ەگەمەندىك ايناسى

ەلورداداعى ۇلتتىق اكادەميالىق كىتاپحانادا استانا قالاسىنىڭ مۇراعاتتار جانە قۇجاتتامالار باسقارما­سى­نىڭ ۇيىمداستىرۋىمەن تاۋەلسىزدىگىمىزدىڭ 20 جىلدىعىنا وراي كاسىبي فوتوسۋرەتشى شۇكىر شاحايدىڭ «ەگەمەندىك ايناسى» اتتى فوتوالبومىنىڭ تۇساۋكەسەرى بولىپ ءوتتى. سۋرەت – زامان مەن قوعامنىڭ, ادام مەن ۋاقىتتىڭ كوز­گە كورىنە بەرمەيتىن سىيقىرلى بايلانىسىنا قانات بىتىرەتىن, جۇرەكتەرگە قاپىسىز جول تاباتىن عاجايىپ ونەر دەسەك, اقىن, مەملەكەتتىك سىيلىقتىڭ لاۋرەاتى نۇرلان ءورازاليننىڭ العىسوزىندە جازىلعانداي, ماڭىزى مەن ءمانى زور تاريحي سۋرەتتەردەن تۇراتىن قالىڭ كىتاپ جيىرما جىل ىشىندەگى ەل ءومىرىنىڭ ايناسى ىسپەتتى. البومدىق سيپاتتا جاسالىپ, پوليگرافيالىق اسەم ۇلگىدە بەزەندىرىلگەن سۋرەت-جادىگەرلەر – ۇلت, ۇرپاق جادىن قايىرا قوزعاپ, ءوت­كەن كۇندەر تاساسىنان ەل شەجىرەسىنە ءتىل بىتىرەرى حاق. ەل­باسىنىڭ تۋعان ەلىنىڭ الدىندا انت بەرىپ تۇرعان ءساتى, جۇرتى­نىڭ تاۋەلسىزدىك دەيتىن كيەلى دە قاسيەتتى ۇعىمدى كوكىرەگىنە تۇمار قىپ ءتۇيۋىنىڭ الۋان-الۋان كورىنىستەرى, ەگەمەن ەل ءومىرىنىڭ جەڭىسى مەن جەمىسىن قاتار ەلەستەتەر حرونولوگيالىق ۇلگىدەگى زامانا بەلەستەرىن ەلەستەتەتىن شەجىرە كورىنىستەر ەشكىمدى دە بەي-جاي قالدىرماسى انىق. شەبەر تۇسىرىلگەن ورنەكتى سۋرەتتەر ءارى كوركەم, ءارى شى­نايى. ءبىر ءسات وتكەنگە ورالتىپ, ويىڭنىڭ ءورىسىن كە­ڭەي­تەدى, تانىمىڭدى قالىپتاستىرىپ, ءتالىمىڭدى تە­رەڭ­دەتەدى. ءبىر كەزدەگى زامان تىنىسىنىڭ قاداۋ-قاداۋ ءوز­گەرىس­تەرى مەن اي­رىق­شا كەزەڭدەرىن تاپ باسىپ سارالاۋعا, تالداۋعا كومەكتەسەدى. ءيا, فوتوالبومنان ءبىز تاۋەلسىز قازاقستاننىڭ سوڭعى جيىرما جىل ارالىعىنداعى الماتى مەن استانا اراسىن جالعاپ جاتقان ەلدىكتىڭ, ەرلىكتىڭ شەجىرەسىن كورەمىز. ۋاقىت تىنىسىن اڭعارتار سۋرەت-جادىگەرلەر ەلىمىزدىڭ ەرلىككە, ەڭبەككە تولى وتكەنى مەن بۇگىنگى تولىققاندى كەسكىنىن ەلەستەتەدى. ياعني, قازاقستانداعى تاۋەلسىزدىك ءداۋىرى الىپ كەلگەن وڭ وزگەرىستەرگە دەن قويعىسى كەلەتىن كەز كەلگەن ادامنىڭ ايتۋلى كىتاپتان تابار ولجاسى دا, الار عيبراتى دا مول. فوتوالبومنىڭ تۇساۋكەسەر راسىمىندە قاجاحمەت بالاحمەتوۆ, توقتار اۋباكىروۆ, جانداربەك مالىبەك ۇلى, باقىت سىزدىقوۆا, تىلەگەن سادىقوۆ, سەرىك كامال ۇلى سياقتى قوعام قايراتكەرلەرى كىتاپتىڭ ءمان-ماڭىزىنا توقتالىپ, فوتوسۋرەتشىگە الداعى ۋاقىتتاردا دا ونەر­دىڭ ورەلى بيىگىنەن كورىنە بەرۋىنە تىلەكتەستىك ءبىلدىردى. بەرىك سادىر.