىلى پايدالانۋعا بەرىلگەن, عيماراتتىڭ سىرتقى قاپتاماسى قيراسا, «ساراندا» تك (2013 جىل) مەتالدان جاسالعان شاتىر جابىندىسى جەلگە ۇشقان. مەردىگەرلەر جەلدەن قيراعان عيماراتتاردى 15 ماۋسىمعا دەيىن رەتكە كەلتىرۋگە ۋادە بەردى. اكىمنىڭ تاپسىرماسى بويىنشا جاۋاپتى مەمورگاندار تۇرعىن ءۇيدى قابىلداپ الۋ بويىنشا ارنايى تەكسەرۋ جۇرگىزەدى. «زاڭ بويىنشا اكىمدىك قابىلداماۋى ءتيىس, بىراق ءبىز تەحنيكالىق جانە اۆتورلىق قاداعالاۋدىڭ قايدا قاراپ وتىرعانىن انىقتايمىز.
«وليمپ پالاس» تك بويىنشا اۆتورلىق جانە تەحنيكالىق بايقاۋدى كىم وتكىزدى؟ ولار اتتەستاتىنان ايرىلدى ما؟ وسىلايشا ءبىز ارقايسىسىمەن فاكتى بويىنشا تەكسەرۋىمىز ءتيىس. ەگەر ورەسكەل بۇزۋشىلىقتار بىرنەشە رەت قايتالانسا - ليتسەنزياسىنان, اتتەستاتىنان ايىرىپ, سوتقا بەرۋ كەرەك. بىزدە ولاردى تەكسەرە الاتىن پروكۋراتۋرا, ونداعان مەملەكەتتىك ورگاندار بار جانە بۇل جۇمىستى اياقسىز قالدىرمايمىز», - دەدى ءا. يسەكەشەۆ. اكىم سونداي-اق جاۋاپسىز بيزنەسمەندەردىڭ نارىقتان كەتۋى كەرەكتىگىن دە ايتتى.
«قاراڭىزدار, تۇرعىن ءۇيدى كىم قابىلداپ الادى - ءبارى دە جەكەمەنشىك كومپانيالار: تاپسىرىس بەرۋشى, باس مەردىگەر - جەكەمەنشىك كومپانيا, تەحنيكالىق قاداعالاۋ - قازىر جەكە كومپانيا, اۆتورلىق قاداعالاۋ دا - جەكەمەنشىك كومپانيا. زاڭ بويىنشا اكىمدىك تۇرعىن ءۇيدى قابىلداپ الۋعا قۇقى جوق, بارلىق جاۋاپكەرشىلىك بيزنەسكە جۇكتەلگەن. ءبىز قازىر وسى باعىتتا ۇكپ بىرلەسىپ جۇمىس ىستەۋدەمىز, ءتۇرلى مەحانيزمدەر ارقىلى سيتۋاتسياعا ىقپال ەتۋ تۋرالى كەلىسىم جاسالدى, ياعني زاڭ ارقىلى باقىلاۋدى كۇشەيتۋ, ۇيىمنىڭ ءوزىن رەتتەۋى - جاۋاپسىز مەردىگەرلەردىڭ نارىقتان كەتۋىنە الىپ كەلۋى ءتيىس. تەكسەرىپ, انىقتاۋ قاجەت. سەبەبى, ءاربىر ءۇيدىڭ ارتىندا جۇزدەگەن وتباسىنىڭ تاعدىرى تۇر», - دەدى ءا. يسەكەشەۆ. جيىن بارىسىندا بارلىق پيك-تەرگە جۇيەلى تۇردە ءۇيدىڭ تەحنيكالىق جاعدايىن تەكسەرىپ تۇرۋىن, ونى اپاتتىق جاعدايعا دەيىن جەتكىزبەۋىن تاپسىردى. 1 جەلتوقسانعا دەيىن 486 پيك-ءتىڭ ۇيلەرگە قىزمەت كورسەتۋ ساپاسى تەكسەرىلەدى.
«قىزمەت كورسەتەتىن بارلىق پيك مەكەمەلەرىنە ايتىلعان ەسكەرتۋلەردى ەسكەرىپ, ءۇيدىڭ سىرتىن قاپتايتىن پليتكالارلى قايتا قالپىنا كەلتىرۋدى تاپسىرامىن. قۇرىلىس نورماسى مەن ەرەجەسىنە (قنجە) سايكەس, ەرەجەدە تۇرعىن ءۇي قورى رەتتەۋى كەرەك. بىزدە قازىر قالا بويىنشا عيماراتتى اپاتتىق جاعدايعا دەيىن اپارعان فاكتىلەر بار. اۋدان اكىمدىكتەرى مەن قالالىق ورتا ساپا باسقارماسى مۇنى باقىلاۋىنا الادى. ايتىلعان رەتسىزدىكتەر مەرزىمىندە قالپىنا كەلتىرىلمەگەن جاعدايدا تەكسەرۋ جۇرگىزىلىپ, ماتەريالدار سوت ورگاندارىنا جىبەرىلەدى. سونىمەن قاتار, قارجى كوزدەرىن ماقساتتى تۇردە پايدالانعانى تۋرالى اۋديت جاساۋدا بۇزۋ فاكتىلەرى بولعانىن قاراۋ ءۇشىن ءىىد, مەملەكەتتىك كىرىستەر دەپارتامەنتىنە جولدانادى», - دەپ تۇيىندەدى ءا. يسەكەشەۆ.
ال تەكسەرىستەن وتپەگەن پيك-تەرمەن بارلىق كەلىسىمشارت بۇزىلادى.
