پرەزيدەنت نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» ماقالاسىندا ايتىلعان «تۋعان جەر» باعدارلاماسىن ورىنداۋدان تۋىنداعان يگى باستاما ادەبي بايقاۋلاردىڭ ورتاق ماقساتىنا اينالدى. ەلباسى وندا: ء«اربىر ولكەنىڭ حالقىنا سۋىقتا پانا, ىستىقتا سايا بولعان, ەسىمدەرى ەل ەسىندە ساقتالعان ءبىرتۋار پەرزەنتتەرى بار. وسىنىڭ ءبارىن جاس ۇرپاق ءبىلىپ وسۋگە ءتيىس» دەپ اتاپ كورسەتكەن ەدى. پرەزيدەنتتىڭ بۇل ءسوزى ءبىر عانا جىلدىڭ ەنشىسىندەگى ماسەلە ەمەس. بۇل ۇنەمى اتقارىلا بەرەتىن ىزگى بورىش, سوندىقتان بۇل ءمۇشايرا مەملەكەتتىك ءتىلدىڭ قولدانىلۋ اياسىن كەڭەيتۋ, ءتىل مادەنيەتىن كوتەرۋ, كوركەم ادەبيەتتى ناسيحاتتاۋ ماقساتىندا وتكىزىلگەن-ءدى. تاقىرىپتارى دا ءار ءالۋان بولدى. نەگىزىنەن, تەمىربەك جۇرگەنوۆتىڭ ساياسي كوزقاراسىن, وقۋ-اعارتۋ جانە مادەنيەت سالاسىنداعى جۇمىستارىن, ادەبي, پۋبليتسيستيكالىق مۇراسىن ولەڭ ارقىلى ۇرپاققا ناسيحاتتاۋ, ءتا-
ۋەلسىز قازاقستاننىڭ «ماڭگىلىك ەل» ۇلتتىق يدەياسىنان تۋىندايتىن قازاق تاريحىندا قالدىرعان ەرەن ەڭبەگىن جىرلاۋ, تەمىربەك جۇرگەنوۆتىڭ ەڭبەكتەرىندە كەزدەسەتىن رۋحاني ۇلتتىق مۇرامىز بەن ەلدىك-ەرلىك قۇندىلىقتارىمىزدى ۇلىقتاۋ, ونىڭ رەپرەسسيا قۇربانى بولعانىن ولەڭگە قوسۋ ارقىلى, قازاق حالقىنىڭ باسىنا ناۋبەت بوپ تونگەن جىلداردى ۇرپاق ساناسىندا جاڭعىرتۋ اقىندار مەن جازۋشىلارعا ورتاق يدەيا رەتىندە ۇسىنىلدى.
الاش قايراتكەرى تەمىربەك جۇرگەنوۆتىڭ رۋحىنا ارنالعان جىر ءمۇشايراسى مەن پروزا باعىتىنداعى بايقاۋعا 14 اقىننان 23 ولەڭ, ال 8 جازۋشىدان 9 شىعارما كەلىپ تۇسكەن بولاتىن. بەلگىلى قالامگەرلەر قازىلىق جاساعان ادەبي بايگەنىڭ قورتىندىسى كەشە ساياسي قۇربانداردى ەسكە الۋ كۇنىندە جاريالانىپ, جەڭىمپازدارعا جۇلدە تابىستالدى.
رەسپۋبليكالىق اقىندار ءمۇشايراسىنىڭ ءىىى ورنى جانە 100 مىڭ تەڭگە سەرتيفيكات ءۇش اقىندى: يبراگيم بەكماحانوۆ, شاعىر قايىربەك جانە اسحات ايماعامبەتوۆتى قۋانتتى. ارقايسىسى 150 مىڭ تەڭگە سىيلىق پەن ءىى ورىندى اسىلاي نيازباەۆا مەن جەتكەرگەن ابدىرە ۇلى ءبولىستى. ال ءى ورىندى 200 مىڭ تەڭگە سىياقىمەن تولىباي ابىلاەۆ يەلەندى. رەسپۋبليكالىق اقىندار ءمۇشايراسىنىڭ باس جۇلدەسى قاجي سەرىكجانعا 300 مىڭ تەڭگە سىياقىمەن قوسا تابىستالدى.
رەسپۋبليكالىق پروزايكتەر بايقاۋىنىڭ ءىى ورنى بەكبولات بەكمۇرات ۇلىنا (150 مىڭ تەڭگە), ءى ورىن جانە 200 مىڭ تەڭگە سىياقى «تەمىربەكتى اتقان جەندەت» اڭگىمەسىنىڭ اۆتورى ەرتاي ايعالي ۇلىنا بەرىلدى. «تەمىرشە» اتتى اڭگىمە جازىپ باس جۇلدەنىڭ يەگەرى اتانعان بەلگىلى جازۋشى ايگۇل كەمەلباەۆاعا «تەمىربەك جۇرگەنوۆ» قوعامدىق قورىنىڭ توراعاسى, قازىلار القاسىنىڭ توراعاسى ساپەن اڭساتوۆ 300 مىڭ تەڭگە سىياقى تابىستادى.
ايگۇل احانبايقىزى,
«ەگەمەن قازاقستان»
الماتى
