مەملەكەتتىك حاتشى قازاقستان مەن وزبەكستاندى سان عاسىرلىق تۋىستىق قارىم-قاتىناس, ورتاق مادەنيەت, شىنايى دوستىق پەن ءوزارا ىنتىماقتاستىق بايلانىستىراتىنىن اتاپ ءوتتى.
كەزدەسۋ بارىسىندا گ.ابدىقالىقوۆا قازاقستاننىڭ ىشكى ساياساتىنىڭ باستى باعىتتارى تۋرالى ايتتى. مەملەكەت باسشىسى ن.ءا.نازارباەۆتىڭ تاپسىرماسىمەن ەلىمىزدە ەكونوميكانى, ساياساتتى جانە قوعامدىق سانانى قامتيتىن جۇيەلى جاڭعىرۋ ۇدەرىسى جۇرۋدە.
– جوعارى دەڭگەيدەگى ءوزارا سەنىمگە نەگىزدەلگەن ءارى ساياسي سىندارلى ديالوگ ستراتەگيالىق سەرىكتەستىكتى ودان ءارى تەرەڭدەتۋدىڭ نەگىزگى وزەگى بولا بەرمەك, – دەدى مەملەكەتتىك حاتشى.
گ.ابدىقالىقوۆا وزبەكستاننىڭ قازاقستانداعى جىلى اياسىندا ازاماتتار, سونداي-اق عىلىم, مادەنيەت, ءبىلىم بەرۋ مەكەمەلەرى, شارۋاشىلىق جۇرگىزۋشى سۋبەكتىلەر, كاسىپكەرلىك قۇرىلىمدارى اراسىنداعى بايلانىستاردى كەڭەيتۋگە باعىتتالعان اۋقىمدى ءىس-شارالار جوسپارلانىپ وتىرعانىن ايتتى.
قازاقستان مەن وزبەكستان اراسىنداعى سىرتقى ساۋدا اينالىمى قارقىندى دامىپ كەلە جاتقانى اتاپ ءوتىلدى. ماسەلەن, 2017 جىلى ەكىجاقتى ساۋدا 31 پايىزعا ءوسىپ, 2 ميلليارد اقش دوللارىنا جەتكەن. بيىلعى 2 ايدا ساۋدا اينالىمى 44 پايىزعا ارتىپ, 366 ميلليون دوللاردى قۇرادى.
كەزدەسۋ سوڭىندا گۇلشارا ابدىقالىقوۆا ەكى ەل اراسىنداعى ءداستۇرلى تاتۋ كورشىلىك قارىم-قاتىناستى نىعايتۋ ىسىندە وزبەكستاننىڭ قازاقستانداعى توتەنشە جانە وكىلەتتى ەلشىسى س.نيازحودجاەۆقا زور تابىس تىلەدى.
