قازاقستاندا رەسمي تۇردە مۋكوۆيستسيدوزعا شالدىققان 100 ناۋقاس تىركەلگەن. وتكەن جىلدان بەرى ەلىمىزدە بالالارداعى سيرەك اۋرۋلاردى دياگنوستيكالاۋ مەن ەمدەۋدىڭ جاڭا ستاندارتتارىن ەنگىزۋگە ارنالعان جول كارتاسى ىسكە اسا باستادى. وبلىس ورتالىقتارىندا ورفاندىق اۋرۋلار بويىنشا ۇيلەستىرۋشىلەر بار. ولار رەسپۋبليكالىق ورتالىقتارمەن بىرىگە وتىرىپ, ناۋقاستارعا مەديتسينالىق كومەك بەرەدى. ەلىمىزدە مۋكوۆيستسيدوزبەن اۋىراتىن بالالار تەگىن ەمدەلەدى.
اتالعان دەرتكە قاتىستى الماتىدا وتكەن «بالالارداعى مۋكوۆيستسيدوزدى دياگنوستيكالاۋ مەن ەمدەۋدىڭ وزەكتى ماسەلەلەرى» اتتى عىلىمي-تاجىريبەلىك كونفەرەنتسيا گەندىك اۋرۋدى ەمدەيتىن الەمنىڭ ۇزدىك دارىگەرلەرىنىڭ باسىن قوستى.
2016 جىلى 21 ماۋسىمدا CFW دۇنيەجۇزىلىك مۋكوۆيستسيدوز ۇيىمىنىڭ ديرەكتورلار كەڭەسىندە قازاقستاندىق مۋكوۆيستسيدوز قاۋىمداستىعىن CFW مۇشەلىگىنە قابىلداۋ, سونداي-اق قازاقستاندى قولداۋ تۋرالى وڭ شەشىم قابىلدانعان بولاتىن. ەكىجاقتى كەلىسىم اياسىندا شەتەلدىك ۇيىم قازاقستاندىق دارىگەرلەردى مۋكوۆيستسيدوزدى ەمدەۋدىڭ الەمدىك ستاندارتتارىنا وقىتۋ ءۇشىن وسى دەرتتەن ەمدەۋشى ەڭ ۇزدىك ماماندارىن ەلىمىزگە جىبەرىپ, دارىستەر ۇيىمداستىرۋدى ءوز مىندەتىنە العان-دى. ناتيجەسىندە ۇلىبريتانيانىڭ الدىڭعى قاتارلى گرەيت ورموند-ستريت جانە برومپتون كورولدىق اۋرۋحانالارىنىڭ گەندىك اۋرۋلاردى ەمدەيتىن ەڭ بىلىكتى دارىگەرلەرى كەلدى.
باسقوسۋدا بالالارداعى مۋكوۆيستسيدوزدى دياگنوستيكالاۋ مەن ەمدەۋ, اۋرۋدى دياگنوستيكالاۋدىڭ مەديتسينالىق-گەنەتيكالىق ماسەلەلەرى, ەمدەۋ جانە دارىلىك زاتتارمەن قامتاماسىز ەتۋ, كينەزيتەراپيا جانە ناۋقاستى وڭالتۋ ماسەلەلەرى تالقىلانىپ, وقىتۋ ءدارىسى بويىنشا قورىتىندى شىعارىلدى. ءارى قازاقستاندا مۋكوۆيستسيدوز ورتالىعىن سالۋ جايى تالقىلاندى.
«CFW دۇنيەجۇزىلىك مۋكوۆيستسيدوز حالىقارالىق ۇيىمىنا الەمنىڭ 72 ەلى مۇشەلىككە ەنگەن. ۇيىم 2001 جىلى قۇرىلعان. ءبىزدىڭ ۇيىم قايىرىمدىلىق ماقساتتا قۇرىلعاندىقتان جان-جاقتى كومەكتەسۋگە ءازىر. قۇرال-جابدىقتاردى جاقسارتۋعا, اۋرۋمەن كۇرەسۋدە كەڭەس بەرۋگە, دارىگەرلەردىڭ بىلىكتىلىكتەرىن ارتتىرۋ مەن پراكتيكالىق داعدىلارىن ءارى قاراي جەتىلدىرۋگە جانە ورتالىق اشۋدا تاجىريبەمىزبەن بولىسۋگە دايىنبىز», دەدى وسى ۇيىمنىڭ پرەزيدەنتى تەرري ستيۋارت.
