بۇل جونىندە «اتاسۋ كەنتىندە از توننالى مۇناي وڭدەۋ زاۋىتىنىڭ قۇرىلىسى» جانە «يۋرتا» جانار-جاعارماي بەكەتتەرىنىڭ قۇرىلىس جوبالارى جونىندە ءوڭىر باسشىسى ەرلان قوشانوۆ وتكىزگەن كەڭەس بارىسىندا بەلگىلى بولدى.
300 ملرد تەڭگەنىڭ جوباسى
جالپى, بۇل جوبا ساتىمەن ىسكە اسقاندا, مۇناي وندىرۋدەن باستاپ دايىن ءونىمدى ساتۋعا دەيىنگى ارالىقتى قامتيتىن وندىرىستىك تولىق تسيكل سالتانات قۇرادى. اتاسۋ كەنتىندە زاۋىت قۇرىلىسى جانە قاجەتتى ينفراقۇرىلىم جاساۋ جۇمىستارى جۇرگىزىلىپ جاتقاندا ونىمەن ءبىر مەزگىلدە قوستاناي وبلىسىنداعى «نوۆونەجينسكوە» كەن ورنىندا گەولوگيالىق بارلاۋ قولعا الىنىپ, مۇناي ءوندىرۋ قوسا جۇرگىزىلمەك. بۇدان بولەك, ءدال وسى كەزەڭدە بۇكىل قازاقستان بويىنشا 260 «يۋرتا» جانار-جاعارماي قۇيۋ بەكەتىنىڭ قۇرىلىسى باستالادى. ايتا كەتۋ كەرەك, بۇل اۆتوماي قۇيۋ ستانسالارىنىڭ 26-سى قاراعاندى وبلىسىنىڭ اۋماعىندا سالىنباقشى. ينۆەستورلاردىڭ ايتۋىنشا, جانار-جاعارماي قۇيۋ بەكەتتەرىن جوبالاۋ بارىسىندا دامىعان ەلدەردىڭ وزىق تاجىريبەلەرى ەسكەرىلگەن ەكەن. مۇنىڭ ءوزى جول بويىنداعى سەرۆيستىڭ جوعارى دەڭگەيگە كوتەرىلە باستاۋىنا جانە ەلدەگى ءتۋريزمنىڭ دامۋىنا يگى اسەرىن تيگىزەرى ءسوزسىز دەپ ەسەپتەيدى ينۆەستورلار.
«نوۆونەجينسكوە» مۇناي كەن ورنىندا 25 ۇڭعىما بۇرعىلانادى. جاڭا زاۋىتقا قوستانايدان تەمىر جول ارقىلى جەتكىزىلەتىن مۇنايدىڭ 1 ميلليون تونناسى وڭدەلەتىن بولادى. بۇل – ءبىر جىلداعى مولشەر. وسىنىڭ ءوزى ەلىمىزدەگى ىشكى نارىقتىڭ 10 پايىزعا جۋىعىن جابۋعا مۇمكىندىك بەرەدى.
جالپى قۇنى 300 ميلليارد تەڭگە بولاتىن ءىرى جوبانى اياعىنا دەيىن جەتكىزۋگە ءۇش جىلداي ۋاقىت كەتەدى ەكەن. ياعني جوسپار بويىنشا, قۇرىلىس بيىل باستالىپ, 2021 جىلى مارەسىنە جەتۋى ءتيىس.
ەۋرو-5 بەنزينىن وندىرەدى
«ابىلايحان» كومپانيالار توبىنىڭ باسقارما توراعاسى ءامىر ىسماعۇلوۆ زاۋىتتىڭ مۇناي وڭدەۋدە گيدروكرەكينگ دەپ اتالاتىن تەحنولوگياعا ارقا سۇيەيتىنىن اتاپ ءوتتى. «اتاسۋ مۇناي وڭدەۋ زاۋىتىنىڭ ونىمدەرى حالىقارالىق ستاندارتتار تالابىنا ساي بولادى», دەدى ول سەنىمدى تۇردە.
گيدروكرەكينگ تەحنولوگياسى ەۋرو-5 ستاندارتتى بەنزين مەن Jet-ا1 ماركالى اۆياتسيالىق وتىن الۋعا مۇمكىندىك بەرەتىن كورىنەدى. سونداي-اق مۇناي ونىمدەرى قوستانايدان زاۋىتقا جەتكىزىلگەندە, شيكىزات ويل-تانكەر تەحنولوگياسىنا سايكەس ارنايى سىيىمدىلىق ىدىستارىنا قۇيىلىپ, ءمور باسىلىپ, سودان كەيىن عانا جانار-جاعارماي بەكەتتەرىنە جەتكىزىلەدى. مامانداردىڭ ايتۋىنشا, مۇنداي ءتاسىل تۇتىنۋشىنى ساپالى جانە مول ونىممەن قامتاماسىز ەتۋگە مۇمكىندىك بەرەدى جانە مۇناي قويماسىنا دەگەن تاۋەلدىلىكتەن ارىلتادى ەكەن.
