«سينحۋا» اگەنتتىگىنىڭ حابارىنا قاراعاندا, قىتاي ۇكىمەتى شەتەلدە ءبىلىم العان جاستاردىڭ ەلگە ورالۋىن ىنتالاندىرۋ ماقساتىندا جاڭا باعدارلاما ازىرلەۋدى قولعا العان. سونىڭ ىشىندە ولاردىڭ جەكە بيزنەستەرىن اشۋىنا جانە يننوۆاتسيا ەنگىزۋلەرىنە جەڭىلدىكتەر جاسالماق. بۇل تۋرالى قحر مەملەكەتتىك كەڭەسىنىڭ وتىرىسىندا قابىلدانعان رەسمي شەشىمدە ايتىلعان.
جەڭىلدىكتەردىڭ قاتارىندا شەتەلدە وقىپ كەلگەن جاستار ءۇشىن جەرگىلىكتى جەرلەردەگى سەرتيفيكاتتاۋ پروتسەدۋرالارىنىڭ وڭايلاتىلاتىندىعى, تىركەلىمگە تۇرۋدىڭ جەڭىلدەتىلەتىنى, سونداي-اق وسىنداي مامانداردىڭ بالالارىن بىلىممەن قامتاماسىز ەتۋگە دە جاعداي جاسالاتىنى كورسەتىلگەن.
قىتاي پرەمەرى لي كەتسيان ءوزىنىڭ سوزىندە شەتەلدە وقىعان جاستاردىڭ نەگىزگى بولىگى قازىرگى كەزدە ەلگە ورالىپ جاتقانىن اتاپ وتكەن. ءبىلىم مينيسترلىگىنىڭ مالىمەتىنە قاراعاندا, 1978 جىل مەن 2017 جىلدار ارالىعىندا سىرتقا شىعىپ وقىعانداردىڭ 83,7 پايىزى, ياعني 3,1 ملن ادام ەلگە ورالعان. ال 2017 جىلى ەلگە ورالعاندار سانى 480,9 مىڭ ادام بولعان, بۇل 2016 جىلمەن سالىستىرعاندا 11,2 پايىزعا ارتىق ەكەنىن ول ءوز سوزىندە تىلگە تيەك ەتكەن.
دەگەنمەن بۇل ەلدە دە اتالعان پروبلەما ورىن الىپ وتىرعاندىعى كورىنىپ تۇر. سوندىقتان دا ەلگە ورالۋدى ىنتالاندىرۋ باعدارلاماسى قولعا الىنعان سياقتى. ءبىزدىڭ ەلگە دە وسى تاجىريبەنى پايدالانۋ كەرەك.
ايتا كەتەتىن جايت, قىتايدىڭ مامانداردى ەلگە ورالتۋ باعدارلاماسىندا شەتەلدەن كەلگەن ماماندار ءۇشىن ستارتاپتاردى قارجىلاندىرۋ, ساۋدا بەلگىلەرىن تىركەۋدى جەڭىلدەتۋ, ەكسپورتقا ءوتىنىم بەرۋ پروتسەستەرىن وڭتايلاندىرۋ جانە عىلىمي-تەحنولوگيالىق جۇمىستاردى كوممەرتسيالاندىرۋدى قولداۋ شارالارى دا قاراستىرىلعان. سونىمەن قاتار ەلگە ورالعان ماماندار ءۇشىن تولىق كومەكتەر كورسەتىلۋى ءۇشىن قوعامدىق قىزمەتتەر جۇيەسى قۇرىلادى ەكەن.
جاقسىباي سامرات,
«ەگەمەن قازاقستان»
