«ەگەمەن قازاقستاننىڭ» ارنايى جوباسى: جاسامپازدىق جەمىستەرى
جيىرما جىلدىڭ ىشىندە اتقارىلعان يگى ىستەردىڭ ارقاسىندا ءاربىر ءوڭىرىمىز وزگەرىپ, ءومىرىمىز جاقسارىپ كەلەدى. «ەگەمەن قازاقستان» گازەتى وسىنداي وركەندى وزگەرىستەردى بەينەلەيتىن ماتەريالداردى تۇراقتى جاريالاپ تۇرادى. تومەندە پەتروپاۆل جوعارى اسكەري ۋچيليششەسىنەن فوتورەپورتاج بەرىلىپ وتىر.
ەڭسەلى وقۋ ورداسى
قازاقستان رەسپۋبليكاسىنىڭ پرەزيدەنتى, رەسپۋبليكا قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆ تاۋەلسىزدىگىمىزدىڭ العاشقى كۇندەرىنەن دەربەس اسكەرىمىزدى قۇرىپ, قورعانىس سالاسىن نىعايتۋعا ەرەكشە قامقورلىق جاساپ كەلەدى. جاسامپازدىقتىڭ 20 جىلىندا جەرگىلىكتى اسكەري ماماندار مەن كومانديرلەر كورپۋسىن جاساقتاۋ باعىتىندا دا كوپ ءىس تىندىرىلدى. وسى ورايدا ەلباسىنىڭ تىكەلەي قولداۋىمەن سولتۇستىك قازاقستان وبلىسىندا ىشكى ىستەر مينيسترلىگى ىشكى اسكەرلەر پەتروپاۆل جوعارى اسكەري ۋچيليششەسىنىڭ اشىلۋى ەل ومىرىندەگى ايتۋلى وقيعا بولدى. ول 1997 جىلى 18 ناۋرىزدا بوي كوتەردى. قالانىڭ شەتكەرى ايماعىندا اسكەري اسەم قالاشىقتىڭ تۇرعىزىلۋىنا ۇكىمەت تاراپىنان زور قارجىلىق قولداۋ كورسەتىلدى. سول جىلى العاشقى تۇلەكتەرىن قابىلدادى. قىزىلجار وڭىرىنە جاساعان جۇمىس ساپارى كەزىندە مەملەكەت باسشىسى ەڭسەلى ءبىلىم ورداسىنا ارنايى كەلىپ, جاۋىنگەرلىك تۋدى سالتاناتتى تۇردە تابىس ەتتى. ىشكى اسكەرلەر قۇرامالارىنا ساردارلار ازىرلەيتىن بىردەن-ءبىر ءبىلىم وشاعىنا 2009 جىلى اسكەري ينستيتۋت مارتەبەسى بەرىلدى. ونى ءار جىلدارى گەنەرال-مايورلار امانگەلدى دۇيكەنوۆ, راشيد فاتكۋللين, پولكوۆنيكتەر مۇرات قاراعويشيەۆ, ءسابيت احمەتوۆ باسقارىپ, ماتەريالدىق-تەحنيكالىق بازانىڭ نىعايۋىنا, بىلىكتى كادرلارمەن تولىقتىرۋعا ۇلكەن ۇلەس قوستى. قازىر پولكوۆنيك, اسكەري عىلىمدار دوكتورى جۇمابەك احمەتوۆ جەتەكشىلىك ەتەدى. بۇگىنگە دەيىن ينستيتۋت قابىرعاسىنان ەكى مىڭعا جۋىق وفيتسەرلەر تۇلەپ ۇشتى. ەلىمىزدىڭ ءار قيىرىنان كەلگەن كۋرسانتتار ءتورت جىل وقىپ, كوماندا-تاكتيكالىق تاربيە جانە الەۋمەتتىك-قۇقىقتىق جۇمىستار, كوماندا-تاكتيكالىق راكەتا-ارتيللەريالىق, ينجەنەرلىك-تەحنيكالىق قامتاماسىز ەتۋ, اۆتوموبيل ىستەرى بويىنشا ازاماتتىق ماماندىقتار الىپ شىعادى. وقىتۋ باعدارلاماسىندا «ۆس» ساناتىنداعى ءجۇرگىزۋشىلەر مەن ەلەكتروندى ەسەپتەگىش ماشينالار وپەراتورلارىن ازىرلەۋ جايى دا قاراستىرىلعان.
