كەزدەسۋ بارىسىندا اۋعانستان باسشىسى قازاقستاندىق تاراپقا جانە پرەزيدەنت نۇرسۇلتان نازارباەۆتىڭ جەكە وزىنە اۋعانستاندى قايتا قالپىنا كەلتىرۋگە, ەلدە بەيبىتشىلىك پەن قاۋىپسىزدىك ورناتۋعا باعىتتالعان بارلىق حالىقارالىق جانە وڭىرلىك باستامالارعا ۇنەمى كورسەتىپ وتىرعان قولداۋى ءۇشىن العىسىن ءبىلدىردى. ول كابۋل ءۇشىن قازاقستاننىڭ ورتالىق ازياداعى ەڭ ءىرى ارىپتەس رەتىندە ەرەكشە ماڭىزدىلىعىن اتاپ ءوتتى. بۇعان ونىڭ تەك 2017 جىلى استاناعا ەكى رەت ساپارمەن كەلۋى جانە قازاقستان پرەزيدەنتىمەن كەلىسسوزدەرى دالەل.
اۋعانستان پرەزيدەنتى ەكى ەل اراسىنداعى ساۋدا-ەكونوميكالىق ىنتىماقتاستىقتى تەرەڭدەتۋدىڭ قاجەتتىگىن باسىپ ايتتى. قازاقستاندىق كاسىپكەرلەردى اۋعان نارىعىنا بيداي جەتكىزۋ, اۋعانستان اۋماعىندا ديىرمەن سالۋ, كەن ونەركاسىبى, ەلەكتر ەنەرگياسى, تەمىرجول سالالارىندا جوبالاردى جۇزەگە اسىرۋ بويىنشا بەلسەندى ءىس-قيمىلعا شاقىردى. ءوز كەزەگىندە, اۋعان تارابى قازاقستان نارىعىنا جەمىس-جيدەك پەن جاڭعاق تۇرلەرىن جەتكىزۋ كولەمىن ۇلعايتۋعا ءازىر.
ءا.ەسەنگەلديەۆ اۋعانستان پرەزيدەنتىنە قوناقجايلىعى ءۇشىن العىس ءبىلدىرىپ, ەلباسى ن.نازارباەۆتىڭ اۋعانستانعا نازارىن, سونىڭ ىشىندە قازاقستاننىڭ بۇۇ قاۋىپسىزدىك كەڭەسىندەگى تۇراقتى ەمەس مۇشەلىگى شەڭبەرىندە ايرىقشا ماڭىز بەرىپ وتىرعانىن اتاپ ايتتى. ەلشى مەملەكەتتەر اراسىنداعى ەكىجاقتى قاتىناستاردى ودان ءارى كەڭەيتۋگە كۇش سالۋعا دايىن ەكەنىن جەتكىزىپ, سونداي-اق كاۋلدىڭ ەلدەگى جاعدايدى قىسقا مەرزىمدە قالپىنا كەلتىرۋ ءىسىن ودان ءارى قولدايتىنى جونىندەگى استانانىڭ ۇستانىمى تۋرالى مالىمدەدى.
بۇدان بولەك, قازاقستان ەلشىسى سول كۇنى اۋعانستاننىڭ سىرتقى ىستەر ءمينيسترى سالاحۋددين راببانيمەن جەكە كەزدەسۋ وتكىزىپ, تاراپتار ەكىجاقتى جانە كوپجاقتى ىنتىماقتاستىعىنىڭ كەڭ اۋقىمدى ماسەلەلەرى بويىنشا پىكىر الماستى.
«ەگەمەن-اقپارات»
