ساحنا – كيەلى ورىن. ابايلاماساڭ, كيەسى ۇرادى. بۇگىنگى كۇنى ساحنانىڭ كيەسىنە ۇشىراپ جۇرگەندەر قانشاما... ءتىپتى كۇن ساناپ ولاردىڭ قاتارى كوبەيۋدە دەسەك, جاڭىلا قويماسپىز. ولاردى كورىپ, كەزىندەگى اتا-بابالارىمىزدان ۇلىقتالىپ كەلە جاتقان ۇلتتىق ونەرىمىزدىڭ سارقىتى بولعان جاستارعا سانا بەرسىن دەيسىڭ! كەزىندەگى ء«اۋ دەمەيتىن قازاق جوق» دەپ كەڭىنەن ەتەك جايعان ءسوز, بۇگىندە «اۋزى باردىڭ ءبارى ءانشى» دەگەن زاماناۋي ناقىلمەن جالعاسىن تاپتى.
«وپەراعا بارعاندا ەستراداعا جانىم اشيدى», دەپ تالعات تەمەنوۆ ايتقانداي, بۇگىنگى ەسترادانىڭ حال-جايى ءماز ەمەس. ويتكەنى سانى كوپ, ساپاسى جوق ونەر يەلەرى قۇمىرسقاداي قۇجىناپ ءجۇر. ولار ونەرىمەن دارالانىپ جاتسا يگى عوي, باتىسقا ەلىكتەپ, ءوزىنىڭ اتا-بابالارى قالدىرعان ونەردى دارىپتەپ جۇرگەندەي الاڭسىز جۇرگەندەرىن كورمەيسىڭ بە!؟
كوك جاشىكتىڭ تورىنەن كورىنىپ, ءدۇيىم جۇرتقا ونەرىن تانىتۋ – ۇلكەن جاۋاپكەرشىلىك. تابيعي داۋسىمەن تامسانتىپ, ونەرىمەن ورشەلەنىپ, دارىندىلىعىمەن دارالانىپ كوزگە تۇسسە ەلدىڭ العىسىن الادى. ال جاعىمسىز جاعىنان كوزگە تۇسسە ەلدىڭ قارعىسىن الادى. بۇرىن داۋسى بارلار ءانشى ەدى. قازىر اۋزى باردىڭ ءبارى ءانشى. دەگەنمەن دە تايراڭداپ تاناۋىن كوككە كوتەرىپ جۇرگەن انشىسىماقتار, كەزىندەگى ءان ونەرىن اۋەلەتكەن بيبىگۇل, روزا, ءمادينا اپالارىمىزدىڭ دەڭگەيىنە جەتپەيتىنىن ەستەن شىعارماعان ءجون!
بايقاساڭىز ەسترادا ونەرى ءتۇرلى انشىلەر مەن ءتۇرلى توپتارمەن جاڭارۋدا. شىنىمەن دە, ءار كۇن سايىن جاڭا ءتۇر, جاڭا ستيل, جاڭا توپ. قۇددى شەتەلدە جۇرگەندەيسىڭ! وبرازدارى مۇلدە وزگەشە! قاراپايىم عانا قاراتورى قىز-جىگىتتەرىمىزدى ادام تانىماستاي وزگەرتەتىندەي باتىستىڭ قۇدىرەتتىلىگى نەدە ەكەن؟ تۇسىنبەيمىن! ايتپاعاندى ايتىپ اكىرەڭدەيدى, ءمان-ماعىناسىز سوزىمەن ماڭگۇرت ەتەدى, قيسىنسىز قىلىعىمەن قىتىعىڭا تيەدى, ۇزىن ءسوزدىڭ قىسقاسى, ساحناداعى سايقىمازاقتارعا سان جەتپەيدى بۇگىندە.
جاڭاشىلدىققا جانى قۇمار جاستارىڭ ونەرىنەن بۇرىن كەسكىن-كەلبەتىنە ەرەكشە كىرپيازدىقپەن قاراپ, كوڭىل بولەتىنى دە شىندىق. بارىنەن بۇرىن كيگەن كيىم ۇلگىسىمەن قازاق ۇلتىنىڭ نامىسىنا نۇقسان كەلتىرۋدە. سانانى ۋلاپ تىزبەكتەلگەن سۇراقتار وتە كوپ, ال جاۋاپ... وزدەرىنەن سۇراساڭ, «مۇنى تەك جاستار تۇسىنەدى», «زامان اعىمىنان قالىپ كەتكەنسىڭ», «زامانىنا قاراي ادامى» دەگەن سىندى سىلتاۋلاردى العا تارتىپ سۇراقتان جالتارادى. ال وسىلاردى ۇلگى تۇتىپ كەلە جاتقان جاسوسپىرىمدەردىڭ سانى ارتىپ كەلە جاتقاندىعىن كورسەڭ, باسىڭدى تومەن سالبىراتىپ, كىرەرگە تەسىك تاپپايسىڭ! ەڭ وكىنىشتىسى دە وسى... كەزىندەگى م.جۇماباەۆ سەنگەن جاستار قانداي ەدى؟ ال بۇگىنگى جاستار قانداي؟ اراسى جەر مەن كوكتەي. «جار باسىنداعى جانتاقتى جانىنان بەزگەن نار جەيدى» دەمەكشى, جاننان بەزسەك تە, اردان بەزبەۋ كەرەگىن ەستەن شىعارماسا ەكەن جاستار.
«ونەرگە اركىمنىڭ دە بار تالاسى» دەپ اباي اتامىز ايتپاقشى, ونەردىڭ دە ونەرى بار. ساحنادا سايراپ, بىلگەنىن ىستەۋ ونەرگە جاتپايدى. بالكىم, بۇل جاي عانا ەلىكتەۋشىلىكتەن تۋعان نارسە شىعار. وزگەگە ەلىكتەۋدەن نە ۇتامىز؟ ەلىكتەۋ – ەسسىزدىڭ ءىسى. ويلانايىق! كيەلى ساحنانىڭ كيەسىنە ۇشىرامايىق!
زەرە ماحامبەتاليەۆا
قىزىلوردا وبلىسى,
ارال اۋدانى,
قامىستىباس اۋىلى
