وتكەن اپتانىڭ اياعىندا قازاق سپورتشىسى نەۆا جاعالاۋىنا قايتا اتتاندى. «م-1» ۇيىمىنىڭ تولىققاندى چەمپيونى اتانۋ ءۇشىن ول بۇگىن, ياعني 24 مامىردا ۋكراينالىق الەكساندر دوسكالچۋكپەن كۇش سىناسادى. قارسىلاسى جايىندا ايتار بولساق, 28 جاستاعى چەرنوۆتسى قالاسىنىڭ تۋماسى پانكراتيوننان ەۋروپا چەمپيونى جانە الەم چەمپيوناتىنىڭ كۇمىس جۇلدەگەرى. ارالاس جەكپە-جەككە اۋىسقالى بەرى ول بىرقاتار حالىقارالىق تۋرنيرلەردە توپ جاردى. وسى كۇنگە دەيىن 8 رەت ايقاسقان دوسكالچۋك 7 مارتە جەڭىس تويىن تويلادى. 2017 جىلدىڭ قىركۇيەگىندە رەسەيلىك ۆاديم مالىگيندى «قىلقىندىرۋ» ادىسىمەن ۇتىپ, 56,7 كەلى سالماق دارەجەسى بويىنشا «م-1» ۇيىمىنىڭ چەمپيوندىق بەلبەۋىن يەلەندى.
الماتى قالاسىنىڭ ءدال ىرگەسىندە ورنالاسقان بەساعاش اۋىلىنىڭ تۇرعىنى ارمان ءاشىموۆ دجيۋ-دجيتسۋدان ەلىمىزدىڭ بىرنەشە دۇركىن چەمپيونى. ول 26 جاستا. ك-1 جانە كيكبوكستان وتكەن بىرقاتار حالىقارالىق تۋرنيرلەردىڭ جەڭىمپازى. جەكپە-جەكتەن الەم چەمپيونى. سپورتتىڭ بۇل ءتۇرى بويىنشا 10 كەزدەسۋ وتكىزىپ, 8 رەت جەڭىسكە جەتتى.
بىلتىرعى جىلدىڭ جازىندا «م-1» ۇيىمىنىڭ ماماندارىنىڭ نازارىنا ىلىگىپ, ولار ارمانعا ينگۋشەتيادا جالاۋى جەلبىرەگەن جارىستا كۇش سىناسۋ جونىندە ۇسىنىس ءبىلدىردى. قازاقتىڭ قايسار ۇلى سول كۇنگە دەيىن قارسى كەلگەندەردىڭ بارلىعىن قوعاداي جاپىرىپ جۇرگەن داعىستاندىق گادجيمۇرات اليەۆتى ۇرىپ جىعىپ, كوپشىلىكتىڭ قوشەمەتىنە بولەندى. سودان كەيىن تاعى ەكى مارتە ايقاس الاڭىنا شىققان ءاشىموۆ بۇل باسەكەلەردى دە مەرزىمىنەن بۇرىن اياقتادى. مىنە, ەندى سانكت-پەتەربۋرگتە چەمپيوندىق بەلبەۋ ءۇشىن تالاسادى.
عالىم سۇلەيمەن,
«ەگەمەن قازاقستان»
