استانادا ءتاۋەلسىزدىكتىڭ 20 جىلدىعىنا ارنالعان رەسپۋبليكالىق اقىندار ايتىسى ءوتتى. اتا-بابادان اسىل مۇرانىڭ ارداقتىسى بولىپ جەتكەن ورەلى ونەردى كەيىنگى ۇرپاققا امانات ەتۋ, ءسوز ونەرىنىڭ اسىلى ايتىس ارقىلى ءتىلىمىزدىڭ مارتەبەسىن ارتتىرۋدى ماقسات ەتكەن الامان بايگە ەلوردا تورىندە ءۇش كۇنگە سوزىلىپ, شەشەندىكتىڭ قادىر-قاسيەتىن ارداق تۇتاتىن كوپشىلىكتىڭ قۇرمەتىنە بولەندى.
مادەنيەت مينيسترلىگىنىڭ قولداۋىمەن, «سامۇرىق-قازىنا» ۇلتتىق ءال-اۋقات قورىنىڭ دەمەۋشىلىگىمەن وتكەن بۇل الامان ءبايگەگە ەلىمىزدىڭ بار ايماعىندا بولىپ وتكەن جارىستاردان ىرىكتەلگەن 42 اقىن قاتىستى. سونداي-اق, بۇل شاراعا ىرگەدەگى قىتاي, موڭعوليا, قىرعىزستان, وزبەكستاننان دا ايتىسكەر قانداستارىمىز قاتىسىپ, ءوز ونەرلەرىن ورگە وزدىردى.
ەلىمىزگە تانىمال قوعام قايراتكەرلەرى مىرزاتاي جولداسبەكوۆ, سەيىت قاسقاباسوۆ, ءاسانالى ءاشىموۆ, ومىرزاق ايتباەۆ, فاريزا وڭعارسىنوۆا, بەكبولات تىلەۋحان, نەسىپبەك ايت ۇلى تورەلىك ەتكەن قازىلار القاسىنىڭ شەشىمىمەن باس بايگە قىتاي حالىق رەسپۋبليكاسىنان كەلگەن قانداسىمىز جاميعا داۋلەتكە بۇيىرىپ, وعان تيەسىلى 20 مىڭ دوللاردى مادەنيەت مينيسترلىگىنىڭ جاۋاپتى حاتشىسى جاننا قۇرمانعاليەۆا تابىستاسا, ءى ورىندى ء(بىر جارىم ميلليون تەڭگە) اقمولا وبلىسىنان سايىسقا تۇسكەن جاس قىران ءالىبەك سەرعالي يەلەندى. ال ەكى ءىى ورىندى ء(بىر ميلليون تەڭگەدەن) قىزىلوردالىق مۇحتار نيازوۆ پەن استانالىق ەركەبۇلان قاينازاروۆ قانجىعاسىنا بايلاسا, ءۇش ءىىى ورىن (بەس ءجۇز مىڭ تەڭگەدەن) قىرعىز رەسپۋبليكاسىنان قاتىسقان ااالى تۇتقىشەۆ پەن الماتى جانە استانا ايتىسكەرلەرى سارا توقتامىسوۆا مەن اينۇر تۇرسىنباەۆاعا بۇيىردى.
ارينە, وزگە دە ايتىسكەر اقىندار كادەسىز قالعان جوق. اقىن فاريزا وڭعارسىنوۆا قىتايدان كەلگەن قوس سىڭلىسىنە ءوزىنىڭ «داۋا» اتتى كىتابىن سىيلاسا, «ەگەمەن قازاقستان» رەسپۋبليكالىق گازەتى» اق پرەزيدەنتى ساۋىتبەك ابدراحمانوۆ بايقوڭىر قالاسىنىڭ اقىنى تورەعالي تورەالىگە ارنايى سىيلىعىن تابىستادى. ال قازىلار القاسىنىڭ ءتوراعاسى مىرزاتاي جولداسبەكوۆ بولسا, قىتاي حالىق رەسپۋبليكاسى مەن قىرعىز رەسپۋبليكاسىنان وسى ايتىسقا ارنايى كەلگەن وكىلدەرگە شاپان جاۋىپ, سىي-قۇرمەت كورسەتتى. «التىن قىران» كومپانياسىنىڭ باسشىسى يسلامبەك سالجانوۆ مادەنيەت مينيسترلىگىنىڭ ۇلگىسىمەن الامان بايگەگە قاتىسقان بارلىق ايتىسكەرلەرگە ءوز سىي-سياپاتىن جاسادى.
بۇل ايتىستىڭ ءبىر ەرەكشەلىگى – كورشى ەلدەردەن دە قانداس باۋىرلاستار قاتىسىپ, ايتىستىڭ ەلارالىق سيپات العانى بولدى. ءيا, ءبىر عانا قىتايدان ءتورت, موڭعوليا مەن قىرعىزستاننان ەكى-ەكىدەن سايىپقىراندار ونەرلەرىن ورتاعا سالعان بولسا, قىتايدان كەلگەن جاميعا داۋلەت باس جۇلدەگە يە بولىپ, اتا-جۇرتىنىڭ ريزاشىلىعىنا بولەندى.
ايتىستاعى بالعىنبەك يماشەۆ, اينۇر تۇرسىنباەۆا, داۋلەتكەرەي كاپ ۇلى, امانجول التاەۆ, سەرىكزات دۇيسەنعازين سەكىلدى ەلگە تانىمال تارلانبوزداردىڭ ءجونى ءبىر ءبولەك بولسا, بۇل جولى الىبەك سەرعالي, مۇحتار نيازوۆ, ەركەبۇلان قاينازاروۆ سياقتى جالىنداعان جاس پەرىلەر بايگە كورىگىن قىزدىرىپ, ەل-جۇرتتى ريزا ەتتى. مۇنى ەلىمىزدەگى تۋعان ءتىلىن تورگە وزدىرعان تاۋەلسىزدىكتىڭ بىردەن-ءبىر كورىنىسى, كۇن وتكەن سايىن ءوز مۇراتىنا جەتىپ كەلە جاتقان انا ءتىلىمىزدىڭ ماۋەلى جەمىسى دەۋگە بولادى.
بەرىك سادىر.
––––––––––––––––––––––
سۋرەتتەردى تۇسىرگەندەر قايىربەك مۇقىشەۆ,
سوۆەتبەك ماعزۇموۆ.