«پەدياتريا جانە بالالار حيرۋرگياسى عىلىمي ورتالىعى 2011 جىلدان باستاپ سيرەك كەزدەسەتىن اۋرۋلار بويىنشا ۇيلەستىرۋشى بولىپ بەلگىلەنگەن. سوندىقتان دارىگەرلەردىڭ ءبىلىمى مەن بىلىكتىلىگىن كوتەرۋ, اۋرۋدى ەرتە انىقتاۋ مەن ەمدەۋ بويىنشا رەسەي, گەرمانيا سىندى ەلدەردىڭ بىلىكتى ماماندارىمەن بايلانىس ورناتىپ, ءتۇرلى سەمينار, دوڭگەلەك ۇستەلدەر, دارىستەر مەن شەبەرلىك سىنىپتارى وتكىزىلىپ تۇرادى. سيرەك اۋرۋى بار ناۋقاستاردى ەرتە باستان انىقتاۋ اسا ماڭىزدى. ويتكەنى ونىڭ بەلگىلەرى باسقا ءتۇرلى اۋرۋلاردىڭ بەلگىلەرى سياقتى بولۋى مۇمكىن. سيرەك اۋرۋلاردى قاراۋ بويىنشا ارنايى زەرتتەۋلەر دە جۇرگىزىلەدى. دياگنوستيكالاۋ جولعا قويىلىپ كەلەدى. بۇل دەرتتى ەمدەۋ مەن دياگنوستيكالاۋ بويىنشا ارنايى 2017-2019 جىلدارعا ارنالعان جول كارتاسى جاسالدى, ءنورماتيۆتى-قۇقىقتىق قۇجاتتار بەكىتىلدى. ەلىمىزدىڭ ءار وبلىسىندا ايماقتىق ۇيلەستىرۋشىلەر تاعايىندالدى», دەيدى پەدياتريا جانە بالالار حيرۋرگياسى عىلىمي ورتالىعى ديرەكتورىنىڭ پەدياتريا جونىندەگى ورىنباسارى ءلاززات مانجۋوۆا.
سيرەك كەزدەسەتىن ورفاندىق اۋرۋلار مۇگەدەكتىككە, ءومىردىڭ قىسقارۋىنا الىپ كەلۋى مۇمكىن سوزىلمالى كۇردەلى, ومىرگە قاۋىپتى اۋرۋلار. بۇگىندە سيرەك كەزدەسەتىن اۋرۋلاردىڭ 7 مىڭنان استام ءتۇرى بەلگىلى جانە بۇل ءتىزىم ۇنەمى ارتىپ كەلەدى. كوپ جاعدايدا بۇل گەنەتيكالىق اۋرۋ, الايدا سيرەك كەزدەسەتىن اۋرۋلار اراسىندا ينفەكتسيالىق, اۋتويممۋندىق نەمەسە ۋىتتى سيپاتتاعى اۋرۋدىڭ تۇرلەرى دە بار. وكىنىشكە قاراي كوپتەگەن سيرەك اۋرۋلاردىڭ پايدا بولۋ سەبەپتەرى بەلگىسىز بولىپ قالۋدا. اۋرۋدىڭ بەلگىلەرى تۋا سالا نەمەسە جۇرە كەلە ءبىلىنۋى مۇمكىن. دەر كەزىندە ناقتى دياگنوز قويۋ دا قيىن. ويتكەنى سيرەك اۋرۋلاردىڭ كوپشىلىگى باسقا اۋرۋلاردىڭ بەلگىسى تۇرىندە بىلىنەدى. قازاقستاندا تارالۋى جاعىنان رەسەيدەگىدەي 10 مىڭ ادامعا شاققاندا 1 جاعدايدان كەزدەسەدى.
ايناش ەسالي,
«ەگەمەن قازاقستان»
الماتى