– اسكەري وقۋ ورنىن ورنالاستىرۋعا پەتروپاۆل قالاسىنىڭ تاڭداپ الىنۋى كەزدەيسوق ەمەس. ەلباسىمىزدىڭ حالقىمىزدىڭ تىنىشتىعىن, ەلدىك مۇددەنى جان-جاقتى ويلاستىرعان, ءوڭىردىڭ ستراتەگيالىق, ساياسي ءمان-ماڭىزىن جەتە ەسكەرگەن كورەگەندىك شەشىمىنىڭ دۇرىستىعىن ۋاقىتتىڭ ءوزى دالەلدەپ بەردى. العاشقى تۇلەكتەرىمىز ەل تاۋەلسىزدىگىنىڭ 10 جىلدىعى قارساڭىندا اسكەري ومىرگە جولداما الدى. ەل اسكەرلەرى قۇرامىنداعى اسكەري مامانداردىڭ 90 پايىزى – ءبىزدىڭ وفيتسەرلەر. قورعانىس, توتەنشە جاعدايلار مينيسترلىكتەرىندە, ۇقك شەكارا كوميتەتىندە دە ابىرويلى قىزمەت اتقارۋدا, – دەيدى جۇمابەك حاتيوللا ۇلى.
ينستيتۋتتىڭ حالىقارالىق ارەناداعى بايلانىسى نىعايا تۇسكەن. وسىندا قىرعىزستان مەن تاجىكستاننىڭ وكىلدەرى ءبىلىم الادى. رەسەيدىڭ ءنوۆوسىبىر, پەرم, سانكت-پەتەربۋرگ قالالارىنداعى اسكەري ينستيتۋتتارمەن تىعىز قارىم-قاتىناس ورناتقان. 120-عا تارتا وقىتۋشىلار مەن وفيتسەرلەر اقش, گەرمانيا, ءۇندىستان, رەسەي, تاعى باسقا مەملەكەتتەردە بىلىكتىلىكتەرىن ارتتىردى, تاجىريبەلەرىن جەتىلدىردى. وقۋ-ادىستەمەلىك سەمينارلارعا, عىلىمي كونفەرەنتسيالارعا قاتىستى. جەكە قۇرام اسكەري شەرۋلەر مەن بۇكىلاسكەرلىك كەڭەستەرگە ۇزبەي قاتىسىپ, جاقسى قىرىنان تانىلىپ ءجۇر. وفيتسەرلەر كلۋبى, ارداگەرلەر كەڭەسى, جاستاردىڭ باستاماشىل ورتالىعى جۇمىس ىستەيدى. اسكەري وركەستر مەن انشىلەر – رەسپۋبليكالىق كونكۋرس-بايقاۋلاردىڭ جەڭىمپازدارى. سپورتتىق جەتىستىكتەر دە از ەمەس. ايبەك قىرىقباەۆ دجيۋ-دجيتسۋدەن, اباي ءتىنالين, ميراس ءبىرىمجانوۆ كيكبوكسينگتەن, دەنيس كولەسنيكوۆ گىر كوتەرۋدەن, ماقسات ءنۇسىپوۆ قازاق كۇرەسىنەن ەۋروپا, الەم چەمپيوندارى اتاندى.
تاۋەلسىزدىك مەرەيتويى قارساڭىندا كوپتەگەن يگىلىكتى ىستەر قانات جايا تۇسكەن. «قازاقستان – مەنىڭ وتانىم!» تاقىرىبىندا شارالار ءجيى وتكىزىلىپ تۇرادى. كۋرسانتتاردى وقۋعا قابىلداۋ, ادالدىققا انت بەرۋ راسىمدەرى, ءتۇرلى تاربيە ساعاتتارى ەگەمەندىكتىڭ قادىر-قاسيەتىن ۇعىندىرۋ, ەلدى, جەردى قالتقىسىز ءسۇيۋ, ۇلتتىق قۇندىلىقتاردى قادىرلەۋ, مەملەكەتتىك تىلگە دەگەن قۇشتارلىقتى وياتۋ سەكىلدى پاتريوتتىق ءتالىم-تاربيەمەن تىعىز بايلانىسىپ جاتادى. ۇلكەن شەبەرلىكتى, ەپتىلىكتى, كۇش-قۋاتتى تالاپ ەتەتىن اسكەري-تاكتيكالىق جاتتىعۋلار بۇگىنگى كۋرسانتتىڭ, ەرتەڭگى سارداردىڭ ازاماتتىق تۇلعاسىن قالىپتاستىرارى انىق.
________________________________
ارنايى بەتتى ازىرلەگەن «ەگەمەن قازاقستان» گازەتىنىڭ سولتۇستىك قازاقستان وبلىسىنداعى مەنشىكتى ءتىلشىسى ءومىر ەسقالي.