ء وز كەزەگىندە «R Way Solution PTE Ltd» كومپانياسىنىڭ باسشىسى راگۋناندان بالاسۋبرامانيان ينۆەستيتسيا سالاردان بۇرىن اتالعان جوبانىڭ ءوڭىر ەكولوگياسىنا, الەۋمەتتىك جاعدايىنا قانشالىقتى اسەر ەتەتىنىنە بارىنشا نازار اۋداراتىندىقتارىن جەتكىزدى. ء«بىز ستراتەگيالىق ينۆەستورمىز. قانداي دا ءبىر ەلگە ينۆەستيتسيا قۇيماس بۇرىن اۋەلى سول جەر حالقىنىڭ جاعدايىنا, ونىڭ ەكولوگياسىنا اسەر ەتەتىن جايتتاردى جان-جاقتى زەرتتەيمىز. ءسويتىپ كەلەڭسىزدىك تۋدىراتىن جاعدايلاردى مەيلىنشە ازايتۋعا تىرىسامىز. سونىمەن قاتار ءبىز سوڭعى تەحنولوگيالاردى اكەلەمىز. الەۋمەتتىك جوبالاردى دا نازاردان تىس قالدىرماي, ينفراقۇرىلىمعا دا كوڭىل بولەمىز. جالپى, ەنەرگەتيكالىق جوبالاردىڭ ماڭىزى زور», دەدى سينگاپۋرلىق ينۆەستور.
800 ادامعا ءۇي سالادى
«ابىلايحان» جشس باسشىسى ينۆەستور قاراستىرعان كەزدە قالتالى كومپانيانىڭ ەكولوگيا مەن الەۋمەتتىك جاعدايعا دەگەن كوزقاراسىنا باسا ءمان بەرگەندىكتەرىن ايتتى. «مىسالى, – دەدى ول, – «R Way Solution PTE Ltd» كومپانياسىنىڭ تابىستىڭ قوماقتى بولىگىن ءتۇرلى ەلدەردە الەۋمەتتىك جاعدايى تومەن جاندارعا ارناپ ەمحانالار سالۋعا جۇمسايتىنىنان جاقسى حاباردارمىز. سونىمەن قاتار ولار كۇن جانە جەل ەنەرگياسىن دامىتۋدى قولدايدى ەكەن. ال بىزدە كۇن مەن جەل دەگەنىڭىز جەتىپ ارتىلادى».
ايتسا ايتقانداي, شەتەلدىك ينۆەستور اتاسۋ كەنتىندە زاۋىتتىڭ 800 جۇمىسكەرىنە ارناپ تۇرعىن ءۇي قالاشىعىن, مەديتسينا ورتالىعى مەن سپورت كەشەنىن جانە بالاباقشا سىندى الەۋمەتتىك ماڭىزى زور نىساندار سالماقشى. سونىمەن قاتار زاۋىتتا جۇمىس ىستەيتىن مامانداردى وقىتۋ ءۇشىن كەنتتە كوللەدج اشۋ دا جوسپارلارىندا بار ەكەن.
«R Way Solution PTE Ltd» كومپانياسى باسشىسىنىڭ ايتۋىنشا, ءبىزدىڭ ەلگە دەگەن قىزىعۋشىلىقتىڭ تۋىنا مۇنداعى ينۆەستيتسيالىق احۋالدىڭ قولايلىلىعى سەبەپشى بولعان ەكەن. سونىمەن قاتار ول قازاقستاندا جاڭا تەحنولوگيالاردى ەندىرۋدىڭ زور مۇمكىندىكتەرى بارلىعىن جانە مۇنداعى «جاسىل» ەكونوميكانى دامىتۋعا دەگەن قۇلشىنىستىڭ جوعارىلىعىن اتاپ ءوتتى.
ءساتىن سالىپ جاڭا زاۋىت پايدالانۋعا بەرىلگەندە 800 ادام تۇراقتى جۇمىسپەن قامتاماسىز ەتىلەدى. ال وبلىسقا تيەسىلى 26 جانار-جاعارماي بەكەتى ىسكە قوسىلعاندا, بۇل سالادا بارلىعى 1200 ادام ادال نانىن تاۋىپ جەيتىن بولادى. جالپى, مۇناي وڭدەۋ زاۋىتىنىڭ قۇرىلىسىنا مەردىگەر كومپانيالاردان 3 مىڭعا جۋىق قۇرىلىس مامانى تارتىلماقشى.
جاڭاارقا جەرىنىڭ ەندىگىدە ينۆەستيتسيانىڭ يگىلىگىن كورىپ, وڭىردەگى يندۋستريالىق ولكەگە اينالارىنا دەگەن سەنىم مول.
قايرات ءابىلدا,
«ەگەمەن قازاقستان»
قاراعاندى وبلىسى
