ءىس-شاراعا مادەنيەت جانە سپورت مينيسترلىگى مادەنيەت جانە ونەر ىستەرى دەپارتامەنتىنىڭ ديرەكتورى ءابىل جولامانوۆ جانە وڭىرلەردەگى مادەنيەت باسقارمالارىنىڭ باسشىلارى, رەسپۋبليكالىق مارتەبەگە يە مۋزەي-ۇيلەردىڭ ديرەكتورلارى مەن جەتەكشى قىزمەتكەرلەرى كەلىپ قاتىستى.
سالتاناتتى شارانى اشقان دەپارتامەنت ديرەكتورى ءابىل جولامانوۆ: «مۋزەي – ۇلتتىق عىلىم مەن مادەنيەتتىڭ قورى جيناقتالعان مەكەمە. ەلىمىز تاۋەلسىزدىك العالى جاڭادان 75 مۋزەي اشىلىپتى. قازىرگى تاڭدا ول حالقىمىزدىڭ تاريحى مەن ەتنوگرافياسىن ناسيحاتتايتىن بىردەن-ءبىر ورىنعا اينالىپ وتىر. بۇنىڭ بارلىعى مەملەكەت تاراپىنان مادەنيەت-رۋحانيات سالاسىنا قولداۋ ءبىلدىرىلىپ كەلە جاتقاندىعىنىڭ ايعاعى» دەدى.
ءوز كەزەگىندە ءسوز العان ۇلتتىق مۋزەي ديرەكتورىنىڭ مىندەتىن اتقارۋشى لەونيد كوچەتوۆ, مادەني مۇرالاردى ساقتاپ, ونى ناسيحاتتاۋعا, جاستاردىڭ تاريحي ساناسىن جاڭعىرتۋ ىسىندە مۋزەيدىڭ الاتىن ورنى ەرەكشە ەكەنىن ايتا وتىرىپ, بۇگىنگى تاڭدا بۇل مەكەمەنىڭ باستى مىندەتى – حالىقتى ءوزىنىڭ تاريحى, ونەر-مادەنيەتىمەن ءجىتى تانىستىرىپ, كەلەر ۇرپاقتى ۇلتتىق قۇندىلىقتاردى قاستەرلەۋگە ۇيرەتۋ, – دەپ ءسوزىن تۇيىندەدى.
سونداي-اق ەلباسى ن.ءا.نازارباەۆتىڭ «تسيفرلى قازاقستان» باعدارلاماسىنىڭ اياسىندا جارىق كورىپ, اتالمىش شارا بارىسىندا تۇساۋى كەسىلگەن «قازاقستان مۋزەيلەرى» انىقتامالىعى ەلىمىزدىڭ بارلىق مادەني مەكەمەسى مەن ۇيىمدارى جانە جەكە تۇلعالارعا ارنالعان قۇندى ەڭبەك دەسەك جاراسادى. بۇل ەڭبەككە رەسپۋبليكا اۋماعىندا ورنالاسقان 238 مۋزەي جايلى ەلەكتروندى كارتا ەنگىزىلىپ, ول 3D فورماتىندا جاسالىپتى. وسى ارقىلى ساياحاتشى-تۋريستەردىڭ ەلىمىزدەگى مۋزەيلەر تۋرالى تولىق اقپارات الۋعا مۇمكىندىگى بار.
بەكەن قايرات ۇلى,
«ەگەمەن قازاقستان»
