جارتىلاي ورتا سالماقتا جۇدىرىقتاسقان دانيار ەلەۋسىنوۆتىڭ جەكپە-جەگى گەننادي گولوۆكيننىڭ ەكس-قارسىلاسى دەنيەل دجەيكوبستىڭ قاتىسۋىمەن بولعان بوكس كەشىندە ءوتتى. الدىن الا مالىمەت بويىنشا ەلەۋسىنوۆ-كيدد ايقاسى 6 راۋندقا جوسپارلانعان-دى.
جەكپە-جەكتىڭ ءبىرىنشى راۋندىندا ەكى بوكسشى ءبىر-ءبىرىن بارلاۋمەن وتكىزدى. دەسە دە ەلەۋسىنوۆ رەتى كەلگەندە قارسىلاسىن سوققىنىڭ استىنا الىپ, ءبىراز تىقسىرىپ باقتى. ەكىنشى راۋندتا قانداسىمىز باسىمدىقتى ءوز قولىنا الدى. قارسىلاسىنا مۇلدەم سوققى جاساۋعا مۇمكىندىك بەرمەي, رينگ ۇستىندە ءوز بيلىگىن جۇرگىزدى. ال ءۇشىنشى راۋندقا كەلگەندە ەلەۋسىنوۆ ايقاستى ۇزاققا سوزباي, وسى رانۋدتا-اق اياقتاپ تاستاۋعا بەل بۋدى. امەريكالىق بوكسشى سوققى جاساماقشى بولىپ, قولىن العا سوزعاندا قورعانىسى اشىق قالعانىن بايقاعان دانيار, سول قولىنىڭ اۋىر سوققىسىمەن قارسىلاسىن ەسەڭگىرەتىپ تاستادى. 10 سەكۋندتان سوڭ كيدد كەزدەسۋدى جالعاستىرا الاتىنىن ايتىپ, ورنىنان تۇرعانىمەن, قانداسىمىز ونى قايتا سوققىنىڭ استىنا الدى. الايدا امەريكالىق بوكسشىنىڭ جۇدىرىقتاسۋعا قاۋقارى قالماعانىن بايقاپ, تورەشى جەكپە-جەكتى توقتاتۋعا ءماجبۇر بولدى. وسىلايشا دانيار ەلەۋسىنوۆ كاسىپقوي بوكستاعى مانسابىن جارقىن جەڭىسپەن باستادى.
كەزدەسۋدەن سوڭ نوا كيدد جەرگىلىكتى باق وكىلدەرىنە جەڭىلىسىنىڭ سەبەبىن ايتىپ بەردى. «بىلەسىزدەر مە, مەنىڭ قارسىلاسىم ەكى وليمپيا ويىندارىنا قاتىسىپ, ءبىر رەت چەمپيون بولعان. ول وتە مىقتى جانە تاجىريبەلى بوكسشى. جالپى جەكپە-جەككە دايىندىعىم وتە از بولدى. تاعى ءۇش اپتاعا جۋىق دايىندالعانىمدا بۇگىن باسقا ايقاستى كورەتىن ەدىڭىزدەر. مەنىڭ جاتتىعۋىمنىڭ كوپ بولىگى سالماق قۋمەن ءوتتى. سوندىقتان كۇشىمنىڭ ءبىرازىن سارقىپ الدىم دەسەم دە بولادى. بۇل – اقتالعانىم ەمەس. جەڭىلىسىمدى مويىندايمىن. كارەرامدا ءبىرىنشى رەت ءۇشىنشى راۋندتا جەڭىلىپ قالدىم. ەندى جاتتىعۋ زالىنا تەزىرەك ورالىپ, دايىندىعىمدى ەكى ەسە ارتتىراتىن بولامىن», دەدى امەريكالىق بوكسشى.
ول بۇگىنگە دەيىن ءتورت كەزدەسۋ وتكىزىپ, ۇشەۋىندە جەڭىسكە جەتسە, بىرەۋىندە تەڭ تۇسكەن. 23 جاستاعى كيدد كاسىپقوي بوكستىڭ الىپپەسىن وسىدان ەكى جىل بۇرىن باستاعان. سوڭعى ايقاسىن وتكەن جىلدىڭ جەلتوقسان ايىندا وتكىزىپ, قارسىلاسىن تەحنيكالىق نوكاۋتپەن جەڭگەن.
سونىمەن قاتار RingTV باسىلىمىنىڭ ءجۋرناليسى رايان سونگاليا دانيار ەلەۋسىنوۆ جەكپە-جەگىن وسىلاي جالعاستىرا بەرسە, از ۋاقىتتىڭ ىشىندە توپ بوكسشىلاردىڭ قاتارىنا ەنەتىنىن ايتتى. «ول كاسىپقوي بوكستاعى قادامىن ءساتتى باستادى. مەن وسى كۇننەن باستاپ ونىڭ ءار قادامىن باقىلاپ وتىرامىن. ول تەز ارادا ۇزدىك بوكسشىلاردىڭ قاتارىنا ەنەتىنىنە سەنىمدىمىن. ونىڭ جىلدامدىعى مەن رينگتە ەركىن قيمىلداۋى مەنى قاتتى ريزا ەتتى», دەدى ول.
ءالي بيتورە,
«ەگەمەن قازاقستان»
