ونىڭ زەرتتەۋ تاقىرىبى ءار الۋان. قازاق اۋىز ادەبيەتىنەن باستاپ ءتىل, لينگۆيستيكا, ادەبيەت تەورياسى, شەشەندىك ونەر, سال-سەرىلەر پوەزياسى ماسەلەلەرىنە قاتىستى ايتقان قۇندى وي-پىكىرلەرى ومىرشەڭدىگىمەن, ماڭىزدىلىعىمەن ەرەكشەلەنەدى. ول تۇركى مادەنيەتىنىڭ, جامبىل جاباەۆ, ءماشhۇر ءجۇسىپ, مالىك عابدۋللين مۇرالارىنىڭ بىلگىرى سانالادى. عىلىم مەن ۇستازدىق قىزمەتتى تىعىز ۇشتاستىرا بىلگەن سان قىرلى تالانت يەسىنىڭ ۇلتتىق ادەبيەتتانۋ عىلىمىنا قوسقان ۇلەسى ولشەۋسىز.
جەتپىس جاستىڭ تورىنە كوتەرىلگەن جەرلەسىمىزدىڭ قۇرمەتىنە م. قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە «قازىرگى فولكلورتانۋ مەن ادەبيەتتانۋدىڭ كوكەيكەستى ماسەلەلەرى» اتتى رەسپۋبليكالىق عىلىمي-تاجىريبەلىك كونفەرەنتسيا ۇيىمداستىرىلىپ, استانا, شىمكەنت, قاراعاندى, كوكشەتاۋ تاعى باسقا قالالاردان جوعارى وقۋ ورىندارىنىڭ وكىلدەرى, ءسوز زەرگەرلەرى, ادەبيەتتانۋشىلار قاتىستى. القالى باسقوسۋدا ۇلاعاتتى ۇستاز, كورنەكتى عالىمنىڭ ءومىرى مەن شىعارماشىلىعىنا قاتىستى وزگەلەرگە ۇلگى بولارلىق تاعىلىمدى اڭگىمەلەر قوزعالدى.
تىلدەردى دامىتۋ جونىندەگى باسقارمانىڭ باسشىسى كەمەل وسپانوۆ وبلىس اكىمى قۇمار اقساقالوۆتىڭ جۇرەكجاردى قۇتتىقتاۋ لەبىزىن جەتكىزىپ, ارنايى سىي-سياپات كورسەتتى. ەڭسەلى وقۋ ورنىنىڭ عىلىم جانە يننوۆاتسيالار جونىندەگى پرورەكتورى اقمارال يبراەۆا «م. قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ قۇرمەتتى پروفەسسورى اتاعىن بەرۋ تۋرالى» كۋالىكتى سالتاناتتى جاعدايدا تابىس ەتتى. پارلامەنت ءماجىلىسىنىڭ دەپۋتاتى اباي تاسبولاتوۆتىڭ قۇتتىقتاۋ حاتى وقىلدى. «قىزىلجار-اقپارات» جشس ديرەكتورى-باس رەداكتورى جاراسباي سۇلەيمەنوۆ ءوز سوزىنە ەڭبەگىمەن ەلگە تانىلعان تۇلعانىڭ بىلىكتى, ءبىلىمدى, ىزدەنىمپاز قاسيەتتەرىن ارقاۋ ەتە كەلىپ, ادەبيەت دەگەن عاجايىپ الەمدەگى وزىندىك تۇعىرىن, جەتكەن اسۋىن, باعىندىرعان بەلەسىن العا تارتتى. باسىلىمنىڭ اتىنان مەرەيتوي يەسىنىڭ يىعىنا شاپان جاپتى. ءۋاليحانوۆ اۋداندىق ارداگەرلەر كەڭەسىنىڭ توراعاسى سانسىزباي قاليەۆ, ۋنيۆەرسيتەت پروفەسسورى زارقىن تايشىباي, مەملەكەتتىك مۇراعاتتىڭ ديرەكتورى ساۋلە مالىكوۆا عالىمنىڭ عىلىم جولىنداعى قولتاڭباسىن ءبولىپ ايتتى.
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى, فيلولوگيا عىلىمدارىنىڭ دوكتورى ديقان قامزابەكتىڭ «سەرىك نەگيموۆ جانە الاش مۇراسى» اتتى بايانداماسى وتە اسەرلى شىقتى. وندا عالىمنىڭ جيىرماسىنشى عاسىرداعى قازاق ادەبيەتىن ىندەتە زەرتتەگەن شىعارمالارى تالدانىپ, جوعارى باعا بەرىلدى. مەملەكەتتىك ەلتاڭبانىڭ اۆتورى, قازاقستاننىڭ ەڭبەك سىڭىرگەن قايراتكەرى جانداربەك مالىبەك ۇلى زامانداسىن ءوندىرتىپ جازاتىن عالىمدار شوعىرىنا قوستى. قاي تاقىرىپقا قالام تارتسا دا عىلىمي وقشاۋ ويلارى, تاباندى پىكىرلەرى ءتانتى ەتەتىنىن جەتكىزدى. م. اۋەزوۆ اتىنداعى ادەبيەت جانە ونەر ينستيتۋتى ادەبيەت تاريحى ءبولىمىنىڭ مەڭگەرۋشىسى سەرىكقازى قوراباي, س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ پروفەسسورى نارتاي ءجۇسىپوۆ, ج.مۋسين اتىنداعى كوكشەتاۋ پەداگوگيكالىق كوللەدجىنىڭ ديرەكتورى نۇرتاس احات, وزگە دە شەشەندەر عالىمنىڭ اقىن-جىراۋلار پوەزياسى, بي-شەشەندەر تولعاۋى, شەشەندىك ونەر حاقىندا دايەكتىلىكپەن, بىلىكتىلىكپەن زەرتتەپ, بىرىزگە ءتۇسىرىپ, جۇيەلەپ بەرگەن بىلگىر زەرتتەۋشى ەكەنىنە ناقتى مىسالدار كەلتىردى.
بەلگىلى ايتىسكەر اقىن, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ دوتسەنتى سەرىكزات دۇيسەنعازين ۇستازىنىڭ جاس بۋىنعا ۇلگى ەتەرلىك قاسيەتتەرىن ولەڭمەن ورنەكتەدى.
وسىلايشا عىلىمنىڭ قيا جولىندا ءوز سوقپاق-سۇرلەۋىن تاۋىپ, ۇلاعاتتى ۇستاز, كورنەكتى عالىم رەتىندە كەڭىنەن تانىلىپ وتىرعان جەرلەسىمىزدىڭ مەرەيتويىن قىزىلجار جۇرتشىلىعى ءوز مانىندە اتاپ ءوتتى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
