مەملەكەت باسشىسى قازاقستاننىڭ ۇجىمدىق قاۋىپسىزدىك شارت ۇيىمىنا توراعالىق ەتۋ كەزەڭىندە ءوتىپ جاتقان قورعانىس مينيسترلەرىنىڭ كەڭەسى مەن قاۋىپسىزدىك كەڭەسىنىڭ حاتشىلارى كوميتەتىنىڭ سەسسياارالىق وتىرىستارىنا قاتىسۋشىلارعا ءىلتيپات ءبىلدىردى.
– سىزدەر وكىلدىك ەتىپ وتىرعان ۇجىمدىق قاۋىپسىزدىك شارت ۇيىمىنىڭ جارعىلىق ورگاندارى كەڭ اۋقىمدى ماسەلەلەردى قاراستىرادى. اتاپ ايتقاندا, اسكەري سالاداعى كوپ جاقتى ىنتىماقتاستىقتى دامىتۋ, حالىقارالىق تەرروريزمگە, زاڭسىز ەسىرتكى اينالىمىنا جانە زاڭسىز ميگراتسياعا قارسى كۇرەس جۇرگىزۋ, سونداي-اق ۇيلەسىمدى اقپاراتتىق ساياساتقا قاتىستى ۇستانىمداردى ازىرلەۋ ماسەلەلەرىن قاراستىرۋ كوزدەلىپ وتىر, – دەدى نۇرسۇلتان نازارباەۆ.
مەملەكەت باسشىسى الەمدە جانە وڭىردە كۇردەلى اسكەري-ساياسي احۋالدىڭ ساقتالىپ وتىرعانىن ايتتى, سونداي-اق حالىقارالىق تەرروريستىك ۇيىمداردىڭ بەلسەندى ارەكەت ەتىپ, اقپاراتتىق كەڭىستىككە تونەتىن قاۋىپ-قاتەردىڭ ارتىپ كەلە جاتقانىنا توقتالدى.
قازاقستان پرەزيدەنتى بىرلەسكەن وقۋ-جاتتىعۋلار مەن وپەراتسيالاردى جۇرگىزۋ بارىسىندا مەملەكەتارالىق بايلانىستاردى ۇيلەستىرۋ, ۇجىمدىق تەتىكتەردى جەتىلدىرۋ, سونداي-اق ءوزارا ءىس-قيمىلدى پىسىقتاۋ ءۇشىن قورعانىس ۆەدومستۆولارى مەن قاۋىپسىزدىك كەڭەستەرى اپپاراتتارىنىڭ ءرولى زور ەكەنىن اتاپ ءوتتى.
– بىرلەسكەن قىزمەت كەلىسىلگەن باعىتتا جانە ۇجىمدىق قاۋىپسىزدىك شارت ۇيىمىنىڭ 2025 جىلعا دەيىنگى دامۋ ستراتەگياسىندا ناقتىلانعان جارعىلىق مىندەتتەرگە سايكەس جۇرگىزىلۋگە ءتيىس. ءبىزدىڭ جەدەل ارەكەت ەتۋشى ۇجىمدىق كۇشتەرىمىز ءاردايىم وزدەرىنە جۇكتەلگەن مىندەتتەردى ورىنداۋعا دايىن, – دەدى نۇرسۇلتان نازارباەۆ.
قازاقستان پرەزيدەنتى الماتى وبلىسىندا وتكەن «كوبالت-2018» وقۋ-جاتتىعۋ شارالارىنىڭ ناتيجەلەرىنە توقتالدى.
قازاقستان پرەزيدەنتى جەدەل ارەكەت ەتۋشى ۇجىمدىق كۇشتەردى ماتەريالدىق-تەحنيكالىق تۇرعىدان قامتاماسىز ەتۋدىڭ ناقتى باعدارلامالارى مەن جوسپارلارىن ازىرلەۋ قاجەتتىگىنە نازار اۋداردى.
نۇرسۇلتان نازارباەۆ اسكەري-تەحنيكالىق ىنتىماقتاستىق سالاسىنداعى پراكتيكالىق شارالارعا ەرەكشە كوڭىل بولۋگە شاقىردى. ول ءۇشىن «KADEX-2018» كورمەسىنىڭ مۇمكىندىكتەرىن پايدالانۋ قاجەتتىگىن ايتتى.
– قازىر ۇجىمدىق قاۋىپسىزدىك شارت ۇيىمىنىڭ بىرىككەن شتابىنىڭ سانى ەداۋىر ءوستى. سوندىقتان ونىڭ جۇمىسى ساپالىق تۇرعىدان جاقسارادى دەپ ۇمىتتەنۋگە قۇقىمىز بار. قازاقستان حالىقارالىق تەرروريزمدى جالپى الەمدەگى جانە ۇجىمدىق قاۋىپسىزدىك شارت ۇيىمىنىڭ جاۋاپكەرشىلىگى اياسىنداعى ەڭ وتكىر پروبلەما دەپ سانايدى, – دەدى مەملەكەت باسشىسى.
قازاقستان پرەزيدەنتى حالىقارالىق تەرروريزمگە قارسى تۇرۋ ىسىندە ۇجىمدىق كۇش-جىگەردىڭ ءتيىمدى بولاتىنىن اتاپ ءوتتى.
سونىمەن قاتار نۇرسۇلتان نازارباەۆ ۇجىمدىق قاۋىپسىزدىك شارت ۇيىمىنىڭ حالىقارالىق قوعامداستىقپەن بايلانىسىن كەڭەيتۋ, شىنايى قاتەرلەرگە قارسى ءتيىمدى شارالار ۇيىمداستىرۋ, اقپاراتتىق جانە كيبەرقاۋىپسىزدىكتى قامتاماسىز ەتۋ ماسەلەلەرىنە توقتالدى.
سوڭىندا مەملەكەت باسشىسى قورعانىس مينيسترلەرى كەڭەسى مەن قاۋىپسىزدىك كەڭەستەرى حاتشىلارىنىڭ كوميتەتى ۇجىمدىق قاۋىپسىزدىك شارت ۇيىمىنىڭ ورتاق مىندەتتەرىن شەشۋگە زور ۇلەس قوساتىنىنا سەنىم ءبىلدىردى.
