ناتيجەسىندە كولەمى 1500 شارشى مەتردەن اساتىن 1243 نىسان تەكسەرىستەن ءوتىپ, وندا 15 مىڭ ەرەجە بۇزۋشىلىق تىركەلگەن. ءوز كەزەگىندە ورتاق تالاپتاردى ورىنداۋدان جالتارعاندارعا 19 ميلليون تەڭگەدەن استام ايىپپۇل بەلگىلەنىپ وتىر. بۇعان قوسا, نىساندارداعى 41000 قىزمەتكەرگە توتەنشە جاعداي كەزىندە نە ىستەۋ كەرەكتىگى ۇيرەتىلىپ, 494 وقۋ-تاكتيكالىق جيىنى وتكەن.
ايتا كەتەرلىگى, مەملەكەتتىك باقىلاۋ كەزىندە كوزگە ىلىككەن 120 نىسان قايتا تەكسەرىستەن ءوتىپ, ونىڭ ىشىندە 98 نىسان بەلگىلەنگەن ەسكەرتۋلەردى تولىقتاي ورىنداعان. ال ورىنداماعان 22 نىسانعا قاتىستى ءىس اكىمشىلىك كودەكسكە ساي سوتقا جىبەرىلدى. سوت شەشىمى بويىنشا 462-باپ نەگىزىندە مۇنداي نىساندارعا 500 ەڭ تومەنگى اەك كولەمىندە ايىپپۇل سالىنىپ نەمەسە اتالعان نىساننىڭ جۇمىسى ءۇش ايعا دەيىن توقتاتىلماق. ال ءبىلىم جانە عىلىم مينيسترلىگىنە قارايتىن ءبىلىم بەرۋ مەكەمەلەرىن مەملەكەتتىك باقىلاۋ بويىنشا تەكسەرۋ قورىتىندىسىنا سايكەس, 11541 نىساننىڭ 7600-ءى تەكسەرىلدى. الداعى ماۋسىم-شىلدە ايلارىندا تەكسەرىس جۇمىستارى تولىعىمەن اياقتالادى. ەسكەرتۋلەردى ورىنداماعان ءبىلىم مەكەمەلەرىنىڭ ءىسىن سوتقا جىبەرىپ, ءارى قاراي ولارعا دا ايىپپۇل سالۋ نەمەسە ۋاقىتشا جۇمىسىن توقتاتۋ جازاسى قولدانىلماق.
ىشكى ىستەر ءمينيسترى ورىنباسارىنىڭ حابارلاۋىنشا, رەسپۋبليكا بويىنشا بيىل ورمان ءورتىنىڭ سانى – 71-گە جەتكەن. ورمان ءورتى ەلىمىزدىڭ شىعىس وڭىرىندە ءجيى ورىن الادى. كورسەتكىشتەرگە كەلسەك, وتكەن جىلمەن سالىستىرعاندا جازىق القاپتار مەن نۋلى ورماندارداعى ءورتتىڭ سانى بيىل ايتارلىقتاي ارتىپ وتىر. ءتىلسىز جاۋدان كەلەتىن قاۋىپتىڭ الدىن الۋ ماقساتىندا وبلىس جانە اۋدان ورتالىقتارى تەحنيكالىق قۇرال-جابدىقتارمەن قامتاماسىز ەتىلىپ, دايىندىق شارالارىنا ازىرلىكتى باستاپ كەتكەن.
ال ەل اۋماعىنداعى جازعى لاگەرلەر مەن دەمالىس, ساۋىقتىرۋ ورتالىقتارىنا تاياۋ ارادا جاپپاي تەكسەرىس جۇرگىزىلەدى. ىشكى ىستەر ءمينيسترىنىڭ ورىنباسارى كەلتىرگەن مالىمەت بويىنشا, بيىل جاز باستالماي جاتىپ 28 ادام سۋعا كەتكەن, ونىڭ 11-ءى بالالار ەكەندىگى انىقتالىپ وتىر. كوپ جاعدايدا جەكە تۇرعىن ۇيلەردىڭ اۋلالارىندا 3-4 جاسار بالالار اتا-انالارىنىڭ قاراۋىنسىز قالىپ, قايعىلى جاعدايعا تاپ بولادى. وسىعان بايلانىستى مەكتەپتەردەگى اتا-انالار جينالىسىندا ارنايى ءتۇسىندىرۋ جۇمىستارى جۇرگىزىلىپ, قاۋىپسىزدىك ساقتاۋ ەرەجەلەرىمەن تانىستىرۋ شارالارى وتكىزىلدى.
ەركەجان ايتقازى,
«ەگەمەن قازاقستان»
