«الەم ۇزدىكسىز وزگەرىسكە ۇشىراپ كەلەدى. تسيفرلىق تەحنولوگيالار مەملەكەتتەردىڭ باسەكەگە قابىلەتتىلىگىنىڭ شەشۋشى فاكتورى بولىپ وتىر. جاڭا سىن-تەگەۋرىندەر ۋاقتىلى شەشىم قابىلداۋدى قاجەت ەتەدى. مىنە, سوندىقتان, مەملەكەت باسشىسىنىڭ تاپسىرماسىمەن ءبىزدىڭ مينيسترلىك «تسيفرلىق قازاقستان» اۋقىمدى باعدارلاماسىن جاساپ شىعاردى. اتالعان قۇجات ءبىزدىڭ ەلىمىزدىڭ قوعامدىق-ەكونوميكالىق تۇرعىداعى بارلىق سالانى قامتۋدى كوزدەپ وتىر. ونىڭ ماكروەكونوميكالىق اسەرى دە ايقىن بولماق», - دەيدى مينيستر.
داۋرەن اباەۆ فورۋم بارىسىندا «تسيفرلىق قازاقستان» باعدارلاماسى تۋرالى قىسقاشا ءارى ۇعىنىقتى تۇردە بايانداپ بەردى.
«ەڭ ءبىرىنشى كەزەكتە بۇل - ينفراقۇرىلىم. ءبىز قازىرگى تاڭدا اۋىل مەن قالانىڭ اراسىندا ۇلكەن ايىرماشىلىق بارىن ءبىلىپ وتىرمىز. دەمەك, «تسيفرلىق الشاقتىق» پايدا بولدى. ونى دا وزدەرىڭىز جاقسى بىلەسىزدەر. قالادا جىلدام 4G بار دەسەك, اۋىلدارداعى ينتەرنەتتىڭ قاۋقارى 2G-عا دا جەتە بەرمەيدى. ال ەلىمىزدەگى حالىقتىڭ 40 پايىزى اۋىلداردا تۇرادى. دەمەك, ولار قالاداعىدان گورى ساپاسى ازداۋ ءبىلىم, مەديتسينالىق ءبىلىم, سونىمەن قاتار مەملەكەتتىك قىزمەتتى الۋى مۇمكىن. سوندىقتان, مەملەكەت ەڭ الدىمەن ينۆەستيتسيا سالاتىن بولادى. وزدەرىڭىز بىلەتىندەي, جەرىمىز بايتاق بولعانىمەن, حالىق سانى از. سوندىقتان, جەكە بيزنەسكە بۇل البەتتە قولايسىز. سوندىقتان, مەملەكەت 25 مىڭ وپتيكالىق تالشىق سالۋعا ءازىر. بۇل ءۇشىن الەۋەتتى دەگەن 1249 اۋىل بەلگىلەندى. وسىلايشا, بەلگىلەنگەن اۋىلدارعا ساپالى ينتەرنەت جەتەدى», - دەيدى داۋرەن اباەۆ.
ەكىنشىدەن, كرەاتيۆتى قوعام. بىزگە ماماندار كەرەك. ءىت سالادا عانا ەمەس, بىزگە زاماناۋي تەحنولوگيالارمەن جۇمىس ىستەي الاتىن دارىگەرلەر, مۇعالىمدەر, پوليتسيا قىزمەتكەرلەرى كەرەك.
«سوندىقتان, ءاربىر جاۋاپتى مينيسترلىك ءوز باعىتى بويىنشا حالىقتى زاماناۋي تەحنولوگيالار بويىنشا وقىتاتىن بولادى. «نۇر وتان» دا بۇل شارۋاعا اتسالىسۋدا. ستۋدەنتتەر ءۇشىن عانا ەمەس, حالىقتىق بارلىعى ءۇشىن جازعى كۋرستار وتەتىن بولادى. بۇل - ءبىز ءۇشىن ماڭىزدى تاپسىرما. سوندىقتان, ءبىز كرەاتيۆتى قوعامدى قۇرا ءبىلۋىمىز كەرەك», - دەيدى داۋرەن اباەۆ.
ايتا كەتسەك, استانادا بۇگىن «Ideas for women» (IFW-2018) - ءتورتىنشى ونەركاسىپ رەۆوليۋتسياسىنىڭ سىن-تەگەۋرىندەرى» اتتى فورۋم جۇمىسىن باستادى. فورۋمدى قازاقستانداعى ەۋروپا قايتا قۇرۋ جانە دامۋ بانكىنىڭ قولداۋىمەن قازاقستاننىڭ ىسكەر ايەلدەر قاۋىمداستىعى ۇيىمداستىرىپ وتىر. ءىس-شارا ەلىمىزدەگى ايەلدەر كاسىپكەرلىگىن الەمدىك ەكونوميكانىڭ دامۋ دەڭگەيىنە شىعارۋ ماقساتىندا ۇيىمداستىرىلعان.
