ءباسپاسوز كونفەرەنتسيانىڭ الدىندا رەپۋبليكالىق باق وكىلدەرى «قازمەديا» ورتالىعىنىڭ فويەسىندە وبلىستاعى وڭىرلىك جوبالىق ءوفيستىڭ ينتەراكتيۆتى الاڭدارى تۋرالى اقپاراتپەن تانىسۋعا مۇمكىندىك الدى. «تاربيە جانە ءبىلىم», «رۋحاني قازىنا», «اتامەكەن» «اقپارات تولقىنى» اتالاتىن ينتەراكتيۆتى الاڭداردىڭ ارقايسىسىنىڭ وزىندىك قىزمەتى بار.
ماسەلەن, «تاربيە جانە ءبىلىم» الاڭىنداعى وقىتۋ ۇستەلى پايدالانۋشىلارعا لاتىن ءالىپبيىن وقىپ ۇيرەنۋگە, دارىستەر وقۋعا, وڭىردە جۇزەگە اسىرىلاتىن بىرەگەي جوبالار تۋرالى اقپاراتتارمەن تانىسۋعا مۇمكىندىك بەرەدى. ال, «رۋحاني قازىنا» الاڭى ارقىلى باعدارلاما اياسىندا وبلىستا ىسكە اسىرىلعان جوبالار جانە كيەلى جەرلەرىنىڭ ينتەراكتيۆتى پرەزەنتاتسياسىن تاماشالاۋعا بولادى. سونداي-اق, «اتامەكەن» «اقپارات تولقىنى» الاڭدارىندا باعدارلامانىڭ ءتۇرلى سالاسىندا جۇمىستارمەن تانىستىرىلادى. مۇنان بولەك, الاڭدا «Co-working» ورتالىعى جۇمىس جاسايدى.
ءوڭىر باسشىسى العى ءسوزىن وبلىستا باعدارلامالىق ماقالادان تۋىندايتىن «اتامەكەن», «تاربيە جانە ءبىلىم», «رۋحاني قازىنا», «اقپارات تولقىنى» كىشى باعدارلامالارى مەن «قازاق ءتىلىن لاتىن الىپبيىنە كوشىرۋ», «100 جاڭا كىتاپ», «تۋعان جەر», «قازاقستاننىڭ كيەلى جەرلەرىنىڭ گەوگرافياسى», «جاھانداعى زاماناۋي قازاقستاندىق مادەنيەت», «100 جاڭا ەسىم» ارنايى جوبالارى ءساتتى ىسكە اسىرىلىپ جاتقاندىعىنان باستادى.
وتكەن جىلى وڭىردە 1,1 ملرد تەڭگەنى قۇرايتىن 22 جوبا مەن ءىس-شارا وتكىزىلگەن. اعىمداعى جىلى قۇنى 3,8 ملرد تەڭگەگە بولاتىن 133 جوبا مەن 66 ءىس-شارا قولعا الىنباق. مۇنداعى قاراجاتتىڭ 3,4 ملرد تەڭگەسىن دەمەۋشىلەر ارقىلى تارتۋ كوزدەلگەن.
باعدارلاما اياسىندا وڭىرلىك جوبالىق كەڭسە قۇرىلىپ, ساراپشىلار كەڭەسى ءوز جۇمىسىنا كىرىستى. سونداي-اق, «رۋحاني جاڭعىرۋ» باعدارلاماسىنىڭ جوبالارىنا ارنالعان ينتەراكتيۆتى الاڭدار اشىلدى. وڭىردەن شىققان 80-گە جۋىق كاسىپكەر-مەتسەناتتاردىڭ ەسەبىنەن جالپى قۇنى 817 ميلليون تەڭگە بولاتىن 23 الەۋمەتتىك نىسان پايدالانۋعا بەرىلدى. بيىل جالپى قۇنى 1,5 ميلليارد تەڭگە بولاتىن 29 الەۋمەتتىك نىسان ەل يگىلىگىنە بەرىلەتىن بولادى.
ۇلى جىبەك جولىنىڭ بويىنداعى ەجەلگى قالا رەتىندەگى تاراز شاھارىنىڭ باي تاريحىن تۋريزم كلاستەرىن دامىتۋدا كادەگە جاراتۋ جوسپارى ءتۇزىلدى. ناتيجەسىندە «قازاقستاننىڭ ساكرالدى گەوگرافياسى» ارنايى جوباسىنىڭ قاسيەتتى 100 نىسان تىزىمىنە وبلىستان 8 تاريحي-مادەني ورنى ەنگىزىلدى. جامبىل وبلىسىنان قازاقستاننىڭ جەرگىلىكتى ماندەگى وڭىرلىك قاسيەتتى ورىندارىنىڭ كارتاسىنا ۇسىنىلعان 27 ەسكەرتكىش قازاقستان رەسپۋبليكاسى مادەنيەت جانە سپورت مينيسترلىگىنىڭ جانە «قاسيەتتى قازاقستان» عىلىمي-زەرتتەۋ ورتالىعىنىڭ قولداۋىمەن شىققان «قازاقستاننىڭ جالپىۇلتتىق قاسيەتتى نىساندارى» جانە «قازاقستاننىڭ وڭىرلىك قاسيەتتى نىساندارى» كىتاپتارىنا ەندى. سونداي-اق, مادەنيەت جانە سپورت مينيسترلىگى, جامبىل وبلىسىنىڭ اكىمدىگى جانە «قازاقستان تەمىر جولى» اق اراسىندا «اقىرتاس» تاريحي كەشەنىن قالپىنا كەلتىرۋدى بىرلەسە جۇرگىزۋ بويىنشا مەموراندۋمعا قول قويىلدى,–دەدى اسقار مىرزاحمەتوۆ.
