قازاقستان • 21 مامىر، 2018

الماتىدا «مۋزەي ءتۇنى» ءوتتى

469 رەتكورسەتىلدى

قازاقستان رەسپۋبليكاسى مەملەكەتتىك ورتالىق مۋزەيى حالىقارالىق مۋزەيلەر كۇنى مەرەكەسىنە ارنالعان «مۋزەي ءتۇنى» اتتى ءىس-شاراسىن وتكىزدى. ءىس-شارانىڭ بيىلعى جىلعى ۇرانى – «گيپەركوممۋنيكاتسيا داۋىرىندەگى مۋزەيلەر».

جىل سايىن «مۋزەي ءتۇنى» اكتسياسى تۇراقتى جانە دە جاڭا دەمەۋشىلەردىڭ قولداۋىمەن وتكىزىلەدى. «مۋزەي ءتۇنى-2018» ءىس-شاراسىنىڭ باس دەمەۋشىسى - «RUSLAN BAIDALINOV  PROMOTION GROUP» كومپانياسى.

 «مۋزەي ءتۇنى» – ورتالىق مۋزەي 2006 جىلدان بەرى جۇزەگە اسىرىپ كەلە جاتقان حالىقارالىق ءىرى الەۋمەتتىك مادەني-ءبىلىم بەرۋ جوباسى.  ءدال وسى ءتۇنى مۋزەي ءتۇرلى جاستاعى، ءتۇرلى كوزقاراستاعى ادامداردى، ءتۇرلى ۇلتتار مەن ۇلىستاردى توعىستىرىپ قانا قويماي، كوڭىل كوكجيەگىن كەڭەيتىپ، ءتول مادەنيەتىمىزدىڭ نارىنەن سۋسىنداۋعا شاقىرادى. مۋزەي ءتۇنىنىڭ فورماتى جىل سايىن وزگەرىپ وتىرادى. بۇل جولى الماتىلىقتار مەن قالا قوناقتارىنا جاڭا باعدارلاما، ونىڭ ىشىندە مۋزەيدىڭ قور كوللەكتسياسى نەگىزىندە قۇرىلعان كورمەلەر مەن قازاقستان سۋرەتشىلەرىنىڭ اۆتورلىق جۇمىستارى قويىلعان كورمەلەر ۇسىنىلدى:

« ۇلى جىبەك جولىنداعى ورتاعاسىرلىق قالالار: قىش ىدىستاعى ويۋ-ورنەكتەر (مۋزەي قورىنداعى كەراميكالىق ماتەريالدار نەگىزىندە)» كورمەسى قازاقستان اۋماعىنداعى قالىپتالعان جانە شىڭدالعان كەراميكالىق بۇيىمداردى اشەكەيلەۋدە پايدالانىلعان ءتۇرلى ورنەكتەر تۋرالى ماعلۇمات بەرەدى.

«جاڭعىرعان مۇرا» كورمەسىندە مۋزەي زەرتحانالارىندا قايتا قالپىنا كەلتىرىلگەن زەرگەرلىك بۇيىمدار مەن ءداستۇرلى بەلبەۋلەر قويىلدى.

«ادام. ءداۋىر. بايلانىس» كورمەسىندە ەرتە پەتروگليفتەردەن باستاپ بۇگىنگى كۇنگە دەيىنگى زاتتار مەن بايلانىس قۇرالدارى تانىستىرىلدى.

«رۋحانيات ەسكەرتكىشتەرى» – ءۇش ءدىننىڭ بىرەگەي جازبا ەسكەرتكىشتەرىنىڭ ۇلگىلەرى: تاۋرات، ءىنجىل، قۇران.

«ساعىم. پلەنەر. حانشايىمدار ويىنى»كورمەسىندەسۋرەتشى اننا مارگاتسكايانىڭ قولىنان شىققان كەسكىندەمە، اكۆارەل، كەراميكالىق بۇيىمدار ۇسىنىلدى.

«رۋحاني جاڭعىرۋ» باعدارلاماسىنىڭ بولىگى – بەستومدىق ىرگەلى «قازاقتىڭ ەتنوگرافيالىق كاتەگوريالار، ۇعىمدار مەن اتاۋلارىنىڭ ءداستۇرلى جۇيەسى» عىلىمي-ەتنوگرافيالىق ەنتسيكلوپەدياسىنىڭ تولىقتىرىلعان ەكىنشى باسىلىمىنىڭ تۇساۋكەسەرى كەشتىڭ كوركىن كەلتىرەرى حاق.

