بۇگىنگى تاڭدا ەلىمىزدەگى 817 كوللەدجدىڭ 473-ءى مەملەكەتتىك بولىپ سانالادى, وندا بارلىق 489 مىڭ وقۋشىنىڭ 283 مىڭى ءبىلىم الۋدا. باعدارلاما ەسەپتەلگەن 2021 جىلعا دەيىن تاعى دا 106 مىڭ ادام وسى وقۋعا تارتىلاتىن بولادى, بۇل – جىل سايىن 21 مىڭ وقۋشى قابىلدانادى دەگەن ءسوز. بۇل – كوللەدجدەردە وقيتىن بارلىق وقۋشىنىڭ 75 پايىزى.
مەملەكەت باسشىسىنىڭ تاپسىرمالارىن مۇلتىكسىز ورىنداپ, نارىققا جوعارى بىلىكتى ماماندار دايىنداۋ ءۇشىن بۇل وقۋ ورىندارىنىڭ وندىرىستىك-تەحنيكالىق جانە وقۋ بازاسى زامان تالابىنا ساي بولۋى كەرەك. ءدال وسى سەبەپپەن جوعارى بىلىكتى جۇمىسشى كادرلارىن دايىندايتىن مەملەكەتتىك كوللەدجدەر جۇيەسى قاجەت. ويتكەنى جەكەمەنشىك كوللەدجدەردە بۇل تالاپ ورىندالماي جاتادى. ايتالىق قازىر جەكەمەنشىك كوللەدجدەردىڭ ءاربىر بەسىنشىسىندە عانا شەبەرحانالار, ءاربىر ۇشىنشىسىندە عانا زەرتحانالار بار. بۇل – جەكەمەنشىك كوللەدج بىتىرگەن مامانداردىڭ مەملەكەتتىك كوللەدجدەردى بىتىرگەن وزدەرىنىڭ قۇرداستارىنان اناعۇرلىم بىلىكسىز بولاتىنىن كورسەتەدى.
سوعان قاراماستان, كوپتەگەن ايماقتاردىڭ اكىمدىكتەرى وسىنداي مەملەكەتتىك وقۋ ورىندارىن باسەكەلەستىك ورتاعا شىعارۋدى قولعا الىپ وتىر. وقۋ ورىندارىنىڭ رەسۋرستارىن كەشەندى تۇردە باعالاماي, مەملەكەتتىك جانە جەكەمەنشىك كوللەدجدەردىڭ مۇمكىنشىلىكتەرىن سارالاماي جەكەمەنشىككە ساتۋدىڭ ءوزى – تەحنيكالىق, تەحنولوگيالىق جانە قىزمەت كورسەتۋ سالالارىنىڭ ماماندارىن ەمەس, شىعىندى از تالاپ ەتەتىن گۋمانيتارلىق سالانىڭ ماماندارىن عانا دايىنداۋعا سوقتىراتىن ءتۇرى بار. سونداي-اق كوللەدجدەر جەكەمەنشىككە ساتىلعاننان كەيىن وندا ساباق بەرەتىن ماماندار ازاماتتىق قىزمەتكەر رەتىندە الاتىن قوسىمشا اقىسىنان ايىرىلادى جانە مەملەكەتتىك باعدارلاما بويىنشا تۇرعىن ءۇي الۋ مۇمكىندىگىنەن قاعىلادى. ارينە مۇنىڭ ءبارى بىلىكتى مامانداردىڭ باسقا جاققا كەتۋىنە سوقتىرادى.
وسى ماسەلەلەردى ءبىز ۇكىمەت باسشىسى ب.ساعىنتاەۆقا دەپۋتاتتىق ساۋال ارقىلى جەتكىزىپ, مىنا ماسەلەلەردى ەسكەرۋىن وتىندىك:
– «بارشاعا ارنالعان تەگىن كاسىپتىك-تەحنيكالىق ءبىلىم بەرۋ» جوباسىن ىسكە اسىرۋ ءۇشىن مەملەكەتتىك كوللەدجدەر جۇيەسىنىڭ ساقتالۋىن قاراستىرۋ;
– جەرگىلىكتى اتقارۋشى ورگانداردىڭ مەملەكەتتىك كوللەدجدەردى باسەكەلەستىك ورتاعا شىعارۋ تۋرالى ۇسىنىستارىنىڭ ماقساتقا سايكەستىگى مەن نەگىزدىلىگىن قاراستىرۋ;
– الەۋمەتتىك سالا نىساندارىن جەكەشەگە بەرۋ بارىسىندا وسى ۇيىم قىزمەتكەرلەرىنىڭ ماتەريالدىق قامسىزداندىرىلۋىندا الەۋمەتتىك تاۋە-
كەلدەر فاكتورلارىنىڭ تۋىنداماۋىن ەسكەرۋ.
ايگۇل نۇركينا,
ءماجىلىس دەپۋتاتى
