ءحى استانا ەكونوميكالىق فورۋمى اياسىندا «ارتىقشىلىق ورنىنا قۇقىق. ايەلدەر كوشباسشىلىعى قازىرگى الەمگە قالاي اسەر ەتۋى مۇمكىن؟» اتتى دوڭگەلەك ۇستەل وتىرىسى ءوتتى.
ءىس-شارانى قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قولداۋىمەن «EXPO & Women» حالىقارالىق ۇيىمى قازاقستانداعى «بۇۇ-ايەلدەر» قۇرىلىمىمەن بىرلەسىپ ۇيىمداستىردى.
سونداي-اق, جيىنعا مەملەكەتتىك ورگانداردىڭ, حالىقارالىق ۇيىمداردىڭ وكىلدەرى, شەتەلدىك جانە ۇلتتىق ساراپشىلار قاتىستى.
وتىرىستى اشقان گۇلشارا ابدىقالىقوۆا الەمنىڭ كوپتەگەن دامىعان مەملەكەتتەرى ايەل كاپيتالىن دامىتۋ ارقىلى ينكليۋزيۆتى ەكونوميكانى قالىپتاستىرۋ قاجەتتىگىن تۇسىنگەنىن ايتتى.
– قازاقستاننىڭ مەملەكەتتىك ساياساتىنىڭ نەگىزگى باسىمدىعىنىڭ ءبىرى – ايەلدەر قۇقىعىن قامتاماسىز ەتۋ جانە ىلگەرىلەتۋ, سونداي-اق ولاردىڭ ەكونوميكالىق مۇمكىندىكتەرىن كەڭەيتۋ ماسەلەلەرى بولىپ سانالادى, – دەدى مەملەكەتتىك حاتشى.
گ.ابدىقالىقوۆا نۇرسۇلتان نازارباەۆتىڭ «شەشىمدەر قابىلداۋ دەڭگەيىندە ايەلدەر وكىلدىگىنىڭ كەڭەيۋىنە قول جەتكىزۋ قاجەت» دەگەن ءسوزىن اتاپ ءوتتى.
بۇگىندە قازاقستاننىڭ قارجى سالاسىندا باسشىلىق قىزمەتتەگى ايەلدەردىڭ سانى 30 پايىزدان استى. ايەلدەر 500-دەن استام شاعىن جانە ورتا بيزنەس كومپانيالارىن باسقارۋدا, ياعني ولاردىڭ 43 پايىزىن قۇراپ وتىر. وسى سەكتوردا قۇرىلعان بارلىق جۇمىس ورنىنىڭ ۇشتەن ءبىرى ايەلدەرگە تيەسىلى.
مەملەكەتتىك حاتشى ايەلدەردىڭ الەۋەتى مەن ءرولىن ارتتىرۋ بۇكىل الەمنىڭ ىلگەرىلەۋىمەن تىكەلەي بايلانىستى ەكەنىن اتاپ ءوتتى. وعان قول جەتكىزۋ ءۇشىن بۇۇ ۇسىنعان تورت ك باعىتىنا نەگىزدەلگەن جاڭا ماشىقتاردى مەڭگەرۋ قاجەت. ولار: سىني ويلاۋ, كوللابوراتيۆتىلىك, كرەاتيۆتىلىك جانە كوممۋنيكاتيۆتىلىك. الەم ساراپشىلارىنىڭ بولجامى بويىنشا, 2020 جىلعا قاراي بۇگىنگى ەڭبەك قىزمەتىن ايقىندايتىن ءبىلىم مەن داعدىلاردىڭ ۇشتەن بىرىنەن استامى وزگەرەتىن بولادى.
جيىن قورىتىندىسى بويىنشا گەندەرلىك مەينستريمينگتى ىلگەرىلەتۋ ءۇشىن ساياساتتاعى, ەكونوميكاداعى جانە قوعامداعى ايەلدەر كوشباسشىلىعىن دامىتۋعا باعىتتالعان ۇسىنىمدار ازىرلەندى.
