ماسەلەن, ولاردىڭ ءبىر توبى وزدەرى جاريالاعان ساتىپ الۋ تۋرالى حابارلاندىرۋلاردى زاڭ تالاپ ەتەتىندەي ينتەرنەت جەلىسىنە مۇلدەم سالمايتىن بولسا, بىرقاتارى اتالعان دەرەكتەردى مەرزىمەن كەشىكتىرىپ بارىپ جاريالاعانى انىقتالعان. بۇل ءوز كەزەگىندە وبلىستا جەرگىلىكتى كاسىپكەرلىكتىڭ دامۋىنا جەتكىلىكتى دەڭگەيدە كوڭىل بولىنبەيدى دەگەن پىكىردىڭ قالىپتاسۋىنا اكەلىپ وتىر.
كاسىپكەرلەر پالاتاسى جانىنداعى كاسىپكەرلەردىڭ قۇقىعىن قورعاۋ جانە سىبايلاس جەمقورلىققا قارسى ءىس-قيمىل كەڭەسىنىڭ توراعاسى بانيامين ءفايزۋليننىڭ ايتۋىنشا, اسىرەسە اۋدان اكىمدەرى قۇرىلىس جۇرگىزۋگە قاتىستى جاريالاناتىن مەملەكەتتىك تاپسىرىس كەزىندە جەرگىلىكتى كاسىپكەرلەرمەن جۇمىس ىستەۋگە مۇددەلى ەمەس. سونىڭ سالدارىنان اكىمدەر تەندەردە جاريالانعان قۇرىلىس ماتەريالدارى مەن قۇرالدارى تۋرالى سۇرانىستى رەسمي ينتەرنەت-رەسۋرستاردا جاريالاۋعا قاتىستى ۇلتتىق ەكونوميكا ءمينيسترىنىڭ بۇيرىعىن دا ورىنداماي وتىرعان كورىنەدى.
– جوبادا قاراستىرىلعان نەگىزگى قۇرىلىس ماتەريالدارى مەن ونىمدەرىنە سۇرانىس بەكىتىلگەن سمەتالىق ءتىزىمدى رەسمي ينتەرنەت-رەسۋرستا جاريالاۋدى قامتاماسىز ەتۋ تۋرالى ۇلتتىق ەكونوميكا ءمينيسترىنىڭ 2015 جىلدىڭ 19 ناۋرىزىندا شىققان بۇيرىعى بار. بۇل بۇيرىق ءۇش جىل بۇرىن ورىندالۋى كەرەك بولاتىن, بىراق وبلىستا ول ورىندالمادى. قازىر ۇكىمەت ورتالىقتاندىرىلعان ساتىپ الۋ قىزمەتىن قۇرۋ ارقىلى جاڭا ساتىعا شىعۋدى جوسپارلاپ وتىر. ال ءبىز ءالى ءبىرىنشى ساتىداعى تاپسىرمانى ورىنداي المادىق, – دەيدى ب.فايزۋلين.
قوعامدىق مونيتورينگ ناتيجەسىندە بىرقاتار زاڭبۇزۋشىلىق انىقتالعان. كوپ جاعدايدا جاۋاپتى تۇلعالاردىڭ سالعىرتتىعى ىسكە كەدەرگى كەلتىرەدى ەكەن. مىسالعا, بىلتىرعى جىل بويىنشا زەرتتەۋ بارىسىندا ەسكەلدى اۋدانى اكىمدىگىنىڭ سايتىندا ساتىپ الۋ بويىنشا مالىمەتتەر 2017 جىلدىڭ قاراشاسىندا عانا شىققانى انىقتالعان. بۇل كەزدە اۋدان اۋماعىندا قۇرىلىس جۇرگىزۋ جۇمىستارى اياقتالىپ قويعان بولاتىن.
– مونيتورينگ بويىنشا تالدىقورعان قالاسىنداعى 230 پاتەرگە ارنالعان 16 قاباتتى ءۇش تۇرعىن ءۇيدىڭ قۇرىلىسىندا پايدالانىلعان نەگىزگى ماتەريالداردىڭ جيىنتىق تىزىمىنە تالداۋ جاسالدى. قۇرىلىسقا قولدانىلعان زاتتاردىڭ 50 پايىزى قىتاي مەن رەسەيدە جاسالعان تاۋار ەكەنى انىقتالدى. قاجەتتى قۇبىرلار مەن جەلدەتكىش قۇرالدار, تەرەزە مەن ەسىك جابدىقتارى قازاقستاندا دا شىعارىلادى. باعاسى دا قولجەتىمدى. دەمەك اكىمدىكتەر وتاندىق تاۋار ءوندىرۋشىنى قولداۋعا ىنتالى ەمەس. ەسەسىنە كورشى ەلدەن دەلدالدار ارقىلى تاسىمالداناتىن قۇرىلىس ماتەريالدارىنا تاۋەلدىلىكتى ارتتىرىپ وتىر, – دەيدى وڭىرلىك مونيتورينگ ناتيجەسىن سارالاعان وبلىستىق كاسىپكەرلەر پالاتاسىنىڭ باسشىسى ناريمان ابىلشايىقوۆ.
