قازاقستان ميگرانتتار قابىلداۋ بويىنشا ورتالىق ازيادا ماڭىزدى ورىن الاتىن مەملەكەتتەردىڭ ءبىرى. 2017 جىلدىڭ 1 قاراشاسىنداعى ىشكى ىستەر مينيسترلىگىنىڭ مالىمەتتەرىنە قاراعاندا, رەسپۋبليكا اۋماعىندا 182312 شەتەلدىك ازامات جانە 6870 ازاماتتىعى جوقتار تۇراقتى ءومىر سۇرۋدە. كورشىلەس مەملەكەتتەردىڭ كوپتەگەن ازاماتتارى بىزدە ەشقانداي ەڭبەك شارتىنسىز جۇمىس ىستەپ, تەگىن الەۋمەتتىك پاكەت جانە تەگىن مەديتسينالىق قىزمەتتى الا الماي تۇرىپ جاتىر. ءبىزدىڭ ايتپاعىمىز بۇل ەمەس.
ءبىزدىڭ ايتپاعىمىز – قازاقستان اۋماعىندا ازاماتتىق الماي ۇزاق مەرزىمدە تۇرىپ جاتقان جانە ءبىزدىڭ ەلدىڭ كاسىپورىندارىندا قىزمەت ىستەپ, سالىق تولەپ جاتقاندار مەن ولاردىڭ وتباسى مۇشەلەرىنىڭ ماسەلەسى.
قازاقستان رەسپۋبليكاسىنىڭ زاڭناماسىنا سايكەس مۇنداي ازاماتتار تەك توتەنشە جاعدايدا عانا تەگىن مەديتسينالىق كومەك الادى جانە قورشاعان ورتاعا زيانىن تيگىزەتىن اۋرۋعا دۋشار بولعاندا عانا كەپىلدەندىرىلگەن تەگىن كومەك الا الادى. ونداي اۋرۋلاردىڭ ءتىزىلىمىن وكىلەتتى ورگاندار جاسايدى. مۇنىڭ ءوزى تەگىن كومەك تەك جۇقپالى اۋرۋلارعا عانا جاسالادى دەگەن ءسوز.
جۇمىس جاسىنداعى شەتەلدىك ازاماتتار اقىلى مەديتسينالىق كومەككە قول جەتكىزگەنىمەن, ءتۇرلى سەبەپتەرمەن ازاماتتىق الماعان قارت ادامداردىڭ مۇنداي مۇمكىنشىلىكتەرى جوق. ونكولوگيالىق اۋرۋمەن جانە قانت ديابەتىمەن اۋىراتىن وسىنداي ادامدار حيميالىق پرەپاراتتار مەن ينسۋلينگە قول جەتكىزە الماي قينالۋدا.
ارينە قازاقستاندا بۇل پروبلەمانى شەشۋگە تالپىنىس جاسالدى. ناقتى ايتقاندا 2017 جىلدىڭ 30 ماۋسىمىندا ءتيىستى زاڭناماعا وزگەرىستەر ەنگىزىلىپ, 2018 جىلدىڭ 1 قاڭتارىنان باستاپ وسىنداي ازاماتتاردىڭ تەگىن مەديتسينالىق كومەك الۋى قاراستىرىلدى. الايدا وسى زاڭعا ەنگىزىلگەن سوڭعى تۇزەتۋلەرمەن تەگىن مەديتسينالىق كومەك الۋ مەرزىمى 2018 جىلدىڭ 1 قاڭتارىنان 2020 جىلدىڭ 1 قاڭتارىنا شەگەرىلدى. ءسويتىپ جارىمجان جاندار تاعى ەكى جىل بويى ەشقانداي كومەك الا المايتىن بولدى. وسىعان بايلانىستى پرەمەر-مينيستر ب.ساعىنتاەۆقا مىناداي مازمۇنداعى ساۋال جولدادىق:
1.جوعارىدا اتالعان اۋرۋلارمەن اۋىراتىن شەتەلدىك جانە ازاماتتىعى جوق ناۋقاستار مىندەتتى مەديتسينالىق قامسىزداندىرۋ ەنگىزىلگەنشە تەگىن مەديتسينالىق پرەپاراتتارمەن قامتاماسىز ەتىلە مە؟
2. ال مىندەتتى مەديتسينالىق قامسىزداندىرۋ ەنگىزىلگەن سوڭ اتالعان ساناتتاعى ازاماتتاردىڭ تەگىن مەديتسينالىق پرەپاراتتارمەن قامتاماسىز ەتىلۋى قالاي جۇرگىزىلەدى؟
نارينە ميكاەليان,
ءماجىلىس دەپۋتاتى
