بۇل ءىس-شارانى ۇيىمداستىرۋداعى ماقسات – وسكەلەڭ ۇرپاقتى ازاماتتىق, ار-نامىس جانە پاتريوتتىق رۋحتا تاربيەلەۋ, سونداي-اق قوعامدا باتىر بالالاردىڭ ەرلىك ىستەرىن بايانداۋعا مۇمكىندىك جاساپ, كىشكەنتاي باتىرلارعا العىس ءبىلدىرۋ.
ماراپاتتاۋ راسىمىنە ەلىمىزدىڭ ءار تۇكپىرىنەن 20 باتىر بالا شاقىرىلعان بولاتىن. ولار ەرلىك ارەكەتتەرى ءۇشىن ەشقانداي ماراپات الماعان بالالار.
– مەن سىزدەرگە ۇلكەن قۇرمەت كورسەتە وتىرىپ, استانا قالاسىنا قوش كەلدىڭىزدەر دەيمىن. ەلىمىزدىڭ جۇرەگى – استانا بيىل ءوزىنىڭ 20 جىلدىق مەرەيتويىن اتاپ وتەدى. مەملەكەت باسشىسى نۇرسۇلتان نازارباەۆتىڭ كورەگەن ساياساتىنىڭ ارقاسىندا بۇگىندە استانا تاۋەلسىز قازاقستاننىڭ ماقتانىشىنا اينالدى. استانا تەك قانا ەلىمىزدىڭ قوعامدىق-ساياسي, ەكونوميكالىق جانە مادەني ءومىردىڭ ورتالىعى ەمەس, بۇكىل ەۋرازيا كەڭىستىگىنىڭ جۇرەگى سانالادى, – دەدى قالمۇحانبەت قاسىموۆ ماراپاتتاۋ راسىمىندە.
– ەلوردانىڭ تۋعان كۇنى قارساڭىندا استاناعا ەلىمىزدىڭ ءار تۇكپىرىنەن ءجاسوسپىرىم باتىرلار كەلدى. بۇل بالالاردىڭ بارلىعى دا قىسىلتاياڭ شاقتا ەرجۇرەكتىك كورسەتىپ, ادام ومىرىنە اراشا بولعاندار. سىزدەر قازىردىڭ وزىندە كوپكە ۇلگى تۇتاتىن جاندارسىزدار. وسى ورايدا سىزدەردىڭ اتا-انالارىڭىزعا, مۇعالىمدەرىڭىزگە جانە وزدەرىڭدى تاربيەلەپ جۇرگەن تالىمگەرلەرىڭىزگە زور العىسىمدى بىلدىرەمىن. ەلىمىزدە وزدەرىڭىز سياقتى باتىر بالالار باردا الدىڭعى اعا بۋىن قازاقستاننىڭ بولاشاعىنا سەنىممەن قارايدى. ءبىز سىزدەردى جانە سىزدەردىڭ ەرلىكتەرىڭىزدى ماقتان تۇتامىز, – دەپ اتاپ ءوتتى مينيستر.
قالمۇحانبەت قاسىموۆ بارلىق بالالارعا دەنساۋلىق, تابىس تىلەپ, بولاشاقتا دا وسىنداي باتىر, قىراعى, رۋحى كۇشتى, ەرجۇرەك قالىپتارىن ساقتاپ, بيىكتەردەن كورىنە بەرۋلەرىنە اعالىق تىلەكتەستىگىن جەتكىزدى. بۇدان سوڭ ق.قاسىموۆ باتىر بالالاردى ءوز قولىمەن «توتەنشە جاعدايداعى ەرلىگى ءۇشىن» مەدالدارىمەن ماراپاتتاپ, باعالىق سىيلىقتار ۇسىندى.
سالتاناتتى ءىس-شارا بارىسىندا بالالار قۇرمەتتى قاراۋىلدىڭ ونەرلەرىن, اسكەري وركەستردىڭ ورىنداۋىندا پاتريوتتىق جانە اسكەري كومپوزيتسيالاردى تاماشالادى. وقۋشىلار سارايىنا جانە استانانىڭ كورىكتى جەرلەرىنە ساياحات جاسادى.
