«وسكەمەن ارماتۋرا زاۋىتىندا» باتىسقازاقستاندىق دەلەگاتسياعا روبوتتاندىرىلعان دانەكەرلەۋشى كەشەن تانىستىرىلدى. اتالمىش كاسىپورىننىڭ مۇناي وندىرىسىنە ارنالعان جابدىقتارى مەن قۇبىر جۇرگىزۋ ارماتۋرالارى رەسەي جانە وزبەكستان ەلدەرىندە سۇرانىسقا يە. ال «سيلۋمين-شىعىس» سەرىكتەستىگى «قاراشىعاناق» كونسورتسيۋمىمەن 5 جىلدان بەرى جۇمىس ىستەپ كەلەدى.
وبلىس ورتالىعىنا باتىسقازاقستاندىق دەلەگاتسيا قۇرامىندا كەلگەن «قاراشىعاناق پەتروليۋم وپەرەيتينگ» كومپانياسىنىڭ باس ديرەكتورى ەدۆين بلوم كونسورتسيۋم ءوندىرىس اياسىن كەڭەيتۋدىڭ ەكىنشى كەزەڭىن باستايتىنىن, وسى كەشەندى جۇمىسقا قازاقستاندىق وندىرۋشىلەردى كوپتەپ تارتۋعا مۇددەلى ەكەندىكتەرىن جەتكىزدى. «جوعارى تەحنولوگيامەن وندىرىلەتىن ساپالى جابدىقتاردى سىرتتان الماي, ەل ىشىندە تۇتىنۋ بىزگە دە ءتيىمدى. شىعىس قازاقستان وبلىسىنىڭ كومپانيالارىمەن جوعارى دەڭگەيدە جۇمىس ىستەۋ تاجىريبەمىز بار. بۇل ءوڭىردىڭ كاسىپورىندارى ءار تاراپتى قامتيتىندىعىمەن تارتىمدى. بۇگىن باستاۋ العان ديالوگ جالعاسىن تاباتىنىنا سەنىمدىمىن», دەيدى ە.بلوم.
«قاراشىعاناق» جوباسىنداعى جەرگىلىكتى مازمۇننىڭ ۇلەسى 54,7 پايىزدى قۇرايدى. بۇل كورسەتكىشتى ءتورتىنشى ونەركاسىپتىك رەۆوليۋتسيا اياسىندا ارتتىرۋ كوزدەلىپ وتىر. وبلىس اكىمى دانيال احمەتوۆ دەلەگاتسيا ارالاپ كورگەن كاسىپورىنداردىڭ بارلىعى دا اتالمىش تالاپقا ساي جۇمىس ىستەپ جاتقانىن, وسكەمەن ارماتۋرا زاۋىتى سوڭعى جىلدارى 100 ميلليون اقش دوللارىنا قايتا جاڭارتۋ جۇمىستارىن جۇرگىزگەنىن, «سيلۋمين-شىعىس» جشس بارلىق ءوندىرىس جەلىسىن اۆتوماتتاندىرۋعا 60 ميلليون اقش دوللارىنان استام قارجى جۇمساعانىن ايتتى. باتىس قازاقستان وبلىسىنىڭ اكىمى ا.كولگىنوۆ ءوز كەزەگىندە شىعىس قازاقستانعا پرەزيدەنتتىڭ وڭىرارالىق كووپەراتسيا تۋرالى تاپسىرماسىن جۇزەگە اسىرۋ ماقساتىندا كەلگەنىن اتاپ ءوتتى.
قاراشىعاناق» كونسورتسيۋمىنىڭ وتاندىق وندىرۋشىلەرمەن سەرىكتەستىك كوكجيەگىن كەڭەيتسەك پە دەگەن ويىمىز بار. بۇعان دەيىن ەلىمىزدىڭ 8 وبلىسىندا بولدىق. شىعىس قازاقستان – ەلىمىزدەگى ەڭ ۇلكەن يندۋستريالىق ايماق. وسىنداي ساپارلاردىڭ ارقاسىندا ءبىزدىڭ ينۆەستور بۇرىن شەتەلدەن ساتىپ الىپ كەلگەن جوعارى تەحنولوگيالىق جابدىقتاردىڭ قازاقستاندا دا بارىنا كوز جەتكىزۋدە», دەدى ول.
ازامات قاسىم,
«ەگەمەن قازاقستان»
وسكەمەن
