سالتاناتتى شاراعا جينالعاندار الدىندا ۋنيۆەرسيتەت رەكتورى, مەديتسينا عىلىمدارىنىڭ دوكتورى, پروفەسسور تالعات نۇرعوجين مەن SANTO كومپانياسىنىڭ باس ديرەكتورى يجي ۋربانەتس قۇتتىقتاۋ ءسوز سويلەدى.
مەموراندۋمعا قول قويىپ جاتىپ, ەكى تاراپتىڭ وكىلدەرى تەڭدەي قۇقىق جانە ءوزارا پايدا بولۋ قاعيداسىنا سايكەس, عىلىمي-تەحنيكالىق ىنتىماقتاستىقتى دامىتىپ جانە ونى جۇزەگە اسىرۋ ءۇشىن ۇيىمداستىرۋ جاعىنان دا قارجىلاي قولداۋ تۇرعىسىنان دا جاعداي جاساۋعا ىقىلاستى ەكەنىن ءبىلدىردى.
اتاپ ايتقاندا, ءبىلىم بەرۋ اياسىنداعى ىنتىماستىق اياسىندا بىرلەسە ءبىلىم بەرۋ باعدارلاماسىن دايىنداۋ جوسپارلانعان. ءوز تاراپىنان SANTO كومپانياسى ۋنيۆەرسيتەت ستۋدەنتتەرىنە تاعىلىمدامالار ۇيىمداستىرۋدى, تاجىريبەلىك سەمينارلار مەن كونفەرەنتسيالاردى, عىلىمي زەرتتەۋلەر وتكىزۋدى جوسپارلاپ وتىر. سونداي-اق, مەموراندۋم اياسىندا حالىقارالىق جۋرنالداردا زەرتتەۋ ناتيجەلەرىن جاريالاۋ, بوس جۇمىس ورىندارى جارمەڭكەسىن ۇيىمداستىرۋ مەن زاماناۋي مەديتسينانىڭ وزەكتى ماسەلەلەرىن شەشۋ ءۇشىن ءوزارا كۇش بىرىكتىرۋ كوزدەلگەن.
«قازاقستاننىڭ جەتەكشى مەديتسينالىق ۋنيۆەرسيتەتتەرىنىڭ ءبىرى بۇگىن ءبىزدىڭ سەرىكتەسىمىزگە اينالىپ وتىرعانىنا مەن اسا قۋانىشتىمىز, – دەدى يجي ۋربانەتس مىرزا. – سونداي-اق, ۋنيۆەرسيتەتتىڭ باسكەتبول جانە ۆولەيبول كوماندالارىنا ارناپ سپورت كيىمدەرىن, سپورت جابدىقتارىن ساتىپ الۋعا كومەكتەسكەنىمىزدى دە قۋانا جەتكىزگىم كەلەدى. ىنتىماقتاستىققا باستاعان وسى العاشقى قادامىمىزدى ارى قاراي دا جەمىستى تۇردە دامىتۋعا دايىنبىز. بۇگىن جاڭا مەموراندۋمعا قول قويىپ وتىرعانىمىز – ءبىز ءۇشىن ايتۋلى وقيعا, ويتكەنى بيىل ءبىزدىڭ «SANTO اكادەميالىق باعدارلامامىزعا» 5 جىل تولدى. وسى كەزەڭدە ءبىز استانا مەديتسينالىق ۋنيۆەرسيتەتىمەن, نازارباەۆ ۋنيۆەرسيتەتىمەن, وڭتۇستىك قازاقستان مەديتسينالىق اكادەمياسىمەن, شىمكەنت قالاسىنداعى حيميا-بيولوگيا باعىتىنداعى نازارباەۆ زياتكەرلىك مەكتەبىمەن, دارىلىك زاتتاردى ساراپتاۋ ۇلتتىق ورتالىعىمەن, وڭتۇستىك قازاقستان وبلىسى وڭىرىندەگى كاسىپكەرلەر پالاتاسىمەن تابىستى ىنتىماقتاستىق ورناتتىق. مەموراندۋمدار اياسىندا ستۋدەنتتەر, مەكتەپ وقۋشىلارى, عالىمدار كومپانيانىڭ قازاقستانداعى جانە پولشاداعى وندىرىستىك قۋاتتىلىقتارىن, زەرتتەۋ جۇرگىزەتىن زەرتحانالارىن كورىپ قايتۋعا مۇمكىندىك الىپ, كەلەشەگى مول عىلىمي جۇمىستارى ءۇشىن گرانتتارعا يە بولىپ وتىر».
ورايى كەلىپ تۇرعاندا, دەنساۋلىق ساقتاۋ سالاسىنداعى مەملەكەتتىك-جەكەمەنشىك سەرىكتەستىكتى جۇزەگە اسىرۋ ءۇشىن 2013 جىلى كومپانيانىڭ «SANTO اكادەميالىق باعدارلاماسى» اتتى باستى ءبىلىم بەرۋ جوباسى قولعا الىنعانىن ايتا كەتۋگە بولادى. جوبا قر پرەزيدەنتى نۇرسۇلتان نازارباەۆتىڭ 2013 جىلعى 22 مامىرىنداعى شەتەلدىك ينۆەستورلار كەڭەسىندە بەلگىلەنگەن باعىتقا سايكەس, فارماتسەۆتيكالىق ونەركاسىپ ساپاسىن حالىقارالىق ستاندارتتار دەڭگەيىنە دەيىن كوتەرۋدى كوزدەيدى. ەلباسى ءوز سوزىندە يننوۆاتسيالاردى قاجەتتى كادرلارمەن قامتاماسىز ەتۋ, حالىقارالىق دەڭگەيدەگى بىلىكتىلىگى بار ينجەنەرلىك, تەحنيكالىق كادرلارعا دەگەن قاجەتتىلىكتى قاناعاتتاندىرۋ ءۇشىن ءبىلىم بەرۋ جۇيەسىن يكەمدەۋ قاجەتتىگىن, سونداي-اق, وقۋ جوسپارلارى مەن ادىستەمەلەردى قالىپتاستىرۋعا بيزنەستى قاتىستىرۋ, جەرگىلىكتى ماماندار قاتارىنان جوعارى كاسىبي كادرلار قۇرامىن قالىپتاستىرۋ ءۇشىن شەتەلدىك مامانداردى تارتۋ قاجەت دەگەن ويدى ەرەكشە اتاپ وتكەن بولاتىن.
ايناش ەسالي,
«ەگەمەن قازاقستان»
