بەك تولەۋوۆ, جۋرناليست: «فينالدا فاۆوريت بولمايدى دەگەن تۇسىنىك بار. بىراق «رەالدىڭ» ويىنشىلارى تاجىريبەلى, ناعىز تىسقاققاندار. سوندىقتان ولار قانداي كەزدە بولماسىن جينالىپ, قاجەتتى ناتيجەگە جەتۋ ءۇشىن ايانىپ قالمايدى. فينالعا دەيىن پسج, «يۋۆەنتۋس», «باۆاريا» سەكىلدى مىقتىلاردىڭ بارلىعىن كەزدەسىپ, ەكى ويىننىڭ قورىتىندىسى بويىنشا جەڭىسكە جەتىپ وتىردى. ال «ليۆەرپۋلدىڭ» فۋتبولشىلارى موحاممەد سالاح جاراقات الىپ, الاڭنان كەتكەن كەزدە ابدىراپ قالدى. وسىنداي تۇستا تاجىريبەنىڭ ازدىعى بايقالادى.
زينەدين زيدان وليمپيادالىق جۇيە بويىنشا وتكىزىلەتىن كۋبوكتاردا كومانداسىن جىگەرلەندىرە الاتىن باپكەر ەكەنىن تاعى ءبىر مارتە دالەلدەدى. 38 تۋرعا سوزىلاتىن چەمپيوناتقا قاراعاندا, زيدانعا كۋبوكتىق ويىندار ىڭعايلى سەكىلدى. وسىمەن ءۇشىنشى جىل قاتارىنان چەمپيوندار ليگاسىن جەڭىپ الۋى وسىنىڭ دالەلى بولسا كەرەك.
فينالدا ەكى بىردەي ورەسكەل قاتەلىك جىبەرگەن «ليۆەرپۋل» قاقپاشىسى لوريس كاريۋستى كىنالاپ جاتقاندار كوپ. بىراق, كاريۋستى ەمەس, وعان سەنىم ءبىلدىرىپ جۇرگەن باپكەرلەر شتابىنىڭ قاتەلىگى دەپ ايتۋعا بولار. گەرمانيالىق قاقپاشى بۇعان دەيىن دە باسقا ماتچتا ءجيى قاتەلەسىپ جۇرگەن بولاتىن. ال فينالدا ول ءتىپتى قوبالجىعانىن باسا العان جوق. سوندىقتان ازىرگە ول مۇنداي ويىنداردا ونەر كورسەتۋگە دايىن ەمەس.
بۇل فينال بىرازعا دەيىن ۇمتىلماس. «سالاحتىڭ جاراقاتى», «كاريۋستىڭ قاتەلىگى», «بەيلدىڭ بەنەفيسى» بولعان فينال دەپ بىرازعا دەيىن ەسكە الاتىن شىعارمىز.
ءبىر قۋانتقانى, فينالدا جۇمىس ىستەگەن تورەشىلەر بريگاداسى ەشقانداي ورەسكەل قاتەلىك جىبەرگەن جوق. بارلىعى ءادىل بولدى. تەك موحاممەد سالاحتىڭ جاراقاتى جانكۇيەرلەردىڭ ۇنجىرعاسىن تۇسىرگەنىن ايتپاساق, كيەۆتەگى فينال كوڭىلدەن شىقتى».
ء ازيز ءجۇمادىل, جۋرناليست: «ويىننىڭ وتكەنىنە ءۇش كۇنگە جۋىقتاپ قالدى, بىراق «رەال» مەن «ليۆەرپۋل» توڭىرەگىندەگى اڭگىمە ءالى تىنشىماي تۇر. مادريدتىكتەردىڭ مىقتىلىعىن مويىندايتىندار دا كوپ, جەڭىسىن داتتايتىندار دا جەتەرلىك. ءبىز دە ءوزىمىزدىڭ «بەس تيىنىمىزدى» قوسايىق.
