– ەلباسىنىڭ «رۋحاني جاڭعىرۋ» باعدارلاماسى اياسىندا ورال قالالىق ءبىلىم بەرۋ ءبولىمى ارنايى ەرەجە بەكىتىپ, سول ەرەجە بويىنشا بارلىق قالا مەكتەپتەرىندە اشىق ەسىك كۇندەرى وتكىزىلىپ جاتىر. تاعى ءبىر وقۋ جىلىن قورىتىندىلار قارساڭدا ءبىلىم وردالارىنىڭ جۇمىس ناتيجەسىنە, جاس ۇرپاققا قانداي ءبىلىم بەرىپ جاتقانىنا كۋا بولىپ كەلەمىز. بۇگىن ءبىز جۇمىسىمەن تانىسقان №47 مەكتەپتە دە جاقسى باستامالار كوپ ەكەن. الدا تۇرعان ءبىلىم سىناعى – مەملەكەتتىك اتتەستاتسيادان تۇلەكتەر وتە جاقسى ءوتسىن! – دەيدى ورال قالالىق ءبىلىم ءبولىمىنىڭ وكىلى جازيرا رىسقازيەۆا.
№47 مەكتەپ – 2015 جىلى قىركۇيەكتە اشىلعان جاڭا ءبىلىم ورداسى. 1200 وقۋشىعا ارنالعان عيماراتتا قازىردىڭ وزىندە 2300-دەي بالا وقيدى. مەكتەپتى 2016 جىلى – 45 تۇلەك, 2017 جىلى 46 تۇلەك بىتىرگەن. ال بيىل 69 وقۋشى بىتىرگەلى وتىر.
– وسى تۇلەكتەردىڭ وزدەرى جانە اتا-انالارى بىزگە ۇسىنىس ايتىپ, مەكتەپ اۋلاسىنا تال-تەرەك ەگۋ ءۇشىن ورىن سۇرادى. بۇل كەرەمەت باستاما عوي. بۇيىرسا, مەكتەپ اۋلاسىندا تۇلەكتەر اللەياسىن جاساپ, ساياباققا اينالدىرعىمىز كەلەدى. مىنە بيىل بىتىرگەلى وتىرعان ءۇش سىنىپ وقۋشىلارى «تۋعان مەكتەپكە تاعزىم» اكتسياسىن باستاپ, 16 ءتۇپ اق قايىڭ كوشەتىن وتىرعىزدى, – دەيدى مەكتەپ ديرەكتورى ناتاليا ەرعوجيەۆا.
تۇلەكتەر اللەياسىنىڭ العاشقى كوشەتتەرىن ەككەن ونبىرىنشىسىنىپتىقتار اتىنان ارۋجان يباتوللا وسى مەكتەپتىڭ 4 ء«ا» سىنىبىندا وقيتىن امانەر اماندىققا «جاس كوشەتتەرگە سۋ قۇيىپ, قامقور بولىپ جۇرىڭىزدەر» دەگەن ءوتىنىش-اماناتىن ايتتى.
ءبىلىم ورداسىندا وقۋشىلاردىڭ اتا-اناسى ىقىلاستانا قولداپ كەتكەن تاماشا اكتسيانىڭ ءبىرى – «مەكتەپكە كىتاپ سىيلايىق» شاراسى بولىپتى. شىنى كەرەك, جاڭا مەكتەپ بولعاندىقتان, مۇنداعى كىتاپحانادا وقۋشىلارعا ۇسىناتىن ادەبي-تانىمدىق كىتاپتار تاپشى بولاتىن. ويتكەنى بۇگىندە مەكتەپ كىتاپحانالارىنا وقۋلىقتان وزگە كىتاپتار الۋعا قارجى بولىنبەيدى.
– مەكتەبىمىزدە 90 كومپلەكت-سىنىپ بولسا, ولاردىڭ ءبارى دە وسى اكتسياعا بەلسەنە قاتىستى. ناتيجەسىندە كىتاپحانامىز ءبىر كۇندە 486 كىتاپپەن تولىقتى! بۇلاردىڭ ىشىندە ادەبي كىتاپتار دا, بالالار ادەبيەتى دە, تانىمدىق باسىلىمدار دا بار, – دەيدى مەكتەپ كىتاپحاناسىنىڭ مەڭگەرۋشىسى كامشات بازارباەۆا.
اشىق ەسىك كۇنى اياسىندا وسى مەكتەپتىڭ وقۋشىسى رۇستەم سايرانوۆتىڭ تۇڭعىش ولەڭدەر جيناعىنىڭ تۇساۋى كەسىلدى.
قازبەك قۇتتىمۇرات ۇلى,
«ەگەمەن قازاقستان»
ورال
سۋرەتتى تۇسىرگەن اۆتور
