– مارافونعا قاتىسۋعا نيەت بىلدىرگەندەر اپتاسىنا ءۇش رەت ءارتۇرلى قاشىقتىقتا قالا كوشەلەرىندە جۇگىرىپ, دايىندىقتارىن پىسىقتادى. «جۇگىرۋگە قاتىسۋشى فيزيكالىق تۇرعىدا مىقتى بولۋى كەرەك, ول ءۇشىن الدىن الا دايىندىق شارالارىنا قاتىسقان دۇرىس, – دەيدى جاتتىقتىرۋشى التاي قۇسپانوۆ. – مىسالى, 42 شاقىرىمعا جۇگىرەتىندەر ءۇشىن سورەدەن مارەگە دەيىنگى ۋاقىت ءۇش ساعاتقا سوزىلادى. قاجەت قۇرالداردى, سۋ, جۇرەك جالعايتىن استى دا الىپ شىعۋ كەرەك. جەلاياق بولۋ وڭاي ەمەس, بىراق كوپشىلىكتىڭ مارافونعا قىزىعۋشىلىق تانىتقانى ءبىزدىڭ دە جۇمىسىمىزعا سەرپىن بەردى.
سونىمەن كوپتەن كۇتكەن سىن ساعاتى دا تايادى. «Atyrau Marathon» جارىسىنا ءۇش مىڭعا جۋىق ادام قاتىستى. ولاردىڭ اراسىندا باسقا وبلىستاردان, ءتىپتى شەتەلدەردەن كەلگەندەر دە بار. ەڭ الىس قاشىقتىق – 42 شاقىرىمدى 150-دەن استام ادام باعىندىردى. 10 شاقىرىمعا جۇگىرۋدە 1000-نان اسا ەرىكتى تىركەۋدەن وتسە, 4,5 شاقىرىمدا 1500-عا جۋىق جەلاياق باق سىنادى.
مارافوننىڭ ءابسوليۋتتى چەمپيونى اتاعىن بازارباي داۋتاليەۆ جەڭىپ الدى. وعان اقشالاي سىيلىقپەن قوسا تەلەديدار جانە اتىراۋ وبلىستىق ۇلتتىق سپورت تۇرلەرى فەدەراتسياسىنىڭ ارنايى سىيى – جۇيرىك جىلقى تارتۋ ەتىلدى. ەكى پاراوليمپياداشى ەرلان قازيەۆ جانە كەنگەس كونيەۆكە «جەڭىسكە دەگەن جىگەرى ءۇشىن» ارنايى سىيلىق تاپسىرىلدى. 71 جاستاعى زەينەتكەر بەكەت قادىرالين جارىستىڭ ەڭ ەگدە قاتىسۋشىسى رەتىندە ارنايى سىيلىققا يە بولدى.
داڭقتى جەلاياق ءامين تۇياقوۆ, ۇزدىك مارافونشى, ازيا, افريكا, اۋستراليا مەن امەريكانىڭ ەڭ ءىرى شولدەرىن جۇگىرىپ وتكەن ادامزات تاريxىنداعى العاش اتلەت مارات جىلانباەۆ, ازيانىڭ بىرنەشە دۇركىن چەمپيونى, ازيا چەمپيوناتىنىڭ كۇمىس جۇلدەگەرى, ازيا ويىندارىنىڭ قولا جۇلدەگەرى, الەم چەمپيوناتىنىڭ قاتىسۋشىسى الەكساندرا رومانوۆا «Atyrau Marathon-2018» سايىسىنىڭ قۇرمەتتى قوناقتارى بولدى.
اتىراۋ وبلىستىق دەنە تاربيەسى جانە سپورت باسقارماسىنىڭ باسشىسى ازامات بەكەت قازاقستاندا بۇقارالىق سپورتتى دامىتۋعا باعىتتالعان باعدارلاما اياسىندا «Atyrau Marathon» دوداسى بيىل ەكىنشى رەت ۇيىمداستىرىلعانىن ايتادى. جارىستىڭ جالپى جۇلدە قورى – 4 ملن تەڭگە. بارلىق قاشىقتىقتاردا ءبىرىنشى بولىپ كەلگەندەر 150 مىڭ تەڭگەدەن سىياقى الدى. جۇيرىك جەلاياقتارعا ءامين تۇياقوۆتىڭ كىتابى دا سىيعا بەرىلدى.
– سپورتپەن اينالىسىپ, سالاماتتى ءومىر سالتىن ۇستانۋدىڭ جاقسىلىعى كوپ, – دەيدى ءامين تۇياقوۆ. – جارىسقا قاتىسقان سوڭ ارينە جەڭگەنگە نە جەتسىن, بىراق باستى ماقسات بايگە الۋ ەمەس, وسىنداي ۇلكەن دوداعا قاتىسقاننىڭ ءوزى مەرەي.
«Atyrau Marathon-2018» جارىسىن ۇيىمداستىرۋ كوميتەتىنىڭ ۆيتسە-پرەزيدەنتى يۋري پونومارەۆ قاتىسۋشىلارعا بارلىق جاعداي جاسالعانىن اتاپ ءوتتى. مارافون قاتىسۋشىلارى مەن قوناقتارى ءۇشىن ارنايى شوۋ-باعدارلاما دايىندالدى. قاشىقتىقتى باعىندىرعان جۇيرىكتەردىڭ قۇرمەتىنە ەسترادا جۇلدىزدارىنىڭ كونتسەرتتىك باعدارلاماسى قويىلىپ, سپورتتىق شارا ناعىز مەرەكەگە اينالدى.
باقىتگۇل باباش,
«ەگەمەن قازاقستان»
اتىراۋ
