– وبلىس حالقىنىڭ باسىم بولىگىن جاستار قۇرايدى. تۇرعىنداردىڭ جالپى سانىنىڭ 24 پايىزى جاستار بولسا, ولاردىڭ 42 پايىزى قالادا, 58 پايىزى اۋىلدا تۇرادى. ءبىز ولارعا ساپالى ءبىلىم مەن سۇرانىسقا يە ماماندىق بەرىپ, جۇمىسقا ورنالاسۋعا كومەكتەسۋىمىز كەرەك. سوندىقتان, جاستار ساياساتىن قارجىلاندىرۋ جۇمىسىمىزدىڭ باسىمدىقتارىنىڭ ءبىرى. قىزىلوردا وبلىسى رەسپۋبليكا بويىنشا جاستاردى قولداۋعا ەڭ كوپ قاراجات ءبولىپ كەلە جاتقان ءوڭىر. وسىعان بايلانىستى وڭىردە قازىردىڭ وزىندە وزەكتى دەگەن كوپتەگەن ماسەلەلەر شەشىلدى, – دەدى وبلىس اكىمى.
جيىندا جاستار ساياساتى ماسەلەلەرى باسقارماسىنىڭ باسشىسى ەركەبۇلان مەڭلىباەۆ «جاستار ساياساتىن دامىتۋ بويىنشا 2021 جىلعا دەيىنگى جول كارتاسىن» جۇزەگە اسىرۋ بارىسى تۋرالى باياندادى. «جول كارتاسى» دەنساۋلىق ساقتاۋدان باستاپ ۇكىمەتتىك ەمەس ۇيىمدارمەن ارىپتەستىككە دەيىن بارلىق سالالار بويىنشا جاستارمەن جۇمىس ىستەۋدىڭ 10 باعىتىن قامتيدى. ماسەلەن, جاستاردى جاپپاي كاسىپكەرلىكتى دامىتۋ مەن ناتيجەلى جۇمىسپەن قامتۋ باعدارلاماسى بويىنشا وقىتۋ ماقساتىندا 1515 گرانت, مەملەكەتتىك تاپسىرىس بويىنشا 3088 گرانت ءبولىندى.
– بۇعان قوسىمشا «سەرپىن-2050» جوباسى بويىنشا بولىنەتىن گرانتتاردى قوساتىن بولساق, 100 پايىز وقۋمەن قامتۋعا تولىق مۇمكىندىگىمىز بار. بيىلعى جىلى رەسەي فەدەراتسياسىنىڭ جەتەكشى جوعارى وقۋ ورىندارىن بىتىرەتىن 76 تۇلەكتى جۇمىسقا ورنالاستىرۋ بويىنشا جۇمىستار جۇرگىزىلۋدە, – دەدى ەركەبۇلان مەڭلىباەۆ.
باقتيار تايجان,
«ەگەمەن قازاقستان»
قىزىلوردا وبلىسى