«رەالدىڭ» قانشا جانكۇيەرى بولسا, سونشا حەيتەرى بار. ۇلى كلۋبتاردىڭ بارلىعىندا سولاي. سوندىقتان, ماتچتاعى كەيبىر جاعدايلار جايلى ءارتۇرلى اڭگىمەلەردىڭ بولۋى زاڭدىلىق. دەگەنمەن, موحاممەد سالاحتى سىندىردى دەپ سەرحيو راموستى ايىپتاعاندار نەلىكتەن لوريس كاريۋس جايلى جاق اشپايتىنىنا تاڭىم بار. شىنتۋايتىنىنا كەلگەندە «ليۆەرپۋلدىڭ» جەڭىلىسىنە قاقپاشىنى دا كىنالاي بەرۋگە بولمايدى. ءار ادامنىڭ ءساتسىز كۇنى بولادى. بالكىم, 26 مامىر نەمىس كيپەرىنىڭ دە توسەكتەن سول اياقپەن تۇرعان كۇنى بولعان شىعار. ال «سالاح الاڭدا بولعاندا «رەال» «ليۆەرپۋلدى» جەڭە الماس ەدى» دەگەنمەن كەلىسۋ قيىن. مىسىرلىق شابۋىلشى 10-شى مينۋتتا ەمەس, 30-شى مينۋتتا جاراقات الىپ, الاڭنان كەتتى. قارسى كوماندانىڭ قورعاۋشىلارىن وزىنە قاراتۋمەن بولدى دەمەسەڭىز, موحاممەد جارتى ساعاتتا جارىتىپ ەشنارسە دە جاساي العان جوق. ونىڭ قاسىندا ويىنعا 61-ءشى مينۋتتا قوسىلعان گارەت بەيل 25 مينۋتتا ەكى گول سوعىپ, فينالدىڭ تاعدىرىن شەشىپ تاستادى. راس, سالاح كوماندالاستارىنا سەنىم بەرەتىن ويىنشىلاردىڭ قاتارىنان. ول الاڭنان كەتكەن سوڭ بۇعان دەيىن ءتاپ-ءتاۋىر ويناپ جۇرگەن دجەيمس ميلنەر مەن دجوردان حەندەرسوننىڭ دا دوبى ءتۇزۋ ۇشپاي قويدى. روبەرتو فيرمينو دا قۇر جۇگىرە بەردى. ايتسە دە, ادەتتە مادريدتىكتەر ءبىرىنشى تايمدا قورعانىسقا كوبىرەك كوڭىل ءبولىپ, قىسىمدى ۇزىلىستەن كەيىن ارتتىراتىن كوماندا. چەمپيوندار ليگاسىنداعى بيىلعى ويىندارى سولاي دەيدى. سوندىقتان, «رەالدىڭ» جەڭىسىنە سالاحتىڭ جاراقاتى سەبەپكەر ەمەس.
البەتتە, موحاممەد سالاحتىڭ جاراقات الىپ قالعانى وكىنىشتى. مۇنداي ويىنشىلاردىڭ فينالدى باستان-اياق ويناعانى تاريح ءۇشىن ءتيىمدى. ەندى ونىڭ الەم چەمپيوناتىنا دەيىن ايىعىپ كەتكەنىن تىلەيمىز. سونداي-اق, «رەال» ساپىندا ساپتان شىعىپ قالعان دانيەل كارۆاحالدىڭ دە ەرتەرەك قاتارعا قوسىلعانىن قالايمىز.
ال ەسەپ, ءسىز بەن ءبىز قالاي دەسەك تە – 3:1. بىرنەشە جىلدان كەيىن جانكۇيەرلەردىڭ ەسىندە وسى عانا قالادى. قالعاندارىنىڭ بارلىعى ۋاقىتشا نارسە. ەشكىم دە كاريۋستىڭ قاتەلىكتەرىن, كارۆاحال مەن سالاحتىڭ جاراقاتتارىن ەسكە المايدى. «رەالدىڭ» قاتارىنان ءۇش رەت جەڭىمپاز بولعانى عانا ايتىپ جۇرەدى».