كۇنى بويى وتەتىن ينتەراكتيۆتى ەكسپوزيتسيالار اياسىندا كەلۋشىلەر وتكەن داۋىرلەر تاريحىنان باستاپ قازىرگى جاڭاشىلدىقتارعا دەيىنگى ماعلۇماتتاردى الىپ، قىزعىلىقتى ۋاقىت وتكىزدى:

ء«ان اتاسى – امىرە» ادەبي-مۋزىكالىق مۋزەيلىك ساباعى كورنەكتى قازاق ءانشىسى امىرە قاشاۋباەۆتىڭ ءومىرى مەن شىعارماشىلىق جولىمەن تانىستىردى. ساباق اباي اتىنداعى رەسپۋبليكالىق مەكتەپ-ينتەرناتى، «كوكىل» مۋزىكالىق مەكتەبى، ا.جۇبانوۆ اتىنداعى مۋزىكالىق مەكتەپتىڭ قاتىسۋىمەن ءىى ەكسپوزيتسيالىق زالدا ءوتتى.

«اجەمنىڭ ساندىعىنداعى زاتتاردىڭ تاريحى» ساياحات-ويىنى ارقىلى قازاقتاردىڭ تۇرمىس-تىرشىلىگى تانىستىرىلادى. سۇقبات قۇرۋ، تاقىرىپتىق تاپسىرمالاردى ورىنداۋ جانە ويىن تاسىلدەرىنقولدانۋ ارقىلى مۋزەي كوڭىل كوتەرۋ ورنى عانا ەمەس، جادىنى دامىتىپ، شىعارماشىلىق الاڭىنا اينالدى.

«ورتاعاسىرلىق كەراميكاداعى بەينەلى ورنەكتەر: قازىرگى كوزقاراستار» ينتەراكتيۆىنە قاتىسۋشىلار كەراميكالىق بۇيىم جانە ساۋلەتتىك قاپتاۋىشتاعى اشەكەيلەۋ  ەلەمەنتتەرىن سۋرەت بەتىنە نەمەسە تۇزدى قامىردان جاسالعان بۇيىمدارعا ءتۇسىرۋ مۇمكىندىگىنە يە بولدى. «بەلگىلى زاتتىڭ بەلگىسىز قىرلارى» (قازاقتاردىڭ سيرەك كەزدەسەتىن تۇرمىستىق زاتتارى) جانە «جاڭىلتپاق»  قازاق ۇلتتىق ويىنى.

مەرەكە كۇنى كەلۋشىلەرگە ءى، ءىى، ءىىى، ءىV زالدار – «پالەنتولوگيا جانە ارحەولوگيا»، «تاريحي ەتنوگرافيا»، « ۇلى وتان سوعىسى جىلدارىنداعى قازاقستان جانە دياسپورالار مادەنيەتى»، «تاۋەلسىز قازاقستان» زالدارىنا تەگىن كىرىپ، ەكسكۋرسيا تىڭداۋ مۇمكىندىگى بەرىلدى.

مەرەكەلىك كەشتى بەلگىلى شوۋمەندەر – دانيەل دجەيمس،  تىلەۋحان ومارحان، رۋسلان بايدالينوۆ جۇرگىزدى. ءىس-شارانى ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ حورەورگافيا فاكۋلتەتىنىڭ «Asianstudentsdance-ASD» بي تەاترى مەن ۆوكالشىلارى باستادى. ودان كەيىن ەلىمىزدىڭ تانىمال انشىلەرى مۋزىكالىق سالەمدەرىن جولدادى.

سونىمەن قاتار مۋزەيدىڭ بىلىمقۇمار جانە شىعارماشىل كەلۋشىلەرى ءۇشىن شەبەرلىك  ساباقتارى ءوتتى. وعان ءا.قاستەەۆ اتىنداعى ونەر جانە ديزاين مەكتەبى، قازاقستان-جاپون ورتالىعى، و.تاڭسىقباەۆ اتىنداعى ساندىك-قولدانبالى ونەر كوللەدجى قاتىستى. و.تاڭسىقباەۆ اتىنداعى ساندىك-قولدانبالى ونەر كوللەدجى اتىنان «التىن تىنىس» ەتنيكالىق كوللەكتسياسى جانە الماتى مەملەكەتتىك سەرۆيس جانە تەحنولوگيالار كوللەدجى اتىنان «جۇماقتاعى باقشا» اتتى شاش جانە بەت ارلەۋ ۇلگىلەرىنىڭ كوللەكتسياسىن ۇسىندى.   

كەلۋشىلەر «سەيشن» ارت-بالەتىنىڭ ورىنداۋىندا «تەڭىز» ءۇش ولشەمدى شوۋى، «Fire Sunset» كومپانياسىنىڭ، «Ratatui»،  «Show_Ballet_Furore» اگەنتتىكتەرىنىڭ،  «كۋدەسنيكي» كومپانياسىنىڭ باعدارلامالارىن تاماشالادى. سونداي-اق پارفيۋمەرلىك جانە ساۋىقتىرۋ ونىمدەرىن ۇسىناتىن كومپانيالار جاڭا ترەندتەرمەن تانىستىردى.

ساپارباي پارمانقۇل،

«ەگەمەن قازاقستان»

  الماتى                                   

سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار