سىنىپتىڭ تۇساۋكەسەرىنە ماڭعىستاۋ وبلىسى اكىمىنىڭ ورىنباسارى رۋسلان ساكەەۆ, ءبىلىم باسقارماسى باسشىسى نۇرلىبەك قويجانوۆ, «نۇر وتان» پارتياسى وبلىستىق فيليالى توراعاسىنىڭ ورىنباسارى نۇري تۇمىشەۆ, «نۇر وتان» پارتياسى اقتاۋ قالالىق فيليالى توراعاسىنىڭ ورىنباسارى قاليوللا ساحيپوۆ قاتىستى.
IT-سىنىپقا كىرمەس بۇرىن وبلىس اكىمىنىڭ ورىنباسارى باستاعان توپ №23 مەكتەپ وقۋشىلارى ازىرلەگەن كونتسەرتتىك باعدارلامانى تاماشالاپ, ءسوز سويلەدى. رۋسلان كەنەسارى ۇلى مەكتەپ تۇلەكتەرىنە ساتتىلىك تىلەپ, بالالاردى سوڭعى قوڭىراۋ كۇنىمەن قۇتتىقتادى. ءوز سوزىندە مەكتەپكە كەلگەندەگى ماقساتىنا, ياعني وبلىستا اشىلىپ جاتقان IT-سىنىپتارى جونىندە ايتىپ كەتتى.
– جاڭا وقۋ جىلىنا مەكتەپتەردە IT-سىنىپتارىن كوپتەپ اشامىز دەپ جوسپارلاپ وتىرمىز. بۇل «تسيفرلى قازاقستان» جوباسى اياسىندا جۇزەگە اسىرىلىپ وتىرعان «نۇر وتان» پارتياسىنىڭ جاڭا جوباسى. بۇل جوبالار ارينە, ءبىزدىڭ اتا-انالاردىڭ قولداۋىنسىز جۇرمەيدى. سوندىقتان جاستاردى ەڭبەككە, تاربيەگە, عىلىمعا, ەلىمىزدىڭ دامۋىنا ۇلەس قوسۋعا شاقىرامىز. اتقارىلىپ جاتقان ءىس-شارالاردان سىزدەر حاباردار بولۋلارىڭىز كەرەك, – دەدى اكىمنىڭ ورىنباسارى.
№23 ورتا مەكتەپتىڭ ديرەكتورى زاريفا كازيەۆا IT-سىنىپتاردىڭ اشىلۋىنا سەبەپكەر بولىپ وتىرعان «نۇر وتان» پارتياسىنا العىسىن ايتىپ, IT-سىنىپپەن تانىستىردى. سىنىپتا كومپيۋتەرلەرمەن قاتار, روبوت-تەحنيكا دا بار. بالالار Python باعدارلاماسىن ەندى ۇيرەنەدى, ازىرگە ولار Scratch باعدارلاماسىمەن جۇمىس ىستەپ ۇيرەنۋدە. بەسىنشى سىنىپ وقۋشىلارى ءىلياس سەكسيمباەۆ پەن ارسەن توكەنوۆ كەلگەن قوناقتارعا وزدەرى مەڭگەرگەن باعدارلاماسى بويىنشا قۇراستىرعان ويىندارىن تانىستىردى.
ز.قازيقىزى بالالاردى جامبىل وبلىسىنان شاقىرتىلىپ, ارنايى جاتاقحانامەن قامتاماسىز ەتىلگەن البينا ساميگۋلوۆا ەسىمدى مۇعالىمنىڭ وقىتاتىندىعىن ايتتى.
– اكىمدىككە جامبىل وبلىسىنان الدىرعان مۇعالىمدى جاتاقحانامەن قامتاماسىز ەتكەندىگى ءۇشىن العىسىمدى بىلدىرەمىن. بىزگە وسىنداي ماماندار قاجەت. «نۇر وتان» پارتياسىنىڭ وسىنداي جاڭاشىل باستاماسىمەن ءبىلىم سالاسىنا قوسىپ وتىرعان ۇلەسى ءۇشىن العىسىمدى بىلدىرەمىن, – دەدى ول.
گۇلايىم شىنتەمىرقىزى,
«ەگەمەن قازاقستان»