ايتا كەتۋ كەرەك, باعدارلامالىق ماقالانىڭ نەگىزىندە وبلىس ورتالىعىنىڭ وزىندىك ساۋلەت كەلبەتىن قالىپتاستىرۋعا ءجىتى نازار اۋدارىلعان. سوڭعى ەكى اي ىشىندە «جەڭىس» ساياباعىن قايتا جاڭعىرتۋ جۇمىستارى قارقىندى جۇرگىزىلدى. قۇرىلىس جۇمىستارىنا 300 جۇمىسشى مەن مەن 50 تەحنيكا جۇمىلدىرىلدى.
ساياباق جانىنداعى جانسۇگىروۆ كوشەسىنە تاعى ءبىر جولاق قوسىلدى. ال كىرەبەرىس قاقپاعا ەنى 13 م, بيىكتىگى 8 مەتر بولاتىن «ەرلىك» جانە «پودۆيگ» دەپ اتالاتىن قاقپا ورناتىلىپ, ونى قورعاپ تۇرعان ەكى جاۋىنگەردىڭ تۇلعاسى بەينەلەندى. ساياباقتىڭ ورتاسىنا بۇعان دەيىن قالانىڭ ءار تۇسىندا ورنالاسقان «ماڭگىلىك الاۋ» جانە باتىر باۋىرجاننىڭ سوم ءمۇسىنى قويىلدى. سونداي-اق , «باتىرلار» اللەياسىندا جامبىل وبلىسىنان شىققان 39 ۇلى وتان سوعىسىنىڭ باتىرىنىڭ جانە 9 «داڭق» وردەنىنىڭ بارلىق دارەجەسىنىڭ يەگەرىنىڭ ەسىمدەرى جازىلعان جۇلدىزشالار ورناتىلدى. قۇرىلىستىڭ ەكىنشى كەزەڭىندە «داڭق» زالىنىڭ قۇرىلىسى جۇرگىزىلەدى. مۇندا سوعىس جانە تىل ەڭبەككەرلەرىنە ارنالعان مۋزەي بوي كوتەرىپ, تىلداعى ەڭبەك ەتكەندەرگە ارنالعان مونۋمەنت جانە «تىرنالار» مەمورالدارى سالىنادى. جاڭا ساياباقتا اۋعان سوعىسى, چەرنوبىل اپاتىنا قاتىسۋشىلار مەن سەمەي پوليگونىندا جاۋىنگەرلىك بورىشىن وتەگەندەرگە ارنالعان مونۋمەنتتىك كەشەندەرگە دە ورىن تابىلادى. سايكەسىنشە, ساياباقتىڭ اۋماعىنداعى 15 مىڭ شارشى مەترگە اباتتاندىرۋ, كوگالداندىرۋ, كوگەرىشتەندىرۋ جۇمىستارى قولعا الىنباق. سول سەكىلدى تاراز قالاسىنداعى بۇرىنعى بازارى اۋماعىنداعى «شاحريستان» ساۋدا ورتالىعىنىڭ اۋماعىدا وزگەشە كەيىپكە ەنەدى. مۇندا «كونە تاراز» ارحەولوگيالىق مادەني كەشەنىنەن بولەك, وقۋشىلار سارايى, نەكە سارايى سىندى عيماراتتار بوي كوتەرەدى. ءبىر سوزبەن ايتقاندا ەسكى بازاردىڭ ورنى قالانىڭ رۋحاني, مادەني ورتالىعى رەتىندە قالىپتاسىپ, قالا تۇرعىندارى مەن قوناقتارى ءبىر ءسات تىنىستايتىن ورىنعا اينالماق.
جالپى قوعامنىڭ ساناسىنا سەرپىن بەرەتىن باعدارلامانىڭ جەكەلەگەن تارماقتارى ءبىلىم سالاسىندا دا كورىنىس تابۋدا. ماسەلەن, جامبىل وبلىسىنداعى جالپى ءبىلىم بەرەتىن ورتا مەكتەپتەردە «ولكەتانۋ», «تۋعان ولكە تاريحى», كوللەدجدەردە «تاريحي ولكەتانۋ», «ادەبي ولكەتانۋ» كۋرستارى ەنگىزىلىپ, اپتاسىنا 1 رەت «قازاقستان تاريحى», «قازاق ادەبيەتى», «گەوگرافيا» ساباقتارى مۋزەيلەردە, تاريحي عيماراتتاردا وتكىزىلۋدە.
قورىتا ايتقاندا, جامبىلدىقتار باعدارلامادا كوزدەلگەن ايقىن ماقساتتارعا قول جەتكىزۋگە قولداۋ ءبىلدىرۋ بار مۇمكىندىكتەرىن پايدالانۋعا ءازىر. ەسەسىنە جەرگىلىكتى بيلىكتە كيەلى ءوڭىردىڭ وزىندىك ەرەكشەلىكتەرى مەن قۇندىلىقتارىن جاڭعىرتۋ, ولاردى ناسيحاتتاۋ جۇمىستارىن جالعاستىرا بەرۋگە نيەتتى.
ءباسپاسوز ماسليحاتى سوڭىندا ءوڭىر باسشىسى باق وكىلدەرى تاراپىنان تۋىنداعان سۇراقتارعا جاۋاپ بەردى.
