ءباسپاسوز ءماسليحاتىندا اقپارات جانە كوممۋنيكاتسيالار ۆيتسە-ءمينيسترى نۇرگۇل ماۋبەرلينوۆا بيىل «ۇركەر» سىيلىعى «قازاق» گازەتىنىڭ 105 جىلدىعىنا ارنالىپ وتىرعاندىعىن ايتتى.
«وتكەن جىلى اقپارات جانە كوممۋنيكاتسيالار مينيسترلىگى «تۇمار» جانە «ۇركەر» سىيلىقتارىن تاعايىنداعان بولاتىن. بيىل ناۋرىز ايىندا وتكەن «تۇمار» ۇلتتىق سىيلىعى قازاق تەلەۆيزياسىنىڭ 60 جىلدىعىنا ارنالعان ەدى. ال «ۇركەر» سىيلىعىن «قازاق» گازەتىنىڭ 105 جىلدىعىنا ارناۋدى جوسپارلاپ وتىرمىز», دەدى ول.
سونىمەن بيىل «ۇركەر» بايقاۋىنا قاتىسۋ ءۇشىن ۇمىتكەرلەر el.kz. سايتىنا ۇزدىك فوتوسۋرەت, ۇزدىك رەپورتاج, ۇزدىك ساراپتامالىق ماتەريال, ۇزدىك جۋرناليستىك زەرتتەۋ, ۇزدىك سۇحبات, قازاقستان تۋرالى ۇزدىك تانىمدىق ماتەريال, ۇزدىك حالىقارالىق تالدامالى ماتەريال, ۇزدىك وڭىرلىك راديوستانسا, ۇزدىك وڭىرلىك مەرزىمدى باسىلىم, ۇزدىك قازاقستاندىق راديوستانسا, ۇزدىك ينتەرنەت-باسىلىم, ۇزدىك رەسپۋبليكالىق مەرزىمدى باسىلىم اتالىمدارى بويىنشا وتىنىشتەر جىبەرە الادى.
بۇل تۋرالى «Qazcontent» اق توراعاسى ەۆگەني كوچەتوۆ: «بيىل بايقاۋ 12 اتالىم بويىنشا وتەدى جانە تاعى ءبىر ەكسپەريمەنتتىك اتالىم قوسىلىپ وتىر. ەڭ ۇزدىك بلوگەرلەر مەن ۆاينەرلەردى, سونداي-اق ەڭ تانىمال پابليك پەن جىل حايپىن انىقتاساق دەگەن وي بار. ءادىل بولسىن دەگەن نيەتپەن وقىرماندار وزدەرى تاڭداسىن دەگەن شەشىمگە كەلدىك. سول ءۇشىن قوسىمشا قانداي اتالىم بولاتىنىن داۋىس بەرۋ ارقىلى انىقتاماقپىز. مۇنى كوپشىلىك urker.el.kz سايتىنا كىرىپ, اتالىمعا داۋىس بەرۋ ارقىلى تاڭدايدى», دەدى.
بايقاۋدىڭ قازىلار القاسى قۇرامىنا تانىمال قوعام قايراتكەرلەرى مەن شىعارماشىلىق زيالى قاۋىم وكىلدەرى, جۋرناليستيكا سالاسىنىڭ مايتالمان ماماندارى كىرەدى. لاۋرەات اتانعان جۋرناليستەرگە ەستەلىك ءمۇسىن مەن قارجىلاي جۇلدە تابىستالادى. ءاربىر جەڭىمپاز 1 000 000 تەڭگە كولەمىندە اقشالاي سىيلىق پەن ءداستۇرلى ەستەلىك مۇسىنگە يە بولادى. كونكۋرسقا شىعارماشىلىق جۇمىستارى 2017 جىلى جاريالانعان ءباسپاسوز رەداكتسيالارى مەن ينتەرنەت-باق وكىلدەرى, سونداي-اق راديوستانسالاردىڭ جۋرناليستەرى قاتىسا الادى.
ءباسپاسوز ءماسليحاتىندا سپيكەرلەر جۋرناليستەر ساۋالدارىنا جاۋاپ بەرىپ, بىلتىر كونكۋرسقا 700-گە جۋىق ءوتىنىم تۇسكەنىن, ءسويتىپ بايقاۋ جوعارى دارەجەدە وتكەنىن تىلگە تيەك ەتتى. سونداي-اق بيىلعى قاتىسۋشىلارعا ساتتىلىك تىلەدى.
ۇلاربەك نۇرعالىم ۇلى,
«ەگەمەن قازاقاستان»
