وسى ورايدا ماڭعىستاۋ وبلىستىق سوتىنىڭ توراعاسى جاقسىلىق الانوۆ جەرگىلىكتى ەكىنشى دەڭگەيلى بانك باسشىلارىن داۋلاردى شەشۋدە مەدياتسيانى قولدانۋدى كەڭەيتۋ جۇمىسىنا اتسالىسۋعا شاقىرىپ كەلەدى.
ماڭعىستاۋ وبلىستىق سوتىنىڭ ۇيىمداستىرۋىمەن وسى ماقساتتا وبلىستىق سوت توراعاسى جاقسىلىق الانوۆ باستاعان سۋديالار قاۋىمداستىعى ماڭعىستاۋ وبلىسى اۋماقتىق نوتارياتتىق پالاتاسىنىڭ توراعاسى راحات تۋرەباەۆامەن جانە «Fortebank» اق-نىڭ ماڭعىستاۋ وبلىسى بويىنشا فيليالىنىڭ ديرەكتورى, ەكىنشى دەڭگەيلى بانكتەر قاۋىمداستىعىنىڭ توراعاسى اببات ۋريسباەۆپەن كەزدەستى.
باسقوسۋدىڭ نەگىزگى ءمانى – قوعامدا سانى ارتىپ وتىرعان بانكتىك داۋلاردى سوتقا دەيىن رەتتەۋدىڭ تەتىكتەرىن قاراستىرۋعا, بانكتەردىڭ داۋسىز تالاپتار بويىنشا سوتقا دەيىن نوتاريۋسقا جۇگىنۋىن جولعا قويۋ ماسەلەلەرىن تالقىلاۋعا ارنالدى.
ازاماتتىق ىستەر جونىندەگى سوت القاسىنىڭ توراعاسى نۇرساپا پريماشەۆ ماڭعىستاۋ وبلىسىندا ازاماتتىق ىستەر سانى سوڭعى ۋاقىتتا ەكى ەسەگە كوبەيىپ كەتكەنىن, سونىڭ ىشىندە ىستەردىڭ 60 پايىزى بانكتىك كەلىسىم شارتتارعا بايلانىستى ەكەنىن اتاپ ايتتى. وسى ورايدا داۋ ءمانى جوق ىستەردىڭ دە سوت ارقىلى شەشىلەتىنى ستاتيستيكانى ۇلعايتىپ وتىرعانىن تىلگە تيەك ەتتى.
«نوتاريات تۋرالى» قر زاڭى تالابىنا ساي نوتاريۋستەرگە داۋدى سوتقا دەيىن رەتتەۋ قۇقىعى, ونىڭ ىشىندە اتقارۋشىلىق جازبا جاساقتاۋ قۇقىعى بەرىلگەن. نوتاريۋس سالاسىندا ۇزاق جىلعى جۇمىس تاجىريبەسى بار راحات تۋرەباەۆا داۋسىز تالاپتار بويىنشا اتقارۋشىلىق جازبا ارقىلى داۋدى شەشۋدىڭ تەز ءارى ۇتىمدى ەكەنىن اتاپ ايتتى. ءوز كەزەگىندە ءسوز العان اببات ۋريسباەۆ: «ازاماتتاردىڭ قۇقىقتىق-قارجىلىق ساۋاتتىلىعى جىلدان جىلعا ارتىپ كەلەدى. سونىڭ ارقاسىندا بانكتىك كەلىسىم شارتتار بويىنشا سوتقا جۇگىنۋشى ازاماتتار قاتارى ارتۋدا. قازىرگى جاعدايدا سوتتارمەن بىرگە ەكىنشى دەڭگەيلى بانكتەر دە كوپتەگەن شىعىن مەن جۇكتەمەگە تاپ بولۋدا. وسى ورايدا وبلىستىق سوت توراعاسى جاقسىلىق رزابەك ۇلىنىڭ بىرقاتار بانكتىك داۋلاردى سوتقا جەتكىزبەي, مەدياتسيا ارقىلى شەشۋ تۋرالى ءتيىمدى ۇسىنىسىن قۋانا قولدايمىز», - دەدى.
قاتىسۋشىلار جيىن سوڭىندا داۋلاردى سوتقا دەيىنگى جانە سوتتان تىس رەتتەۋ ينستيتۋتىن قولدانۋ اياسىن كەڭەيتىپ, قوعامدا داۋدى ازايتۋ ماقساتىندا, حالىقارالىق قاۋىمداستىقتا باسەكەگە قابىلەتتىلىك كورسەتكىشىن جاقسارتۋ, زاڭنىڭ ءادىل تورەلىگىن, اشىقتىق پەن جاريالىلىقتى قامتاماسىز ەتۋ نەگىزىندە ءوز ۇستانىمدارىن ساقتاي وتىرىپ, ءوزارا ىنتىماقتاستىق جونىندەگى ۇشجاقتى مەموراندۋمعا قول قويدى. قاتىسۋشىلار مەموراندۋم اياسىندا ءتيىمدى جۇمىس جۇرگىزۋگە جول اشقاندارىن, الداعى ۋاقىتتا كليەنتتەرمەن كوپ جۇمىس جاسايتىن وزگە دە ەكىنشى دەڭگەيلى بانكتەرگە ۇلگى كورسەتەتىندەرىن ايتتى.
اتالعان مەموراندۋم اياسىندا ازاماتتىق داۋلاردىڭ سانى ازايىپ, سوتتاردىڭ جۇكتەمەسى تومەندەر بولسا, داۋلاسۋشى تاراپتار سوتقا جۇگىنبەستەن بۇرىن, بىتىمگەرلىك كەلىسىممەن ءوز داۋلارىن شەشىپ جاتسا, ىنتىماقتى جۇمىستىڭ باستى جەمىسى سول بولماق.
ءىس-شارا بارىسىندا ازاماتتىق جانە قىلمىستىق-قۇقىقتىق داۋلاردى شەشۋگە بىتىمگەرلىك راسىمدەرىن بەلسەندى ەنگىزۋگە, داۋلاردى بالامالى شەشۋ جۇيەسىن نىعايتۋعا, سوتتان تىس مەدياتسيا ينستيتۋتىن جەتىلدىرۋگە بايلانىستى وڭ پىكىرلەر ايتىلدى, جاڭا قۇقىقتىق ينستيتۋتتى ودان ءارى دامىتۋ جونىندە ءتيىمدى ۇسىنىستار بەرىلدى.
بەكىتىلگەن كەلىسىم ىنتىماقتاستىق اياسىندا تۋىندايتىن ماسەلەلەردى بىرلەسىپ شەشۋگە, سۋديالاردىڭ اسا كۇردەلى ىستەردى زەردەلەۋىنە, سوتتاردىڭ كۇردەلى ەمەس ىستەر بويىنشا جۇكتەمەسىن تومەندەتۋگە سەپتىگىن تيگىزەدى دەپ كۇتىلۋدە.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
