جارىسقا اۋدانداعى 2004, 2005, 2006, 2007, 2008 جىلدارى تۋعان 200-دەن استام بالا قاتىسىپ, سايىس قورىتىندىسىندا سونىڭ 56-سى جۇلدەگەر اتاندى. كوماندالىق ەسەپتە اياگوز قالاسىنىڭ بالعىن بالۋاندارى 1, ايعىز بەن مىڭبۇلاقتىڭ ورەندەرى تيىسىنشە 2-3 ورىنداردى يەلەندى.
1945 جىلى اياگوز اۋدانىنىڭ ايعىز اۋىلىندا دۇنيەگە كەلگەن جەڭىس يبرايموۆ شۇبارتاۋداعى سايىستاردى ەسەپتەمەگەندە 1967 جىلى كەڭەس وداعىنىڭ 50 جىلدىعىنا وراي وتكەن وبلىستىق چەمپيوناتتا, سول جىلى سەمەي وبلىستىق ءىV جازعى سپارتاكياداسىندا جەڭىمپاز اتانادى. 1968 جىلى الماتى قالاسىندا ۇيىمداستىرىلعان جارىستا 3 ورىنعا يە بولادى. قازاق كۇرەسىمەن كاسىبي تۇردە شۇعىلدانباسا دا از ۋاقىتتا بيىك بەلەستەردى باعىندىرعان بالۋان اۋىلدا سپورت نۇسقاۋشىسى, تاعى باسقا دا قىزمەتتەردى اتقارادى. كۇش يەسىنىڭ كوزىن كورگەن زامانداستارى جەڭىس يبرايموۆتى ساعىنىشپەن تەبىرەنە ەسكە الادى.
«1967 جىلدان باستاپ جەڭىس ەكەۋمىز كۇرەسكە بىرگە قاتىسىپ جۇردىك. وسى جىلى ءساۋىردىڭ 3-5 ارالىعىندا اياگوز قالاسىندا سەمەي وبلىسى بويىنشا ءار اۋداننان ەكى ءجۇزدىڭ ۇستىندە بالۋاندار جينالدى. اياگوزدىڭ كلۋبىندا ءۇش كۇن بويى كۇرەستىك. بۇل – جەڭىستىڭ كۇرەسكە العاش بارعان كەزى ەدى. سونىڭ وزىندە 5 اداممەن كۇرەسىپ, بەسەۋىن دە تازا جەڭدى. كۇرەسكەن ادامدارىنىڭ ءبارى ءبىرىنشى رازرياد, سپورت شەبەرلىگىنەن ۇمىتكەر دەگەندەي مىقتى بالۋاندار بولدى. ودان كەيىن سەمەيدە وتكەن جارىستا دا بەس بالۋاندى تىزە بۇكتىردى.
ۇلى ابايدىڭ 125 جىلدىعىندا شىڭعىستاۋدىڭ جاۋىرىنى جەرگە تيمەگەن اتاقتى بالۋانى دۇرمەكباەۆتى الىپ ۇرعاندا كوزىنە جاس الىپ, كىلەمنەن ارەڭ تۇرەگەلگەنى ەسىمىزدە. جەڭىس اتى ايتىپ تۇرعانداي ۇنەمى جەڭىسكە جەتىپ ءجۇردى. ءوزى تۋىپ-وسكەن شۇبارتاۋ اۋدانىنىڭ تۇيەبالۋانى, چەمپيونى بولدى. بەت قاراتقان جوق. سەمەي وبلىسى بويىنشا دا جەڭىستىڭ الدىنا تۇسەر بالۋاندار از ەدى. 1967 جىلعى كۇرەستەن كەيىن جەڭىستى كۇرەس قوعامىنىڭ باستىعى الماتىعا شاقىردى. «الماتى قۇراما قومانداسىنا الامىز, كەيىن شەت ەلدەرگە جارىستارعا شىعاسىڭ» دەگەن ەكەن. الايدا جەڭىس بارا المادى. سول كەزدە بارعاندا بۇدان دا بيىك بەلەستەردى باعىندىرار ما ەدى», - دەيدى بالۋاننىڭ اۋىلداس اعاسى, كەزىندە بىرگە كۇرەسكەن نۇرات نازاربەكوۆ اقساقال.
ازامات قاسىم,
«ەگەمەن قازاقستان»
شىعىس قازاقستان وبلىسى,
اياگوز اۋدانى,
ايعىز اۋىلى
