«تۇلەكتەر كۇنى» وسى ءبىلىم ورداسىنىڭ رەكتورى, اكادەميك عالىم مۇتانوۆتىڭ باستاماسىمەن 2010 جىلدان بەرى اتالىپ كەلەدى. ۇرپاقتار ساباقتاستى, ولاردىڭ بىرلەسۋى مەن تۇلەكتەر باۋىرلاستىعىنىڭ وزىق داستۇرلەرى جالعاستىعىنىڭ سيمۆولى ىسپەتتەس وسى يگى شارا بيىل دا قازۇۋ قالاشىعىندا ورنالاسقان «ماڭگىلىك ەل» قاقپاسى الدىندا باستالدى. جيىنعا قاتىسۋشىلاردىڭ قاراسى مول بولدى. ءداستۇر بويىنشا بىرلىك پەن ىنتىماقتى, تۇراقتىلىق پەن بەرەكەنى ايقىندايتىن «تايقازان» جانە ءال-فارابي الاڭىنداعى «ماڭگىلىك ەل» سۋبۇرقاقتارى ىسكە قوسىلىپ, شىعىستىڭ ۇلى ۇستازىنىڭ ەسكەرتكىشى مەن قازاقتىڭ كورنەكتى عالىمى ومىربەك جولداسبەكوۆتىڭ مونۋمەنتىنە گۇل شوقتارى قويىلدى.
سالتاناتتى ءراسىمنىڭ نەگىزگى ءبولىمى ءو.جولداسبەكوۆ اتىنداعى ستۋدەنتتەر سارايىندا ءوتتى. بۇل جيىندا رەكتور عالىم مۇتانوۆ بايانداما جاساسا, «تۇلەكتەر قاۋىمداستىعى» كوپشىلىك الدىندا ەسەپ بەرەدى. ءار جىلدارى وسى قارا شاڭىراقتا ءبىلىم العان بەلگىلى قوعام قايراتكەرلەرى مەن زيالى قاۋىم وكىلدەرى ۋنيۆەرسيتەتتىڭ تاريحى مەن جەتىستىگىنە قىسقاشا توقتالا كەلە, تالاي تارتىمدى اڭگىمەلەردىڭ تيەگىن اعىتتى. «تۇلەكتەر كۇنى» مەرەكەسىندە 2018 جىلدىڭ ۇزدىك تۇلەكتەرىنە قۇرمەت گراموتاسى, كافەدرالارعا قۇندى سىيلىقتار بەرىلەدى.
سونىمەن قاتار قازۇۋ قالاشىعىندا «ماڭگىلىك ەل» ارحيتەكتۋرالىق كەشەندى ستەلانى تۇرعىزۋعا اكتسيا جاريالاندى. ەندى الداعى ۋاقىتتا وسى باعىتتا قىزۋ جۇمىستار جۇرگىزىلۋ كوزدەلۋدە. بۇل ستەلا 2019 جىلى ۋنيۆەرسيتەتتىڭ 85 جىلدىعى جانە «تۇلەكتەر قاۋىمداستىعىنىڭ» 25 جىلدىعىندا مەتسەناتتار مەن جۇرتشىلىقتىڭ قاتىسۋىمەن سالتاناتتى تۇردە اشىلادى.
عالىم سۇلەيمەن,
«ەگەمەن قازاقستان»
الماتى