بىراق وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسى زاڭ جانە قۇقىق ءبولىمىنىڭ باسشىسى قاناعات مولدابەكوۆتىڭ كاسىپكەرلەردىڭ سىنىنا وراي ايتار ءوز ءۋاجى بار.
– تاۋار, قىزمەت پەن قىزمەت تۇرلەرىن جەتكىزۋشىلەردىڭ كوپشىلىگى ۇسىنىلعان فورمانى قاتە جاسايدى نەمەسە مۇلدەم تولتىرمايدى. ناقتى جاعدايدى كورسەتۋ ءۇشىن ءبىز پورتالعا ەنگىزىلگەن اقپاراتتاردى شىعارىپ الىپ سارالادىق. ونداعى قىزمەت تۇرلەرى بويىنشا اقپاراتتار تۇزەتىلىپ, جەتكىزۋشى تاراپىنان ءىستىڭ اياقتالمايتىنىن انىقتادىق. ماسەلەن, وبلىستىق جەر كاداسترى دەپارتامەنتىنىڭ 1,9 ملن تەڭگە سوماداعى كەلىسىمشارت مىندەتىن ورىنداۋ ناتيجەسى بويىنشا وتاندىق تاۋار ءوندىرۋشى باعانىندا 100 تەڭگە دەپ جازىلعان. سايكەسىنشە جەرگىلىكتى قۇرام ۇلەسى 0,01 پايىزدى قۇراعان. ال 28,5 ملن تەڭگە سوماداعى كەلىسىمشارت بويىنشا وتاندىق تاۋار ءوندىرۋشى تاراپىنان جالپى سوما كورسەتىلمەگەن. مۇنداي مىسالدار جەتكىلىكتى. سول سەبەپتەن كاسىپكەرلەردىڭ مەملەكەتتىك تاپسىرىسقا ىلىگە الماۋى مۇمكىن, – دەيدى ول.
جالپى, مەملەكەت قارجىسىنىڭ يگەرىلۋى جونىندەگى اقپارات نەعۇرلىم اشىق ءارى قولجەتىمدى بولعان سايىن قوعام ىزگىلەنە تۇسەتىنى انىق. جانە وسى قادام ادامداردىڭ قارجىلىق ساۋاتىنىڭ ارتۋىنا ىقپال ەتىپ, جەمقورلىقسىز ورتا قالىپتاستىرۋعا دا جول اشاتىنى ءسوزسىز. ونىڭ ۇستىنە مەملەكەتتىك تاپسىرىس جۇيەسىندەگى جاريالىلىق وتاندىق كاسىپكەرلىكتىڭ دامۋىنا پايداسىن تيگىزەتىنى جانە دالەلدەنگەن. ال بۇل باعىتتاعى جۇمىستاردىڭ نەگىزگىسى مەملەكەتتىك ورگانداردان باستاۋ الۋى ءتيىس ەدى. بىراق كاسىپكەرلەردىڭ قۇقىن قورعايتىن ۇيىمنىڭ پايىمداۋى كەرىسىنشە ناتيجە كورسەتىپ وتىر.
ايتپاقشى, الماتى وبلىسى بويىنشا مەملەكەتتىك ساتىپ الۋ پورتالىنا جىل باسىنان بەرى جالپى سوماسى 78,9 ملرد تەڭگەنى قۇرايتىن 38244 ساتىپ الۋ لوتى جاريالانعان بولسا, بۇل تاپسىرىستاردى ورىنداۋعا 3250 جەرگىلىكتى كاسىپكەر ءوتىنىش بەرگەن ەكەن. ەندىگى كەزەك باعا مەن جۇمىستى ورىنداۋعا ىنتالى كاسىپكەرلەردە. جالپى, بۇل ءىستىڭ ناتيجەلى بولۋى وتاندىق ءونىم ءوندىرۋشىنى قولداۋعا قاتىستى ءجيى سىنعا ۇشىرايتىن جەرگىلىكتى اتقارۋشى ورگاندار جۇمىسىنىڭ جاقسارعاندىعىن دا بىلدىرەتىنى انىق. دىتتەپ كەلگەندە وتاندىق ءوندىرىس جاندانىپ, مەملەكەت قارجىسى ءتيىمدى جۇمسالۋى كەرەك. ال كاسىپكەرلىكتىڭ دامۋىنا كەدەرگى كەلتىرەتىن كەز كەلگەن جاعدايدىڭ الدىن الۋ بۇگىنگى كۇننىڭ تالابى.
قالماحانبەت مۇقامەتقالي,
«ەگەمەن قازاقستان»
الماتى وبلىسى
