اۋىر دەرتكە شالدىققان بالالارعا قارجىلىق دەمەۋ كورسەتۋدى ماقسات ەتكەن كەش قازاقستان حالقى اسسامبلەياسىنىڭ ءححۇى سەسسياسىندا ەلباسى بەلگىلەپ بەرگەن قايىرىمدىلىق قاعيداتتارى اياسىندا ءوتىپ, اسەم ءان مەن مىڭ بۇرالعان بيگە جالعاستى.
كونتسەرتتىك باعدارلامادان كەيىن اۋكتسيون ءوتىپ, 30 لوت وينالدى. وعان ەسىمدەرى تورتكۇل دۇنيەگە جاقسى تانىس سپورتشىلار سەرىك ساپيەۆ پەن جانات جاقيانوۆتىڭ فۋتبولكالارى, الەكساندر ۆينوكۋروۆتىڭ ءومىربايانى جازىلعان كىتاپ قويىلدى. جەرلەسىمىز جاناتتىڭ سپورتتىق جەيدەسىن پەتروپاۆلدىق كاسىپكەرلەر اندرەي يساكوۆ پەن وكسانا زاحاروۆا 800 مىڭ تەڭگەگە ساتىپ الدى. جەرگىلىكتى سۋرەتشى ءاليا مۇقىشەۆانىڭ كارتينالارى 220 مىڭ تەڭگەگە ساتىلدى. التى ءورىمدى تاسپا قامشىنىڭ باستاپقى باعاسى 15 مىڭ تەڭگە بولسا, 60 مىڭ تەڭگەگە الۋشىسى تابىلدى.
اينالاسى بىرەرە ساعاتتىڭ ىشىندە 4 ميلليون 642 مىڭ تەڭگە جينالىپ, قاراجات ءامىر عابدۋللين, كارينا بايمولدينا جانە ۆلاديسلاۆا گولوۆىرينانىڭ ەم-دومىنا تەڭدەي بولىنەتىن بولادى.
«وبلىستىق اسسامبلەيا «بىرلىك–قايىرىمدىلىق» ۇرانىمەن بۇعان دەيىن ەكى قايىرىمدىلىق بالىن وتكىزپ, بەس ميلليون تەڭگە تۇسكەن بولاتىن. بۇل قاراجات جەتى بالانىڭ دەنساۋلىعىن جاقسارتۋعا جۇمسالعان. مۇنداي يگىلىكتى شارالار الدا دا جالعاسىن تابادى», دەيدى «قوعامدىق كەلىسىم» كمم باسشىسى اسەمگۇل ەسقوجا.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى
